باب : صبر کا بیان - فیضان ریاض الصالحین - حدیث نمبر: 44

اُمِّ سُلیم حضرتِ سَیِّدَتُنا رُمَیصَاءرَضِیَ اللہ تَعَالٰی عَنْہَاجنت میںاُمِّ سُلَیْم کا نام رُمَیْصَاء تھا پیارے آقا، مکّی مَدَنی مصطفٰے صَلَّی اللہ تَعَالٰی عَلَیْہِ وَاٰلِہٖ وَسَلَّم نے فرمایا :میں نے (شبِ معراج ) خود کو جنت میں دیکھا تو وہاں ابوطلحہ رَضِیَ اﷲ تَعَالٰی عَنْہُ کی زوجہ رُمَیْصَاء رَضِیَ اللہ تَعَالٰی عَنْہَا کو دیکھا ۔(بخاری،کتاب فضائل اصحاب النبی ، باب مناقب عمر بن الخطاب، ۲/ ۵۲۵، حدیث:۳۶۷۹)
حضرتِ سَیِّدُنا اَبو طلحہ رَضِیَ اللہ تَعَالٰی عَنہُ کے فوت ہونے والے صاحبزادے کا نام ’’اَبُو عُمَیْر‘‘تھا ،اس وقت وہ دودھ پیتے بچے تھے ایک چھوٹی چڑیا ان سے بہت مانوس تھی، ان کے ساتھ کھیلتی تھی۔نبیِّ اکرم صَلَّی اللہ تَعَالٰی عَلَیْہِ وَاٰلِہٖ وَسَلَّم جب ا ن کے گھر تشریف لے جاتے تو ارشاد فرماتے :’’یَا اَبَا عُمَیْر!مَا فَعَلَ النُّغَیْرُ‘‘ یعنی اے اَبُو عُمَیْر ، نُغَیْر (پرندے) نے کیا کیا؟ (بخاری، کتاب الادب، باب الانبساط الی الناس …الخ، ۴/۱۳۴،حدیث:۶۱۲۹)بچے کاعقیقہ کرنااور نام رکھناعَلَّامَہ ابُوالْحَسَناِبْنِ بَطَّال رَحْمَۃُ اللہ تَعَالٰی عَلَیْہ شرح بخاری میں فرماتے ہیں :’’ حضرتِ سَیِّدُنا مُہَلَّب عَلَیْہِ رَحْمَۃُ الرَّب فرماتے ہیں :اگر بچے کا باپ پیدائش کے ساتویں دن اس کا عقیقہ کرنے کا ارادہ نہ رکھتا ہوتو بچے کی پیدائش کے دن یا ایک دو دن بعد اس کا نام رکھنا جائز ہے اور اگر وہ (ساتویں دن) بچے کا عقیقہ کرنا چاہتا ہے تو اسے چاہیے کہ عقیقہ کے دن تک نام نہ رکھے (بلکہ عقیقہ کے دن نام رکھے)جیسا کہ حضرتِ سَیِّدُناسَمُرَہ بِنْ جُنْدُب رَضِیَ اللہ تَعَالٰی عَنہُ سے مروی ہے کہ رَسُوْلُ اللہ صَلَّی اللہ تَعَالٰی عَلَیْہِ وَاٰلِہٖ وَسَلَّم نے فرمایا :لڑکا اپنے عقیقہ میں گِروی ہے ساتویں دن اس کی طرف سے جانور ذَبح کیا جائے اور اُس کا نام رکھا جائے اور سر مونڈا جائے۔ (ترمذی، کتاب الاضاحی، باب العقیقۃ بشاۃ، ۳/۱۷۷، حدیث:۱۵۲۷) مز ید فرماتے ہیں کہ حضور صَلَّی اللہ تَعَالٰی عَلَیْہِ وَاٰلِہٖ وَسَلَّم نے اس بچے کو کھجور کی گھٹی دی کیونکہ یہ اس درخت کا پھل ہے جسے اللہ عزَّوَجَلَّ نے مومن سے تَشْبِیْہ دی اور اس کی مٹھاس کو بھی مومن سے تَشْبِیْہ دی اسلئے کھجور سے گھٹی دینی چاہیے ۔ (شرح بخاری لابن بطال، کتاب العقیقۃ، باب تسمیۃ المولود غداۃ …الخ، ۵/۳۷۳)
