باب: سلام کرنے کی کیفیت کا بیان - فیضان ریاض الصالحین - حدیث نمبر: 851

میٹھے میٹھے اسلامی بھائیو!اس حدیث سےمعلوم ہوا کہ اگرمخاطب ایک ہوجب بھی بہتر یہ ہے کہ جمع کی ضمیرلائی جائے اور”ا َلسَّلَا مُ عَلَيْكُمْ“ کہا جائے کیونکہ اِس میں تعظیم زیادہ ہے اور اس طرح فرشتوں کو بھی سلام کی نیت کی جاسکتی ہے ۔ یہ بھی معلوم ہوا کہ سلام کے الفاظ جتنے زیادہ ہونگے اتنا ہی ثواب بھی زیادہ ہوگا۔ صرف’’ا َلسَّلَامُ عَلَيْكُمْ‘‘ کہا تو دس نیکیاں ملیں گی کیونکہ ہر نیکی کا ثواب دس گنا ملتاہے ۔اگر اس پراضافہ کیا اور”اَلسَّلامُ عَلَیْکُمْ وَرَحْمَۃُ اللّٰہ“ کہا توبیس نیکیاں ملیں گی،مزید اضافہ کیا اور’’اَلسَّلَامُ عَلَيْكُمْ وَرَحْمَةُ الله وَبَركَاتُهُ‘‘ کہا توتیس نیکیاں ملیں گی۔جواب دینے والے کوبھی چاہیے کہ کچھ الفاظ بڑھا کر جواب دے یعنی ”اَلسَّلَامُ عَلَيْكُمْ“کے جواب میں”وَعَلَیْکُمُ السَّلَامُ وَرَحْمَۃُ اللّٰہ“کہے اور’’اَلسَّلَامُ عَلَيْكُمْ وَرَحْمَةُ الله‘‘ کا جواب”وَعَلَیْکُمُ السَّلَامُ وَرَحْمَۃُ اللّٰہ وَبَرَکَاتُہُ“ کہہ کر دےاور”اَلسَّلَامُ عَلَيْكُمْ وَرَحْمَةُ الله وَبَركَاتُهُ“کے جواب میں’’وَعَلَیْکُمُ السَّلَامُ وَرَحْمَۃُ اللّٰہ وَبَرَکَاتُہُ‘‘ہی کہے اوران الفاظ سے زیادہ کچھ بھی نہ بڑھائے۔سلام کے مفہوم میں عمومیت:علامہ سید محموداحمدرضویعَلَیْہِ رَحْمَۃُ اللّٰہ الْقَوِیفرماتے ہیں:”حضورِاَقدسصَلَّی اللّٰہ تَعَالٰی عَلَیْہِ وَاٰلِہٖ وَسَلَّمنے دوستی اور پُرخُلوص تعلقات کے فروغ کے لیےجن کثیر آداب و مَراسِم کی ترغیب دی ہے ان میں ایک ’’سلام‘‘ بھی ہے۔اگرچہ دیگر اقوام میں بھی یہ طریقہ رائج ہے کہ جب دو اَشخاص ملتے ہیں یا ایک دوسرے کے گھر جاتے ہیں تو کسی اور گفتگوسےقبل کوئی لفظ یا فقرہ ایسا کہتے ہیں جودوستی اورتعارُف کوپیدا کرتا ہےلیکن لفظ ”سلام“کے مفہوم میں ہر طرح کی خیر و برکت، مسرت و راحت داخل ہے۔ اس میں نہ وقت کی قید ہے نہ زمانے کی۔”اَلسَّلَامُ عَلَیْکُمْ“ کہہ کر گویا ایک مسلمان دوسرے مسلمان کے حق میں بطورِدعا بہترین جذبات و خواہشات کا اظہار کرتا ہے۔اور اس کے ذیل میں دِین و دُنیا کی تمام راحتیں اور برکتیں آجاتی ہیں۔ الغرض اسلام کے ”سلام“میں جو وُسعت و عُمومیت ہے وہ دنیا کے کسی ضابطۂ تہذیب و نظامِ تمدن کے مقرر کردہ الفاظ میں نہیں ہے۔“مدنی گلدستہ’’سلام ‘‘کے4حروف کی نسبت سے حدیثِ مذکور اور اس کی وضاحت سے ملنے والے4مدنی پھول
(1) سلام کے الفاظ جتنے زیادہ ہوں گے نیکیاں بھی اتنی ہی بڑھ جائیں گی ۔
(2) دوستی اورپُرخُلوص تعلقات کے فَروغ کاایک اہم ذریعہ ایک دوسرے کو سلام کرنا بھی ہے ۔
(3) سلام کے مفہوم میں ہر طرح کی خیر و برکت داخل ہےاور اس میں وقت اور زمانے کی قید بھی نہیں۔
(4) جب کوئی مسلمان اپنے بھائی کو”اَلسَّلَامُ عَلَیْکُمْ“کہتا ہے تو گویا اس کے حق میں بطورِدعا بہترین جذبات و خواہشات کا اظہار کرتا ہے۔اللّٰہ عَزَّوَجَلَّہمیں زیادہ الفاظ کے ساتھ سلام کرنے اور اس کا جواب دینے کی توفیق عطا فرمائے۔آمِیْن بِجَاہِ النَّبِیِّ الْاَمِیْن صَلَّی اللّٰہ تَعَالٰی عَلَیْہِ وَاٰلِہٖ وَسَلَّمصَلُّوْا عَلَی الْحَبِیْب! صَلَّی اللّٰہ تَعَالٰی عَلٰی مُحَمَّد