باب:کھانوں کا بیان - مرآۃ المناجیح شرح مشکوٰۃ المصابیح - حدیث نمبر: 4171

۱∞؎یعنی میدہ کھانا تو بہت دور کبھی ملاحظہ بھی نہ فرمایا۔الله کی شان ہے کہ اب مدینہ منورہ میں میدہ کی روٹی عام ہے آٹے کی روٹی بہت کم ملتی ہے اور کہتے ہیں میدہ کی روٹی بہت قسم کی ہوتی ہے مغربی،شامی وغیرہ۔
۲؎یعنی ظہور نبوت کے بعد میدہ کی روٹی ملاحظہ نہ فرمائی۔اس سے پہلے حضور انور نے شام کا سفر کیا ہے اور بحیرہ راہب کی دعوت میں میدہ کی روٹی ملاحظہ فرمائی ہے۔اس زمانہ میں شام و روم میں میدہ کی روٹی بہت مروج تھی۔بعد اعلان نبوت حضور حجاز میں رہے اور مال سے بے رغبتی بھی بہت رہی۔(مرقات)
۳؎سبحان الله!یہ ہے حضور کی سادہ اور بے تکلف زندگی۔
۴؎بعض روایات میں ہے کہ کسی صاحب نے ام المؤمنین عائشہ صدیقہ رضی الله عنہا سے تمنا کی کہ میں حضور انور صلی الله علیہ وسلم کا کھانا کھاؤں،آپ فرمانے لگیں تم نہ کھا سکو گے یہ تو ان کی ہی شان تھی جو کھا گئے اور واقعہ ہے کہ ہم گندم کی روٹی بے چھنے آٹے کی نہیں کھاسکتے چہ جائیکہ جو کی روٹی وہ بھی بے چھنے آٹے کی۔شعر
کھانا جو دیکھو جو کی روٹی بے چھنا آٹا روٹی بھی موٹی وہ بھی شکم بھر روز نہ کھانا صلی الله علیہ وسلم
جس کی تمنا روز نہ کھانا اک دن ناغہ اک دن کھانا جس دن کھانا شکر کا کرنا صلی الله علیہ وسلم
قبضہ میں جس کے ساری خدائی اس کا بچھونا ایک چٹائی نظروں میں کتنی ہیچ ہے دنیا صلی الله علیہ وسلم