نوٹ: عقیقے کے بارے میں مزید معلومات کے لئے ’’شیخِ طریقت امیر اہل سنت بانیِ دعوتِ اسلامی حضرتِ علامہ مولانا ابو بلال محمد الیاس عطار قادری رضوی دَامَتْ بَرَکَاتُہم الْعَالِیَۃ‘‘ کا رسالہ’’ عقیقے کے بارے میں سوال جواب‘‘ اور مکتبۃ المدینہ کی مطبوعہ کتاب ’’بہارِ شریعت‘‘ جلد سوم ، حصہ ۱۵، عقیقہ کا بیان کا مطالعہ کیجئے۔پہلے سے بہتر جزاعلامہ بَدْرُالدِّیْن عَیْنِی عَلَیْہِ رَحْمَۃُ اللہ الْغَنِی عمدۃ القاری شرح بخاری میں فرماتے ہیں :’’اس حدیث سے بہت سے فائدے حاصل ہوئے،(۱) مصیبت کے وقت غم کا اظہار نہیں کرنا چاہیے جیساکہ اُمِّ سُلَیْم رَضِیَ اللہ تَعَالٰی عَنْہانے صبر کیا اور اپنے نفس پر غالب رہیں۔(۲) اس حدیث میں حضرتِ سَیِّدَتُنا اُمِّ سُلَیْم رَضِیَ اللہ تَعَالٰی عَنْہَا کے عظیم صبر اور ان کے راضی بقضاء (تقدیر پر راضی)رہنے کی تعریف ہے۔ (۳) ضرورت کے وقت توریہ( ) کرنا جائز ہے اور توریہ کے جائز ہونے کی شرط یہ ہے کہ اس سے کسی مسلمان کا حق زائل نہ ہو۔(۴)عورت کا اپنے شوہر کی خواہش کے لئے بننا سنورنا جائز ہے ۔(۵)جو اپنی محبوب چیز چلی جانے پر رضائے الٰہی کے لئے صبر کرے تو اللہ عزَّوَجَلَّ اسے پہلے سے بہتر شے عطا فرماتا ہے جیسا کہ حضرتِ سَیِّدُنا ابو طلحہ رَضِیَ اللہ تَعَالٰی عَنہُ کا ایک بیٹا فوت ہوا تو ان کی اولاد میں نو بیٹے ہوئے جو سب کے سب قراٰن کے قاری تھے ۔ (۶)جو رخصت کو چھوڑنے پر قادر ہو اُسے چاہیے کہ وہ عزیمت پر عمل کرے کیونکہ اس سے بندہ بلند درجات اور اجرِ عظیم پاتا ہے ۔(۷) ہمارے پیارے نبی صَلَّی اللہ تَعَالٰی عَلَیْہِ وَاٰلِہٖ وَسَلَّم کی دعا ئیں بارگاہ الٰہی میں مقبول و مستجاب ہیں۔‘‘ (ملخصاًعمدۃ القاری، بخاری،۶/۱۳۶، تحت الحدیث:۱۳۰۱)کھجور کی گھٹی مستحب ہےعلامہ اَبُوزَکَرِیَّا یَحْیٰ بِنْ شَرَف نَوَوِی عَلَیْہِ رَحْمَۃُ اللہ الْقَوِی شرح مسلم میں فرما تے ہیں : ’’علمائےکِرام رَحِمَھُمُ اللہ السَّلَام کا اس بات پر اتفاق ہے کہ بچے کی ولادت کے وقت اسے کھجور کی گھٹی دینا مستحب ہے اگر کھجور میسر نہ ہو تو اس کے علاوہ کسی میٹھی چیز سے دی جائے ۔ گھٹی دینے والا کھجور کو چبائے یہاں تک کہ وہ نرم ہو جائے اور بچے کے نگلنے کے لائق ہو جائے تو پھر بچے کا منہ کھول کر اس کے منہ میں رکھ دی جائے۔ مستحب یہ ہے کہ گھٹی دینے والا نیک و متقی شخص ہو کہ جس سے لوگ فیض حاصل کرتے ہوں خواہ وہ نیک شخص آدمی ہو یا عورت ، اگر ولادت کے وقت وہاں کوئی نیک شخص موجود نہ ہو تو پھر بچے کو اس کے پاس لے جایا جائے۔ اس حدیث میں اُمِّ سُلَیْم کے عظیم صبر، تقدیر پر راضی رہنے اور عقل و دانشمندی جیسے اوصاف کا ذکر ہے کہ انہوں نے صبر اور اللہ عزَّوَجَلَّ کی رضا پرراضی ہونے کا اظہار کیااور اپنے شوہر سے بیٹے کی موت کی خبر اس کی موت کی پہلی رات بہت احسن انداز سے چھپائی اور انہیں اپنی خواہش پوری کرنے کا موقع فراہم کیا ۔ (شرح مسلم للنووی، کتاب الاداب ، باب استحباب تحنیک المولود الخ،۷ /۱۲۲-۱۲۴، الجزء الرابع عشر )بچوں کے نام اچھے رکھنے چاہئیں !بچوں کے اچھے نام رکھنے چاہئیں جیسا کہ حضور صَلَّی اللہ تَعَالٰی عَلَیْہِ وَاٰلِہٖ وَسَلَّم نے حضرتِ سَیِّدُنا ابو طلحہ رَضِیَ اللہ تَعَالٰی عَنہُ کے بیٹے کا نام عَبْدُ اللہ رکھا۔
اللہ عزَّوَجَلَّ قراٰن مجید فرقانِ حمید میں ارشاد فرماتا ہے :وَ لَا تَلْمِزُوْۤا اَنْفُسَكُمْ وَ لَا تَنَابَزُوْا بِالْاَلْقَابِؕ-(پ ۲۶، الحجرٰت: ۱۱)
ترجمۂ کنز الایمان : اورآپس میں طعنہ نہ کرو اور ایک دوسرے کے برے نام نہ رکھو۔
آج کل لوگUnique( منفرد ، سب سے الگ) نام رکھنے کی دُھن میں اپنے بچوں کے ایسے ایسے نام رکھ دیتے ہیں جن کے معانی درست نہیں ہوتے، حضور صَلَّی اللہ تَعَالٰی عَلَیْہِ وَاٰلِہٖ وَسَلَّم کسی کے نام میں کوئی خامی دیکھتے تو اسے تبدیل فرمادیتے تھے ۔ اُمُّ المؤمنین حضرتِ سَیِّدَتُنا عائشہ صدّیقہ رَضِیَ اللہ تَعَالٰی عَنْہَا سے مروی ہے :’’اَنَّ النَّبِیَّ صلی اللہ علیہ وسلم کَانَ یُغَیِّرُ الْاِسْمَ الْقَبِیْحَ ‘‘ (نبیِّ اکرم، نورِ مجسم صَلَّی اللہ تَعَالٰی عَلَیْہِ وَاٰلِہٖ وَسَلَّم کی عادتِ کریمہ تھی کہ برے نام کو بدل دیتے)۔(ترمذی، کتاب الادب، باب ماجاء فی تغییر الاسمائ، ۴/۳۸۲، حدیث:۲۸۴۸) بچوں کے نام انبیائے کرام عَلَیْھِمُ السَّلَام صحابہ و صحابیات کرام عَلَیْہم الرِّضْوَان و تابعین و تابعات اور بزرگانِ دین رَحِمَھُمُ اللہ الْمُبِیْن کے نام پررکھے جائیں۔ ہو سکے تو نام کسی متقی و پرہیز گار ،صحیح العقیدہ سنی عالِمِ دین سے رکھوایا جائے۔اچھے نام رکھنے کی فضیلت پر 4فرامین مصطفٰیصَلَّی اللہ تَعَالٰی عَلَیْہِ وَاٰلِہٖ وَسَلَّم(1)اللہ عزَّوَجَلَّکے پسندیدہ نام’’تمہارے ناموں میں اللہ عزَّوَجَلَّ کے نزدیک زیادہ پیارے نام عَبْدُاﷲ و عَبْدُالرَّحْمٰن ہیں۔‘‘(مسلم، کتاب الاداب، باب النھی عن التکنی بابی القاسم …الخ، ص۱۱۷۸، حدیث:۲۱۳۲)(2)قیامت میں ناموں سے بلایا جائے گا’’ قیامت کے دن تم کو تمہارے اور تمہارے باپوں کے نام سے بلایا جائے گا، لہٰذا اچھے نام رکھا کرو۔‘‘( أبو داود ، کتاب الادب، باب فی تغییر الاسمائ، ۴/ ۳۷۴، حدیث:۴۹۴۸)(3)نامِ محمد رکھنے کی فضیلت’’جس کے ہاں لڑکا پیدا ہو اور وہ میری محبت اور میرے نام سے برکت حاصل کرنے کے لئے اس کا نام محمد رکھے تووہ اور اس کا لڑکا دونوں جنت میں جائیں گے۔‘‘
