باب : قیامت کی علامتوں کا بیان - مرآۃ المناجیح شرح مشکوٰۃ المصابیح - حدیث نمبر: 5456

۱∞؎اس خلیفہ کا نام معلوم نہیں ہوسکا مگر یہ آخری خلیفہ ہوگا جس کے بعد امام مہدی خلیفہ ہوں گے پارلیمنٹ کے ممبروں میں اختلاف ہوگا کہ کسے خلیفہ چنیں۔۲؎یعنی جس شہر میں اس خلیفہ کا انتقال ہوگا اور جہاں دوسرے خلیفہ کا چناؤ ہونے والا ہو گا وہاں ہی یہ صاحب رہتے ہوں گے،وہ اس خوف سے سب سے نکل جاویں گے کہ لوگ انہیں ہی خلیفہ نہ چن لیں سلطنت سے نفرت کرتے ہوئے نکلیں گے۔جو حکومت سے متنفر ہو اس کا حاکم بننا مبارک ہوتا ہے اور جو حکومت کا طالب ہو اس کا حاکم بننا فساد کا باعث ہے۔یہاں مدینہ منورہ سے مراد یا مدینہ منورہ ہے یا وہ شہر جہاں خلیفہ کا چناؤ ہورہا ہوگا مگر خیال رہے کہ وہ خلیفہ مدینہ منورہ میں نہیں ہوگا جس کا انتقال ہوا ہوگا۔خلافت عثمان کے بعد ہی مدینہ منورہ سے خلافت منتقل ہوچکی حضرت امیر معاویہ کی یہ پیشگوئی درست ہوئی کہ مدینہ میں خلیفہ کا قتل ہوا اب مدینہ سے خلافت منتقل ہوگئی۔چنانچہ اب تک کوئی خلیفہ مدینہ منورہ میں نہیں رہا نہ آئندہ رہنے کی امید ہے۔۳؎یعنی وہ مکہ مکرمہ میں کسی گھر میں تشریف فرما ہوں گے لوگوں سے چھپے ہوئے مگر لوگ یعنی مکہ والے ان کے دروازے پر پہنچ کر انہیں تقاضا کرکے باہر لائیں گے اور ان کے ہاتھ شریف یہ جبرًا بیعت کریں گے اور انہیں اپنا خلیفہ مان لیں گے۔۴؎غالبًا یہ بیعت کعبہ معظمہ کے حطیم شریف میں واقع ہوگی کہ حطیم شریف سنگ اسود اور مقام ابراہیم کے درمیان آجاتی ہے۔(مرقات)۵؎یعنی اس شام کا بادشاہ کوئی کافر ہوگا،جب اسے ان کی خلافت کا پتہ لگے گا تو وہ ان سے جنگ کرنے کے لیے ایک بڑا لشکر بھیجے گا،اس لشکر کا نام لشکر سفیانی ہوگاکہ یہ لوگ خالد ابن یزید ابن ابی سفیان کے اولاد سے ہوں گے یہ شخص یعنی خالد دراز سر چیچک رو سفید آنکھ والا تھا،یہ لشکر ایک چٹیل میدان میں زمین میں غرق ہوجاوے گا۔یہ میدان حرمین طیبین کے درمیان ہے،یہ وہ میدان نہیں جو ذوالحلیفہ کے سامنے مدینہ منورہ میں ہے ۔(مرقات)اس لشکر میں صرف ایک شخص بچے گا جو ان کی ہلاکت کی خبر لوگوں تک پہنچائے گا۔۶؎یعنی حضرت امام مہدی کی یہ کرامت جب لوگوں میں مشہور ہوگی تو شام کے ابدال اور عراق کی جماعتیں ان کی خدمت میں حاضر ہو کر آپ سے بیعت کریں گی۔ابدال اولیاء الله کی ایک جماعت ہے جن کی تعداد ستر۷۰ ہے چالیس شام میں اور تیس دوسرے مقامات میں رہتے ہیں،جب ان میں سے کوئی وفات پاتا ہے تو عام مسلمانوں میں سے کسی کو اس کی جگہ مقرر کردیا جاتا ہے اس لیے انہیں ابدال کہتے ہیں۔