باب:جہاد کی فرضیت کابیان - فیضان ریاض الصالحین - حدیث نمبر: 1350

لڑائی کو سورج ڈھلنے تک مُؤخر کرنے کی وجہ:عَلَّامَہ مُحَمَّد بِنْ عَلَّان شَافِعِی عَلَیْہِ رَحْمَۃُ اﷲ الْقَوِیفرماتے ہیں:”نبی پاکصَلَّی اﷲ تَعَالٰی عَلَیْہِ وَاٰلِہٖ وَسَلَّملڑائی کو سورج ڈھلنے تک اس لیے مؤخر فرماتے کہ اس وقت رحمت کی ہوائیں چلتی ہیں ،موسم ٹھنڈا ہوجاتا ہے،لڑنے والوں کو اسلحہ سےلیس ہونا آسان ہوجاتاہے، گھوڑوں پر سامنے سے حملہ کرنے اور پلٹ پلٹ کر حملہ کرنے میں دشواری نہیں ہوتی اور اس مدد کے ساتھ تائیدِ الٰہی بھی شامل ہوجاتی ہے ۔“
مُفَسِّرِشہِیر مُحَدِّثِ کَبِیْر حَکِیْمُ الْاُمَّت مُفتِی احمد یار خانعَلَیْہِ رَحْمَۃُ الْحَنَّانفرماتے ہیں:”چونکہ بیچ دوپہری میں کفار سورج کی پوجا کرتے ہیں اس لئے اس وقت نماز نہیں ہے اور حضور اس وقت جہاد بھی نہ کرتے تھے،سورج ڈھلے سورج کی پوجا ختم ہوجاتی ہے،نماز ظہر پڑھنے لگتے ہیں نمازیوں کے لئے دعائیں شروع ہوجاتی ہیں،دوپہری کی شدت جاتی رہتی ہے،قدرے ٹھنڈی ہوا بھی چلنے لگتی ہے اس لیے حضور (صَلَّی اﷲ تَعَالٰی عَلَیْہِ وَاٰلِہٖ وَسَلَّم)اس وقت جہاد فرماتے تھے۔“عَلَّامَہ بَدْرُ الدِّیْن عَیْنِی عَلَیْہِ رَحْمَۃُ اﷲ الْغَنِیفرماتے ہیں: ”سورج ڈھلنے کے بعدجنگ کرنے میں حکمت یہ ہےکہ جب سورج ڈھل جاتاہے تو ایسی ہوائیں چلنا شروع ہو جاتی ہیں جو جنگ میں مددگار ثابت ہوتی ہیں اورٹھنڈےوقت اور ہواؤں کے چلنے کی وجہ سے جنگ لڑنا آسان ہو جاتاہے کیونکہ جب جنگ میں گرمی آتی ہے تولڑنےوالوں کی حرکت اور اسلحہ کی وجہ سے گرمی اور حرارت مزید بڑھ جاتی ہے پھرجب شام کو ہوا چلتی ہے تو گرمی کو ٹھنڈاکر دیتی ہے ،لڑنے والوں کو فرحت وتازگی دیتی ہے اور ان کے جسموں کو ہلکا کر دیتی ہے بخلاف گرمی کی شدت کے وقت۔“جنگ کی ابتدا حکمتِ عملی سے کی جائے :شارِحِ بخاری علامہ سیدمحموداحمدرضویعَلَیْہِ رَحْمَۃُ اﷲ الْقَوِیفرماتے ہیں:”حضورعَلَیْہِ السَّلَامنے کفار سے جہاد میں انتظار فرمایا حتّٰی کہ سورج ڈھل گیا ۔یہ کوئی ضروری ضابطہ نہیں ہے کہ ایسا ضرور کیا جائے بلکہ مقصود یہ ہے کہ فوج کے کمانڈر کو حالات کے مطابق جنگ کی ابتدا کرنی چاہیےاور ایسی تدابیر اختیار کرنی چاہئیں کہ کھلے میدان میں موسمِ گرما میں مجاہدوں کو سورج کی سخت وشدید گرمی اور دیگر تکلیف دہ اُمور سے محفوظ رکھا جائے۔“