باب فیصلوں میں عمل کرنا اور ان سے ڈرنا - مرآۃ المناجیح شرح مشکوٰۃ المصابیح - حدیث نمبر: 3736

۱∞؎اس حدیث نے ان تمام حدیثوں کی شرح کردی جن میں قضا کی برائیاں ارشاد ہوئیں یعنی خود کوشش کرکے قاضی و حاکم بننے والا۔
۲؎عدل کے ظلم پر غالب آنے کے معنی یہ ہیں کہ حاکم کا انصاف اس کے ظلم پر اس طرح غالب آجائے اور اس کی طبیعت پر ایسا چھاجائے کہ اسے ظلم نہ کرنے دے،یہ مطلب نہیں کہ وہ عدل بھی کرتاہو اور ظلم بھی مگر عدل زیادہ کرتاہو اور ظلم کم کیونکہ ایک ظلم بھی ظالم کا بیڑا غرق کرنے کے لیے کافی ہےلہذا حدیث بالکل واضح ہےاس پر کوئی اعتراض نہیں۔(لمعات و اشعۃ اللمعات)یہ توفیق اس حاکم کو ملتی ہے جو حکومت سے متنفر ہو رب کی طرف سےاسے حاکم بننا پڑجائے۔
۳؎ظلم کے عدل پر غالب ہونے کی دوصورتیں ہیں:ایک یہ کہ ظلم اس کی عادت بن جائے وہ کبھی انصاف کرے ہی نہیں۔دوسرے یہ کہ ظلم زیادہ کرے انصاف کم،یہ دونوں حاکم دوزخی ہیں۔خیال رہے کہ ایک ظلم بھی کیفیت کے لحاظ سے ہزار انصاف پر غالب ہے اگرچہ کمیت کے لحاظ سے کم ہے،ایک قطرہ پیشاب سارے کنویں کو ناپاک کردیتاہے،یہاں غلبہ ظلم سے مراد کیفیت کاغلبہ ہے لہذا یہ خبر بھی واضح ہے۔شارحین نے اس حدیث کی اور بہت توجیہیں کی ہیں مگر یہ توجیہ قوی ہے۔بعض نے کہا ہے کہ عدل سے مراد اجتہاد کی صحت ہے اور ظلم سے مراد اجتہاد کی غلطی ہے جس حاکم کا اجتہاد و استنباط زیادہ ترکتاب و سنت کے خلاف ہوتاہو بہت کم درست ہوتاہو وہ حاکم نہ بنے اگر بنے گا اور اپنے غلط اجتہاد سے فیصلے کرے گا تودوزخی ہوگا۔مرقات نے اسے ترجیح دی ہے اس کی تائیدگزشتہ حدیث سے ہورہی ہے کہ جو حاکم جاہل ہوکر فیصلے کرے وہ دوزخی ہے۔