باب:جہاد کی فرضیت کابیان - فیضان ریاض الصالحین - حدیث نمبر: 1302

تلواروں سے مراد:مُفَسِّرشہِیرمُحَدِّثِ کَبِیْرحَکِیْمُ الْاُمَّت مُفتِی احمد یار خانعَلَیْہِ رَحْمَۃُ الْحَنَّانفرماتےہیں: ”(تلواروں کے سائے تلے جنت ہے)تلواروں سے مراد جہاد کے ہتھیار ہیں چونکہ اُس زمانہ میں جہاد میں زیادہ استعمال تلواروں کاہوتا تھا اس لیے خصوصیت سے تلواروں کا ہی ذکر فرمایا۔آج کل توپوں، بندوقوں، راکٹوں کا بھی یہ حال ہے کہ ان کے نیچے جنت ہے جبکہ وہ جہاد میں استعمال ہورہے ہوں۔ان تلواروں سے مراد یا تو کفار کی تلواریں ہیں جو وہ غازی مسلمانوں کے مقابل کھینچیں یعنی ان تلواروں سے جنت بہت قریب ہے کہ مسلمان شہید ہوا اور جنت میں پہنچا۔جیسے فرمایا گیا کہ جنت ماؤں کے قدموں کے نیچے ہے یا مراد خود مجاہدین کی اپنی تلواریں ہیں یعنی جب مجاہدین تلوار سونتے کفار پر ٹوٹ پڑتے ہیں تو گویا جنت ان تلواروں کے سایہ میں ہوتی ہے اور سایہ میں تو خود مجاہدین ہیں تو وہ اس وقت ہی جنت میں ہیں مگر پہلی توجیہ زیادہ قوی ہے۔“جہاد کی ترغیب:عَلَّامَہ مُحَمَّد بِنْ عَلَّان شَافِعِی عَلَیْہِ رَحْمَۃُ اﷲ الْقَوِیفرماتے ہیں:”امام قرطبیعَلَیْہِ رَحْمَۃُ اﷲ الْقَوِینے فرمایا:”جنت تلواروں کے سائے تلے ہے۔“یہ انتہائی نفیس کلام ہے ۔اس سے جہاں جہاد کی ترغیب دلائی گئی ہے وہیں اس پر ملنے والے ثواب کی بھی بشارت دی گئی ہےاور دشمن سے بڑھ چڑھ کر لڑنے پر ابھارا گیا ہے نیز جہاد میں تلواروں(یا اس طرح کے دیگر ہتھیاروں ) کے استعمال اور ان پر اعتماد کی طرف اشارہ کیا گیاہے اور یہ بتایا گیا کہ لڑنے والے مڈبھیڑکے وقت ایک دوسرے کے آمنے سامنے ہوتے ہیں حتّٰی کہ کسی کی تلوار دشمن پر پڑتی ہے اور کسی کی بلند ہوتی ہے گویا تلواروں نے لڑنے والوں پر سایہ کیا ہو۔مراد یہ ہے کہ تلوار سےلڑنے والا راہِ خدا میں ہے جواسے جنت میں داخل کردے گا۔“عَلَّامَہ مُلَّا عَلِی قَارِی عَلَیْہِ رَحْمَۃُ اللّٰہِ الْبَارِیفرماتے ہیں:”حدیث پاک سن کر اُس شخص کا تلوار کے میان کو توڑ کر پھینک دینا اس بات کی علامت تھی کہ وہ خود کو آخرت پر پیش کرنے کے بعد اب دنیا کی طرف رجوع کرنے کا ارادہ نہیں رکھتاچنانچہ وہ شخص لڑتا رہا یہاں تک کہ شہید ہوگیا۔“