باب : مقتدی پر پیروی واجب ہونے اور مسبوق ہونے كا حکم - مرآۃ المناجیح شرح مشکوٰۃ المصابیح - حدیث نمبر: 1140

۱∞؎فقہاء فرماتے ہیں کہ اذان کے بعد کسی خاص شخص کو دروازے پر جا کر نماز کی اطلاع دینا ممنوع ہے سوائے سلطان اسلام اور اس عالم دین کے جو ہر وقت دینی مشاغل میں رہتا ہے اس مسئلے کا ماخذ یہ حدیث ہے۔
۲؎آپ نے ۱۷ نمازیں پڑھائیں ہیں۔اس سے چند مسئلے معلوم ہوئے:ایک یہ کہ بعد انبیاءافضل الخلقابوبکر صدیق رضی الله عنہ ہیں کیونکہ امام افضل ہی کو بنایا جاتا ہے۔دوسرے یہ کہ بعد رسول الله صلی الله علیہ وسلم خلافت کے آپ ہی مستحق ہیں کیونکہ،یہ امامت اصغریٰ امامت کبریٰ کی دلیل ہے گویا حضور صلی الله علیہ وسلم نے عملی طور پر آپ کو اپنا خلیفہ بنادیا خلافت صرف قول سے ہی نہیں ہوا کرتی اسی لیئے تمام صحابہ خصوصًا حضرت علی مرتضیٰ نے فرمایا کہ صدیق کو رسول الله نے ہمارے دین کا امام بنادیا تو ہم نے انہیں اسی دنیا کا امام بنالیا۔تیسرے یہ کہ امامت کا مستحق پہلے عالم ہے پھر قاری۔چوتھے یہ کہ ابوبکر صدیق تمام صحابہ میں بڑے عالم ہیں۔(ازمرقاۃ و مدارج النبوۃ)
۳؎وہ دو شخص حضرت عباس و علی مرتضی ہیں یا حضر ت عباس و اسامہ یا حضرت عباس و فضل ابن عباس۔(مرقات)اور ہوسکتا ہے کہ ایک جانب حضرت عباس اول سے آخر تک رہے ہوں اور دوسری جانب باری باری سے یہ حضرات۔شیخ نے فرمایا کہ انبیاء کرام پر یہ بیماریاں اور کمزوریاں بشریت کے عوارض میں سے ہیں۔
۴؎اس سے چند مسئلے معلوم ہوئے: ایک یہ کہ ان نمازوں میں تمام صحابہ خصوصًا صدیق اکبر کا منہ کعبہ کی طرف تھا اور دل حضور صلی الله علیہ وسلم کی طرف،زبان قرآن میں مصروف تھی اور کان جناب مصطفے کی طرف اس سے ان کی نماز زیادہ کامل ہوئی ورنہ نماز کے خشوع میں کسی کی آہٹ کیسے سنی جاسکتی ہے۔دوسرے یہ کہ صدیق اکبر عین نماز میں خصوصًا حضور صلی الله علیہ وسلم کا ادب کرتے تھے کہ ادبًا پیچھے ہٹ کر مقتدی بننے لگے یہ ادب شرک نہ تھا بلکہ کمال توحید۔تیسرے یہ کہ صدیق اکبر نماز کی حالت میں حضور صلی الله علیہ وسلم کے احکام بلکہ اشاروں کی اطاعت کرتے تھے کہ اشارہ پا کر کھڑے رہے کیوں نہ ہو کہ نماز بھی انہیں کی اطاعت ہے۔
۵؎امام بن کر نہ کہ مقتدی ہو کر ورنہ داہنی جانب بیٹھتے۔معلوم ہوا کہ حضور صلی الله علیہ وسلم کی آمد سے تمام کی امامتیں منسوخ ہوجاتی ہیں کیوں نہ ہو کہ حضور صلی الله علیہ وسلم کی آمد پر تو انبیاء کی امامت کبریٰ یعنی نبوت منسوخ ہوگئی۔
۶؎اس طرح کہ ابوبکر صدیق لوگوں کو حضور صلی الله علیہ وسلم کی تکبیریں پہنچاتے تھے۔اس کا یہ مطلب نہیں کہ اس نماز کے دو امام تھے کیونکہ حضور صلی الله علیہ وسلم کی آوا ز بوجہ ضعف دور تک نہ پہنچ سکتی تھی۔فقہاء فرماتے ہیں اگر امام بہت کمزور ہویا پیچھے مجمع زیادہ ہو تو مؤذن یا دیگر مقتدی امام کی تکبیریں لوگوں تک پہنچائیں اس کاماخذ یہ حدیث ہے۔