باب: بُھوک اور ترکِ خواہِشَات کی فضیلت کا بیان - فیضان ریاض الصالحین - حدیث نمبر: 508

سُبْحٰنَ اللہ!کیسی سادگی و عاجزی تھی ان اسلام کے شیدائیوں میں پاؤں میں جوتے ہیں نہ موزے، سر ڈھانپنے کے لیے ٹوپی ہے نہ تن پر قمیص مگر وہ اس حالت میں بھی خوش ہیں، ہر وقت اپنےنبی کے فرمان پر لبیک کہتے ہیں ، اپنے بھائیوں کی خبر گیری کرتے ہیں ،ہر حال میں اپنے رب سے راضی رہتے ہیں ، کبھی زبان پر شکوۂ رنج واَلَم نہیں لاتے، کیوں نہ ہو تربیت یافتہ بھی تو کس کے ہیں! اس سردار دوجہاں کے جس نے خود انتہائی سادہ زندگی گزاری، چاہتے تو دنیا جہان کی دولت قدموں میں ڈھیرہوجاتی مگراسے پسند نہ فرمایا، ہر طرح کی آسائش و آرام طلبی سے بالکل کنارہ کش رہے، جب ان حضرا ت نے اپنے رہبر ورہنما کو اس سادگی سے رہتے دیکھا تووہ کیسے لذّات و خواہشات کی طرف مائل ہوتے ،کیسے ہوسکتاتھاکہ سردارِدوجہاں ان کے سامنے چٹائی کا بستر استعمال فرماتے اوروہ ریشم ودیباج کے طلبگار ہوتے۔ ان پاک ہستیوں نے اپنی ساری زندگی اپنے پیارے نبیصَلَّی اللہ تَعَالٰی عَلَیْہِ وَاٰلِہٖ وَسَلَّمکی پیروی میں گزاردی۔اللہ عَزَّ وَجَلَّانہیں اچھی جزا عطا فرمائے اور ہمیں بھی ان کے نقش قدم پر چلنے کی توفیق عطا فرمائے۔آمینمسلمانوں کی خبر گیری :حدیثِ مذکور سے معلوم ہواکہ اپنے متعلقین کی دیکھ بھال اور خبر گیری کرنی چاہیے،اگر دور ہوں تو ان کےحالات سے باخبر رہنا چاہیے،بیمار ہوجائیں تو عیادت کرنی چاہیے، دوسروں کو بھی اس کی ترغیب دینی چاہیے،یہ بھی معلوم ہواکہ بزرگوں کی ترغیب پر فوراًنیک کام کے لئے تیار ہوجانا چاہیے۔مدنی گلدستہ’’ صدیق و عمر ‘‘کے8حروف کی نسبت سے اَحادیثِ مذکور ہ اور ان کی وضاحت سے ملنے والے8مدنی پھول
(1) حضورنبی کریمصَلَّی اللہ تَعَالٰی عَلَیْہِ وَاٰلِہٖ وَسَلَّمکا بستر مبارک نرم وملائم نہ تھا بلکہ سخت اور کھردرا تھا ، نرم وملائم بستر آپصَلَّی اللہ تَعَالٰی عَلَیْہِ وَاٰلِہٖ وَسَلَّمکو پسند نہ تھا ۔
(2) جب کوئی بزرگ کسی نیک کام کی ترغیب دلائیں تو حتی المقدور اس کام کو سرانجام دینے کے لیے فوراً تیار ہوجاناچاہئے۔
(3) مریض کی عیادت کرنا سنت ہے۔
(4) جب کسی کی عیادت کے لیے جائیں تو اپنے دوستوں کو بھی لے جائیں جبکہ مریض اور اس کے اہلِ خانہ کے لیے پریشانی کا باعث نہ ہو۔
(5) ہمارے پیارے نبیصَلَّی اللہ تَعَالٰی عَلَیْہِ وَاٰلِہٖ وَسَلَّمسے جب بھی کوئی چیز ما نگی جاتی آپ انکا ر نہ فرماتے چاہے وہ چیز آپ کو کتنی ہی محبوب ہوتی عطا فرما دیتے ۔
(6) ایک مسلمان کا دوسرے مسلمان پر حق ہے کہ جب وہ موجود نہ ہو تو اس کی خبر گیری کرے اور بیمار ہو جائے تو اس کی عیادت کرے۔
(7) ہر حا ل میں اپنے رب سے خوش رہنا ،زبان پر شکوۂ رنج والم نہ لانا بلند ہمتی کی علامت ہے ۔
(8) اپنے متعلقین کی خبر گیری کرنا ہمارے پیارے آقاصَلَّی اللہ تَعَالٰی عَلَیْہِ وَاٰلِہٖ وَسَلَّمکی سنت مبارکہ ہے۔اللہ عَزَّ وَجَلَّہمیں اپنی زندگی سنتوں کے مطابق گزارنے کی توفیق عطا فرمائے۔آمِیْن بِجَاہِ النَّبِیِّ الْاَمِیْن صَلَّی اللہ تَعَالٰی عَلَیْہِ وَاٰلِہٖ وَسَلَّمصَلُّوْا عَلَی الْحَبِیْب! صَلَّی اللہ تَعَالٰی عَلٰی مُحَمَّد