باب: غنیمتوں کی تقسیم اور ان میں خیانت کرنے کا بیان - مرآۃ المناجیح شرح مشکوٰۃ المصابیح - حدیث نمبر: 4034

۱∞؎معلوم ہوتا ہے کہ خیبر میں چند حضرات شہید ہوئے تھے ہم نے خیبر میں سترہ شہداء خیبر کے مزارات کی زیارت کی جو تبوک سڑک پر واقع ہیں جن میں سے حضرت سلمہ ابن اکوع اور براء ابن بشر کے نام معلوم ہوسکے،باقی کے نام ہمارے مزور کو بھی معلوم نہ تھے۔والله اعلم!ان بزرگوں کا مطلب یہ تھا کہ یہ لوگ شہید ہیں اور فورًا جنت میں پہنچ گئے کیونکہ شہید کی روح مرتے ہی جنت میں پہنچ جاتی ہے اس لیے اسے شہید کہتے ہیں یعنی جنت میں حاضر ہوجانے والا۔
۲؎یعنی وہ شخص شہید تو ہے مگر جنت میں نہ پہنچا دوزخ کی آگ کی سزا پارہا ہے کیونکہ خیانت شہادت کے لیے مضر نہیں ثواب کے لیے نقصان دہ ہے۔
۳؎یعنی چونکہ اس نے غنیمت کے مال سے ایک چادر قبلِ تقسیم سے لے لی تھی لہذا وہ آگ کا عذاب پارہا ہے میں اسے آگ میں دیکھ رہا ہوں۔معلوم ہوا کہ حضور اس دنیا میں رہ کر عالم غیب کی بھی ہر چیز دیکھ رہے ہیں اور ہرشخص کے ہر کھلے چھپے عمل بھی ملاحظہ فرمارہے ہیں،کہ فرمایا وہ آگ میں ہے کیونکہ اس نے خیانت کی تھی،آگ میں ہونا عالم غیب کی خبر ہے اور خیانت یہاں کا چھپا ہوا عمل،یہاں آگ سے مراد دوزخ کی آگ ہے۔
۴؎یہاں جنت میں داخل ہونے سے مراد ہے اول داخلہ بغیر سزا بھگتے اور مؤمن سے مراد مؤمن کامل یعنی متقی مسلمان یعنی جنت میں اول داخلہ کامل مؤمن کو نصیب ہوگا جو ایمان و اعمال کا جامع ہو۔خیانت کرنے والا مؤمن اگرچہ شہید بھی ہوجاوے مگر اولًا جنت میں نہ جاسکے گا۔اس سے معلوم ہوا کہ وہ جو حدیث شریف میں ہے کہ شہید کے سارے گناہ معاف ہوجاتے ہیں وہاں حقوق الہیہ کے گناہ مراد ہیں انسانی حقوق کی معافی مراد نہیں لہذا احادیث میں تعارض نہیں۔