حضرت معاذ ابن جبل فرماتے ہیں کہ جس میں رضا بالقضاء ،بری باتوں سے زبان روکنا،الله کے لیے غصہ کرنا پایا جاوے وہان شاءاللهابدال میں داخل ہوگا،امام غزالی احیاء العلوم میں فرماتے ہیں کہ جو شخص روزانہ تین بار یہ دعا پڑھ لیا کرے توان شاءاللهابدال میں سے ہوگا۔اللھم اغفر لامۃ محمد،اللھم ارحم امۃ محمد،اللھم تجاوز عن امۃ محمد۔عراق سے بھی اولیاء اﷲکی جماعت آکر امام مہدی سے بیعت کرے گی۔(اشعہ)۷؎یعنی یہ خبیث انسان اپنے ماموں نبی کلب کی مدد لے کر جناب امام مہدی کے مقابلہ میں لشکر بھیجے گا تو امام مہدی کے لشکر والے اس لشکر پر فتح پائیں گے۔یہ لوگ شکست فاش پائیں گے۔۸؎یعنی امام مہدی لوگوں میں سنت رسول الله صلی الله علیہ و سلم کو پھیلائیں گے،ان سے سنت پر عمل کرائیں گے دنیا میں بڑی برکات ہوں گی۔۹؎جرانجیم کے کسرہ ر کے فتحہ سے اونٹ کی گردن،جب اونٹ اطمینان سے زمین پر بیٹھتا ہے تو اپنی گردن بچھا دیتا ہے۔مطلب یہ ہے کہ ان کے زمانہ میں جنگ جدال وغیرہ بند ہو جاویں گے،لوگوں کو امن نصیب ہوگا،اسلام کی بہت اشاعت ہوگی،استقامت اسلام کو سمجھانے کے لیے یہ فرمایا گیا۔۱۰؎یعنی امام مہدی خلیفہ بننے کے بعد سات سال خلافت کریں گے پھر آپ کی وفات ہوگی یہ پتہ نہیں چلا کہ وفات کہاں ہوگی۔شیعہ کہتے ہیں کہ حسن عسکری کے بیٹے محمد امام مہدی ہیں جو پیدا ہوچکے ہیں اور غائب ہوگئے ہیں قریب قیامت ظاہر ہوں گے،یہ عقیدہ محض باطل ہے۔خیال رہے کہ صوفیاء کی اصطلاح میں اولیاء اﷲکے طبقات و تعداد مختلف ہیں۔چنانچہ ہمیشہ دنیا میں ایک قطب ہوگا اور چار اوتاد،چالیس یا ستر ابدال،تین سو یا پانچ سو نقیب،بعض کے نزدیک پانچ امناء یانجباء بھی ہیں،ان کے کام و نام کتب صوفیاء میں ملاحظہ کرو۔زمانہ تابعین میں اویس قرنی قطب الوقت تھے،پھر حضور شیخ عبدالقادر جیلانی بالاتفاق قطب ہیں۔(مرقات)ان حضرات کی تعداد میں اختلاف ہے۔اس کی بحث آخر کتاب میں آوے گیان شاءاﷲ تعالیٰ،غوث اعظم قطب عالم غالبًا ایک ہی ولی کا نام ہے،الله تعالٰی کے فیوض باطنی قطب عالم پر نازل ہوتے ہیں پھر قطب عالم کی طرف سے عالم میں بقدر ظرف تقسیم ہوتے ہیں،چاروں سمتوں میں رہتے ہیں مشرق،مغرب،جنوب،شمال،یہ حضرات قطب سے فیض لے کر اپنے علاقے میں تقسیم کرتے ہیں۔(مرقات)خیال رہے کہ یہ فیوض باطنی کا حال ہے مسائل فقیہہ صوفیاء کے کشف سے ثابت نہیں ہوتے اگرچہ وہ حضرات حضور صلی الله علیہ و سلم سے ہی نقل فرمادیں کیونکہ شریعت کے دلائل کتاب و سنت ہیں نہ کہ صرف کشف ۔(مرقات)ہاں کشف سے فقہی مسئلہ کی تائید ہوسکتی ہے۔