باب: مسجدوں اورنماز کے مقامات کابیان - مرآۃ المناجیح شرح مشکوٰۃ المصابیح - حدیث نمبر: 744

۱∞؎آپ بہت نوعمرصحابی ہیں،اپنے والد کے ساتھ حجۃ الوداع میں حضور کی خدمت اقدس میں حاضر ہوئے اس وقت آپ کی عمر سات سال تھی۔
۲؎حضرت سائب کا مسجدنبوی میں سونا یا اس لیے تھا کہ آپ مسافر تھےیا نیت اعتکاف کرلیتے تھےیا آپ جائز سمجھتے تھے۔بعض علماءمسجد میں سونے کو مکروہ کہتے ہیں،بعض بلاکراہت جائز،حضرت فاروق اعظم نے انہیں آواز دے کر نہ جگایا مسجد پاک کا احترام کرتے ہوئے۔
۳؎مسجدنبوی میں بلند آواز سے باتیں کرنے پر کیونکہ مدینہ والے یہاں کے آداب سے واقف ہیں تم لوگ پردیسی ہو مسائل سے پورے واقف نہیں۔اس سے معلوم ہوا کہ حاکم گناہ صغیرہ پربھی تعزیرًا سزا دے سکتا ہے،جہاں علم کی روشنی کم پہنچتی ہویابالکل نہ پہنچی ہو وہاں کے لوگوں کو بے علمی پرمعذور رکھا جاسکتا ہے،ورنہ بے علمی عذرنہیں۔خیال رہے کہ طائف حجاز کا مشہورشہر ہے،مکہ معظمہ سے تین منزل دورسیدنا عبداللہ ابن عباس کا مزار پرانوار وہیں ہے۔فقیرنے زیارت کی ہے۔
۴؎مرقاۃ نے فرمایا کہ مسجدنبوی کی حرمت دوسری مسجدوں سے زیادہ ہے کیونکہ حضور اپنی قبر شریف میں زندہ ہیں،وہاں حضور کا دربار ہے،اس کا ادب چاہیئے۔وہ حضرات دنیوی باتیں اونچی آواز سے کررہے تھے،ورنہ مسجد میں درس و تدریس،ذکر اللہ،نعت شریف وغیرہ بلند آواز سے کرسکتے ہیں،جب کہ نمازیوں کو تکلیف نہ ہو۔