باب: منقبتوں کا مجموعہ - مرآۃ المناجیح شرح مشکوٰۃ المصابیح - حدیث نمبر: 6227

۱∞؎آپ جناب حفصہ بنت عمر فاروق زوجہ رسول الله صلی الله علیہ و سلم ہیں ہم سارے مسلمانوں کی ماں رضی الله عنہا،آپ کے حالات بیان ہوچکے۔
۲؎حضور انور کا یہ فرمان کہ میں امید کرتا ہوں بالکل یقین کے لیے ہے اوران شاءاللهفرمانا شک کے لیے نہیں بلکہ یا برکت کے لیے ہے،یا اس کے معنی ہیں الله کے فضل سے جیسے رب فرماتاہے:"لَتَدْخُلُنَّ الْمَسْجِدَ الْحَرَامَ اِنۡ شَآءَ اللهُ"۔اہل بدر اور اصحاب حدیبیہ یقینًا جنتی ہیں ان کا ایمان،تقویٰ،خاتمہ بالخیر،حساب قبر میں کامیابی،حساب حشر میں سرخروئی،پل طراط سے بخیریت گزر جانا سب کچھ رجسٹری شدہ ہے۔
۳؎ام المؤمنین حفصہ سمجھیں کہ آیتِ کریمہ میں لفظواردھابمعنیداخلھاہے اس لیے آپ نے یہ سوال فرمایا کہ رب فرماتا ہے کہ ہرشخص کو دوزخ میں ضرور جانا پڑے گا۔
۴؎خلاصہ یہ ہے کہ دوزخ جنت کے راستہ میں ہے لہذا جنت کو جاتے ہوئے وہاں سے مؤمنوں کو بھی گزرنا پڑے گا، کفار تو اس پل سے گر کر آگ میں داخل ہوجائیں گے مؤمنین بخیریت وہاں سے گزر جائیں گے۔
۵؎خیال رہے کہ اس بیعت کے موقعہ پر حضرت عثمان غنی حضور کے بھیجے ہوئے نمائندہ رسول بن کر مکہ معظمہ گئے ہوئے تھے صلح کی بات چیت کرنے،حضور نے اپنے ایک ہاتھ کی طرف اشارہ کرکے فرمایا کہ یہ عثمان کا ہاتھ ہے اور دوسرے کی طرف اشارہ کرکے فرمایا یہ محمد کا ہاتھ ہے میں خود عثمان کی طرف سے بیعت لے رہاہوں لہذا وہ بہ طریق احسن اس بیعت میں شریک تھے۔اس غیر حاضری پر کروڑوں حاضریاں قربان ہو،بیعت الرضوان میں حضرت خضر و الیاس علیہما السلا م بھی شریک تھے جیساکہ ہم پہلے بیان کر چکے ہیں۔