باب : میت پر رونے کابیان - مرآۃ المناجیح شرح مشکوٰۃ المصابیح - حدیث نمبر: 1728

۱∞؎یہ نہ پہچاننابھی شدت غم سے ہوگا ورنہ وہ تو اہل مدینہ سےتھی،آپ کو تو باہر کے اجنبی لوگ بھی پہچان لیتے تھے،گلی سے گزرتے تو گھروں والے خوشبو کی مہک سے پہچان جاتے،آپ کو تو کنکرپتھر،جن و انس،چاند تارے،سورج پہچانتے ہیں۔خیال رہے کہ جو کچھ اس نے کہا یہ لفظ کفر تھا کہ ا س میں حضورصلی الله علیہ وسلم کی توہین ہے،مگر چونکہ غم کی مدہوشی میں حضور صلی الله علیہ وسلم کو بغیر پہچانے کہا ہے اس لیے وہ اسلام سے خارج نہ ہوئی۔فقہاء فرماتے ہیں کہ اگر جانکنی کی شدت میں مرنے والے سے کوئی کفر کی بات سنی جائے تو اسے کافر نہ کہا جائے گا اس کی نماز جنازہ اور دفن ہوگا کیونکہ مدہوشی کا کفرمعتبرنہیں،اس کا ماخذ یہ حدیث ہے۔۲؎آئی معافی مانگنے،اس خیال میں تھی کہ شہنشاہ کونین کا آستانہ ہے،دروازۂ عالیہ پر بہت دربان ہوں گے نہ معلوم میں وہاں پہنچ سکوں یا نہیں اور معذرت کرسکوں یا نہیں،یا تو کہیں باہر کی تھی یا یہ خیال بھی اس غم کی مدہوشی میں تھا ورنہ مدینہ کی عورتیں آستانہ پاک پر حاضر ہوتی رہتی تھیں۔۳؎یعنی شروع صدمہ پر دل میں جوش ہوتاہے،اس وقت اس جوش کو روکنا بڑے بہادروں کا کام ہے۔صبر سے مراد کامل صبر ہے جس پر بہت ثواب ملے۔حضورصلی الله علیہ وسلم نے اس بی بی کو نہ اپنی بے ادبی سے توبہ کرائی اور نہ گزشتہ رونے پیٹنے سے کیونکہ وہ معذور تھی بلکہ آئیندہ کے لیے نصیحت فرمادی۔قبر پر جاکر رونا منع نہیں وہاں پیٹنا منع ہے۔