باب: صبح شام اور سوتے وقت کیا کہے - مرآۃ المناجیح شرح مشکوٰۃ المصابیح - حدیث نمبر: 2407

۱∞؎یعنی جسے جو دینی یا دنیاوی نعمت ملی بلاواسطہ یا بالواسطہ وہ تیری ہی طرف سے ہے۔اس دعا میں اس آیت کی طرف اشارہ ہے "وَمَا بِکُمۡ مِّنۡ نِّعْمَۃٍ فَمِنَ اللّٰهِ"۔خیال رہے کہ نعمت و مصیبت سب اللّٰه تعالٰی ہی کی طرف سے ہے مگر ادب یہ ہے کہ نعمتوں کو ر ب کی طرف نسبت دو اور مصیبت کو اپنی طرف،رب تعالٰی فرماتا ہے:"وَ مَاۤ اَصَابَکُمۡ مِّنۡ مُّصِیۡبَۃٍ فَبِمَا كَسَبَتْ اَیۡدِیۡکُمْ"۔
۲؎یعنی حقیقی حمد اور حقیقی شکر تیرے ہی ہیں کہ حقیقی منعم تو ہی ہے،تیرے سواء جس کا بھی شکر و حمد ہوں گے وہ مجازی ہوں گے لہذا یہ دعا قرآن کریم کی اس آیت کے خلاف نہیں"اَنِ اشْکُرْ لِیۡ وَ لِوَالِدَیۡكَ"میرا اور اپنے ماں باپ کا شکر یہ ادا کرو کہ وہاں ماں باپ کا شکریہ مجازی مراد ہے۔
۳؎یعنی صبح شام اس دعا کے پڑھنے والوں کو توفیق ملے گی کہ رب تعالٰی کی نعمتوں کا شکریہ ادا کریں اور اگر شکریہ میں کچھ کوتاہی ہوگئی تو رب تعالٰی اس کی برکت سے وہ کمی پوری فرمادے گا،یہ مطلب نہیں ہے کہ نماز،زکوۃ،روزہ کچھ نہ کرو صرف یہ دعا پڑھ لیا کرو کیونکہ ساری عبادتیں رب کا شکریہ ہیں اور شکریہ تو اس دعا سے پورا ہوگیا اب اور شکر کی کیا ضرورت ہے۔غرضکہ حدیث صاف ہے۔بعض علماء فرماتے ہیں کہ شکریہ دلی بھی ہوتا ہے،زبانی بھی،یہاں شکر سے مراد قولی شکر ہے یعنی ان کلمات میں ایسا ثواب ملے گا جیسے کوئی دن بھر زبانی شکریہ ادا کرتا رہے،رہا عملی شکریہ وہ اس کے علاوہ ہے۔
۴؎اسے نسائی نے انہی عبداللّٰہ ابن غنام سے روایت کیا اور ابن حبان و ابن سنی نے حضرت ابن عباس سے رضی اللّٰہ تعالٰی عنہم۔