یتیموں کے ساتھ حسن سلوک - فیضان ریاض الصالحین - حدیث نمبر: 260

بارگاہِ اِلٰہی میں غریب صحابہ کا مقام:حضرت سَیِدُنا ملا علی قاری عَلَیْہِ رَحْمَۃُ اللہِ الْبَارِی نےاِس حدیث پاک کی شرح میں جو کلام ذکر کیا اُس کا خلاصہ یہ ہے کہ کفار ِقریش کےسرداروں نے مکی مَدَنی سرکار صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم سے کہا : ’’اگر آپ چاہتے ہیں کہ ہم اِیمان لے آئیں اور آپ کے پاس حاضر ہوا کریں تو آپ اپنی بارگاہ سے اِن غریبوں اور فقیروں کو دُور کر دیں تاکہ یہ ہم سے (برابری کرنے اور) مخاطب ہونے کی جرأت نہ کریں۔ اِن کی بات سن کرحضور نبی پاک ، صاحب لَولاک صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم کے دِل میں خیال گزرا کہ اِن کفار کو اُلفت دینے کے لئے ظاہری طور غریب صحابہ کرام عَلَیْہِمُ الرِّضْوَان کو اِس طرح علیحدہ کر دیا جائے کہ وہ سردارانِ کفار کی موجودگی میں آپ کی بارگاہ میں حاضر نہ ہوں یا جب وہ سردارآپ کے پاس بیٹھیں تو یہ غریب صحابہ کرام عَلَیْہِمُ الرِّضْوَان اُٹھ کر چلے جائیں(کیونکہ یہ ایمان پر ثابت قدم ہیں جبکہ)اِس طرح کرنے سے ممکن ہے کہ کافر اِیمان لے آئیں لیکن رب تعالیٰ نے اِس طرح کرنے سے منع فرما دیا اورفقراء صحابہ کرام عَلَیْہِمُ الرِّضْوَان کے بارے میں اپنے حبیب صَلَّی اللہُ تَعَالٰی عَلَیْہِ وَاٰلِہٖ وَسَلَّم کی تربیت کرتےہوئے ارشاد فرمایا : ’’اے محبوب! اِن مسکین اور غریب صحابہ کو اپنی (کسی) مجلس سے علیحدہ نہ کریں کیونکہ یہ لوگ کسی دُنیوی لالچ سے نہیں بلکہ صِرف میری رضا کے لیے دن رات مجھے یاد کرتے ہیں اور
 
اُن کے شب روز میری عبادت و اِطاعت میں صَرف ہوتے ہیں۔ ‘‘( )مدنی گلدستہ
’’چل مدینہ‘‘کے7حروف کی نسبت سے حدیثِ مذکور
اور اس کی وضاحت سے ملنے والے7مدنی پھول(1) صحابہ کرام عَلَیْہِمُ الرِّضْوَان کا مقام ومرتبہ بارگاہِ ربُّ العزت میں بہت بلند ہے اگرچہ وہ غریب ہوں۔
(2) صحابہ کرام عَلَیْہِمُ الرِّضْوَان کے اِیمان ، اِخلاص اور تقویٰ وطہارت کی گواہی خود رب تعالیٰ نے دی۔
(3) صحابہ کرام عَلَیْہِمُ الرِّضْوَان کے اَوصاف کو بیان کرنا اللہ عَزَّوَجَلَّ کی سنت ہے۔
(4) کسی کی عزت اور مقام ومرتبے کا حقیقی معیار تقویٰ وپرہیزگاری ہے ، ظاہری حسن وجمال اور مال ودولت والا ہونے کا کوئی اعتبار نہیں ہے۔
(5) اِسلام میں حقوق کے اعتبار سے امیر وکبیر اور غریب وفقیر سب برابر ہیں۔
(6) امیر شخص کی وجہ سے کسی بھی غریب کی دل آزاری کرنے کی اِسلام میں قطعاًاجازت نہیں ہے۔
(7) غریب لوگوں کے حقوق کو خود اللہ عَزَّوَجَلَّ نے بیان فرمایا اور اُس کاخیال رکھنے کاحکم ارشاد فرمایا ہے۔
اللہ عَزَّوَجَلَّ ہمیں بھی غریبوں کا خیال رکھنے ، اُن کے حقوق کو اچھی طرح اَدا کرنے ، اُن کی دِل آزاری سے بچنے کی توفیق عطا فرمائے ، ہمیں بھی صحابہ کرام عَلَیْہِمُ الرِّضْوَان کے نقش قدم پر چلنے کی توفیق عطا فرمائے۔
آمِیْنْ بِجَاہِ النَّبِیِّ الْاَمِیْنْ صَلَّی اللہُ تَعَالٰی عَلَیْہِ وَاٰلِہٖ وَسَلَّم
صَلُّوْا عَلَی الْحَبِیْب! صَلَّی اللہُ تَعَالٰی عَلٰی مُحَمَّد