باب :بارش مانگنے کابیان - مرآۃ المناجیح شرح مشکوٰۃ المصابیح - حدیث نمبر: 1497

۱∞؎یہ عبد الله ابن زیاد ابن عاصم ابن مازنی انصاری ہیں،خودبھی صحابی ہیں اور والدین بھی صحابی،آپ بدرمیں شریک نہ تھے، احد میں تھے، آپ نے وحشی کے ساتھ مل کر مسیلمہ کذاب کو قتل کیا،یہ عبد الله ابن زیاد ابن عبدربہ نہیں ہیں جنہوں نے اذان خواب میں دیکھی تھی،وہ بھی انصاری ہیں مگر وہ بیعت عقبہ اورجنگ بدر وغیرہ میں شریک ہوئے۔(مرقاۃ)۲؎اس سےمعلوم ہوا کہ نماز استسقاءنمازعید کی طرح جنگل میں پڑھی جائےباجماعت،اس میں قرأت بلند آوازسےہو۔بہتر یہ ہے کہ پہلی رکعت میں سورۂقٓاور دوسری میں غاشیہ پڑھی جائے بعدمیں خطبہ ہو،پھرقبلہ رخ ہوکر دعا مانگی جائے اور دعا میں اپنی چادر الٹی کی جائے کہ خدایا جیسے چادر کا رخ بدل گیا ایسے ہی موسم کا رخ بدل دے۔یہ تمام چیزیں سنت ہیں،ہاں سنت مؤکدہ نہیں کیونکہ حضورصلی الله علیہ وسلم نے کبھی یہ نماز ادا کی ہے،کبھی صرف دعامانگی۔امام اعظم کے سنیتسے انکاری کابھی یہی مطلب ہے۔خیال رہے کہ حضورصلی الله علیہ وسلم کی چادرشریف چارگزلمبی اور دوگز ایک بالشت چوڑی تھی۔جن روایات میں آیا ہے کہ آپ نے رکعت اول میں سات تکبیریں کہیں اور دوسری میں پانچ وہ سب ضعیف ہیں کیونکہ ان سب میں محمد ابن عبدالعزیز ابن عمر ابن عبدالرحمن ابن عوف ہے جسے بخاری نے منکر حدیث فرمایا اور نسائی نے متروک الحدیث کہا،ابوحاتم نے ضعیف الحدیث قرار دیااسی لیے ان احادیث پرکسی نےعمل نہیں کیا، نمازاستسقاءکی ہر رکعت میں ایک ایک ہی تکبیر ہوگی دیگر نوافل کی طرح۔