(کنزالعمال،کتاب النکاح، الباب السابع فی بر الاولاد وحقوقہم ، ۸/۱۷۵، حدیث:۴۵۲۱۵، الجزء السادس عشر )(4)جس کا نام محمد ہوگا اُسے عذاب نہ ہوگابروزِ قیامت دو شخص اللہ رَبُّ الْعِزَّت کے حضور کھڑے کئے جائیں گے، حکم ہو گا اِنہیں جنت میں لے جاؤ! وہ عرض کریں گے : اے ہمارے ربّ عزَّوَجَلَّ !ہم کس عمل کی بدولت جنت کے قابل ہوئے، ہم نے توکوئی کام جنت کا نہیں کیا؟ اللہ عزَّوَجَلَّ فرمائے گا :جنت میں جاؤ !میں نے قسم ارشاد فرمائی ہے کہ جس کا نام احمد یا محمد ہو وہ دوزخ میں
نہ جائے گا۔‘‘(الفردوس بمأثور الخطاب للدیلمی، ۲ /۵۰۳، حدیث:۸۵۱۵)
آنکھوں کا تارا نامِ محمد دل کا اُجالا نام محمد صلی اللہ تعالی علیہ وسلم
دولت جو چاہو دونوں جہاں کی کر لو وظیفہ نام محمد صلی اللہ تعالی علیہ وسلم
روزِ قیامت میزان وپُل پر دے گا سہارا نام محمد صلی اللہ تعالی علیہ وسلم
پوچھے گامولالایاہے کیا کیا میں یہ کہوں گا نام محمد صلی اللہ تعالی علیہ وسلم
غم کی گھٹائیں چھائی ہیں سر پر کر دے اشارہ نام محمد صلی اللہ تعالی علیہ وسلم
رنج والَم میں ہے نام لیوا کر دے اشارہ نام محمد صلی اللہ تعالی علیہ وسلم
صَلُّوْا عَلَی الْحَبِیْب صَلَّی اللہ تَعَالٰی عَلٰی مُحَمَّدمد نی گُلد ستہ’’ قفلِ مد ینہ‘‘ کے8حروف کی نسبت سے حد یثِ مذکور اور اسکی وضاحت سے ملنے والے8مدنی پھول
(1) اولاد کا فوت ہونا اگرچہ بہت بڑی مصیبت ہے مگر اس پر صبر کرنے کا اجر بھی بہت بڑا ہے ۔
(2) بچے کو گھٹی دینا سنتِ مبارکہ ہے گھٹی کسی نیک پرہیزگار مسلمان سے دلوانی چاہیے ۔
(3)بچوں کو بزرگوں کی بارگاہ میں لے جانا صحابۂ کرام عَلَیْہم الرِّضْوَان کی سنت ہے۔
(4) کسی کو کوئی غم کی خبر سنانی ہو تو یکدَم نہیں سنانی چاہیے بلکہ ہو سکے توپہلے اس کی ذہن سازی کر لی جائے ۔
(5) ہو سکے تو تَبَرُّکاًکسی بزرگ ہستی سے نام رکھوایا جائے اور اگر خود رکھیں تو اچھا نام رکھنا چاہیے جیسے عَبْدُ اللہ ،عَبْدُ الرَّحْمٰن، مُحَمَّد ، اَحْمَد وغیرہ یا بزرگانِ دین کے نام پر نام رکھیں۔
(6) اولیائے کرام رَحِمَھُمُ اللہ السَّلَام سے محبت دنیا وآخرت میں کامیابی کا سبب ہے یہاں تک کہ ان کے ناموں پرنام رکھنا بھی سعادت مندی کی دلیل ہے۔
(7) جب کسی کا بچہ فوت ہو جائے تو تعزیت کرتے وقت اس کے لئے اچھے نِعْمُ الْبَدَل کی دعا کرنی چاہئے ۔
(8) جس مسلمان کا نام مُحَمَّد یا اَحْمَد ہو گا وہ جہنم میں نہیں جائے گا۔ اِنْ شَاءَ اللہ عزَّوَجَلَّ
یا اللہ عزَّوَجَلَّ !اپنے پیارے حبیب صَلَّی اللہ تَعَالٰی عَلَیْہِ وَاٰلِہٖ وَسَلَّم کے نامِ نامی کے صَدقے ہم اری بے حساب مغفرت فرما! اٰمِیْن بِجَاہِ النَّبِیِّ الْاَمِیْن صَلَّی اللہ تَعَالٰی عَلَیْہِ وَاٰلِہٖ وَسَلَّم
٭٭٭٭٭٭٭