باب:جہاد کی فرضیت کابیان - فیضان ریاض الصالحین - حدیث نمبر: 1307

راہِ خدا میں خیمہ یا خادم دینے سے مراد:مرآۃ المناجیح میں ہے: ”(بہترین صدقہ راہ ِ خدا میں خیمہ دینا ہے )اس طرح کہ مجاہدین کو بالکل یا عاریۃً خیمہ دے دیا جائے کہ وہ سفرِ جہاد میں اس کے سایہ میں بیٹھا کریں،اسی طرح حجاج کو عرفات وغیرہ میں خیمہ،شامیانہ لگادینا،اگر طلبا میدان میں بیٹھ کر پڑھتے ہوں مدرسہ کی عمارت نہ ہو ان کے لیے سایہ کا انتظام کردینا،جہاں مسجد نہ ہو وہاں نمازیوں کے لیے شامیانہ یا خیمہ لگادینا سب ہی اس میں داخل ہیں۔فُسطاط ہر چھوٹے بڑے خیمہ کو کہا جاتا ہے۔(راہِ خدا میں نر کی سواری)اس فرمانِ عالی کے دو معنیٰ ہوسکتے ہیں:ایک یہ کہ مجاہدین کے لیے جو اونٹنیاں ہوں انہیں حاملہ کرنے کے لیے نر اونٹ عاریۃً دے دینا کہ یہ بھی ثواب ہے اس سے جو اونٹ کی نسل چلے گی اس پر مجاہدین جہاد کریں گے اسے ثواب ملےگا۔دوسرے یہ کہ مجاہد کو سواری کے لیے عاریۃً اونٹ دے دینا۔شیخ عبدالحق مُحَدِّث دہلویعَلَیْہِ رَحْمَۃُ اﷲ الْقَوِیخادم عطیہ کرنے کی وضاحت کرتے ہوئے فرماتے ہیں:”اس سے مراد راہِ خدا میں خادم کا ہبہ کرنا اور تحفے میں دینا ہے یوں کہ خادم کسی مجاہد کے حوالے کردے تاکہ اس کی خدمت کرے یا مجاہدین کےحوالے کردے کہ ان کی خدمت اور اعانت کرے۔“