والدین کے ساتھ صلہ رحمی کا بیان - فیضان ریاض الصالحین - حدیث نمبر: 318

مسئلہ دریافت کرنے کے لیے دوسروں کا ذکر:مذکورہ حدیث پاک میں اس شخص کی فضیلت بیان کی گئی ہےکہ جو رشتہ داروں کے قطع رحمی کرنے کے باوجود ان سے صلہ رحمی کرے۔ حدیث پاک میں بیان کیا گیا ہے ایک صاحب نے حضور عَلَیْہِ الصَّلَاۃُ وَالسَّلَام کی بارگاہ میں اپنے رشتہ داروں کی شکایت کرتے ہوئے عرض کی : ’’ یارسولَ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم ! میں اپنے رشتہ داروں کے ساتھ ہر طرح سے بھلائی کرتا ہوں ، ان کی جفا کا جواب اپنی وفا سے دیتا ہوں لیکن وہ پھر بھی اپنی رَوِش پر قائم ہیں ، اب آپ ہی ارشاد فرمائیں میں کیا کروں؟ ‘‘یاد رہے کہ یہ کلام
 
دوسروں کی بطور غیبت برائی کرنا یا اپنی اچھائی بیان کرنے کے لیے نہیں ہے بلکہ حضور نبی رحمت شفیع امت صَلَّی اللہُ تَعَالٰی عَلَیْہِ وَاٰلِہٖ وَسَلَّم سے مسئلہ دریافت کرنے کے لیے ہے۔ ‘‘( )گرم راکھ سے منہ بھرنےکے معنی:سرکارِ دوعالَم نورِ مجسم شاہِ بنی آدم صَلَّی اللہُ تَعَالٰی عَلَیْہِ وَاٰلِہٖ وَسَلَّم نے اس شخص کی شکایت سننے کے بعد ارشاد فرمایا : ’’ اگر معاملہ ایسا ہی ہے جیسا تم بیان کررہے ہو۔ یعنی قرابت داروں کی تمہارے ساتھ بد سلوکی کے باوجود تم ان سے حسن سلوک ہی سے پیش آتے ہو تو تم اُن کے منہ میں گرم راکھ بھر رہے ہو۔ اِس جملے کےعَلَّامَہ مُلَّا عَلِی قَارِی عَلَیْہِ رَحْمَۃُ اللّٰہِ الْبَارِی نے مختلف معنی بیان کیے ہیں ان میں سے تین یہ ہیں : ’’(1)تیری بھلائی کا بدلہ احسان فراموشی سے دینے کے باوجود بھی اگر وہ تیرا مال لیں تو یہ ان پر حرام ہے اور ان کے پیٹ میں آگ کی مانند ہے۔ (2) تم ان کی برائی کا بدلہ بھلائی سے دینے کی وجہ سے انہیں خود ان کی نظر میں گرا دیتے ہو اور انہیں ذلیل و رسوا کرتے ہو جیساکہ جب کوئی آدمی گرم راکھ منہ میں ڈالے تو اسے خود پر شرمندگی ہوتی ہے۔ (3)تمہارا ان پر احسان کرنا ان کا منہ کالا کرتا ہے جیسے گرم راکھ چہرے کو سیاہ کردیتی ہے۔ ‘‘( )مددِالٰہی ملنے کاذریعہ:رحمت عالم نور مجسم صَلَّی اللہُ تَعَالٰی عَلَیْہِ وَاٰلِہٖ وَسَلَّم نے ارشادفرمایا : ’’تمہارا قطع رحمی کرنے والے رشتہ داروں سے صلہ رحمی کرنا ان کے منہ میں گرم راکھ بھرنے کی مثل ہے اور جب تک تم اپنے اس حسن سلوک پر قائم رہوگے اللہ عَزَّوَجَلَّ کی طرف سے تیرے لیے ان کے خلاف ایک مددگار رہے گا۔ ‘‘مُفَسِّر شہِیر مُحَدِّثِ کَبِیْر حَکِیْمُ الْاُمَّت مُفتِی احمد یار خان عَلَیْہِ رَحْمَۃُ الْحَنَّان فرماتے ہیں : ’’یعنی جب تک تیرا یہ حلم اور برائی کی عوض بھلائی ہے ، تب تک اللہتعالیٰ کی طرف سے تجھے مدد پہنچتی رہے گی یا تجھ پر رب کی طرف سے فرشتہ مقرر رہے گا جو تجھے ان کی شر سے بچائے گا اور تیرے عزت و مال میں برکت دے گا۔ ‘‘( )
 صلہ رحمی اور مکافاۃ میں فرق:میٹھے میٹھے اسلامی بھائیو!مذکورہ حدیث پاک سے ہمیں یہ مدنی ذہن ملتا ہے کہ رشتہ داروں کے ساتھ ہر حال میں بھلائی اور صلہ رحمی کرنی چاہیے اگرچہ ان کی طرف سے بدسلوکی اور قطع رحمی کی جائے کیونکہ صلہ رحمی اسی کانام نہیں کہ جب وہ حسن سلوک کریں تو ہم بھی ان کے ساتھ بھلائی کریں بلکہ یہ تو مکافاۃ یعنی اَدْلَا بَدْلَا ہے کہ اس نے تمہارے پاس کوئی چیز بھیجی تو تم نے بھی اس کے پاس بھیج دی ، وہ تمہارے یہاں آیا تو تم اس کے پاس چلے گئے۔ حقیقتاً صلہ رحمی یہ ہے کہ وہ کاٹے اور تم جوڑو ، وہ تم سے جدا ہونا چاہتا ہے ، بے اعتنائی (لاپرواہی) کرتا ہے اور تم اس کےساتھ قرابت داری کے حقوق کی رعایت کرتے رہو۔ ( ) اور حدیث پاک میں بھی قطع رحمی کرنے والے رشتہ داروں کے ساتھ صلہ رحمی کرنے کی بڑی فضیلت بیان ہوئی ہے۔ چنانچہ حضرتِ سَیِّدُنا ابی بن کَعْب رَضِیَ اللہُ تَعَالٰی عَنْہُ سے روایت ہے کہ سرکارِ دو جہاں صَلَّی اللہُ تَعَالٰی عَلَیْہِ وَاٰلِہٖ وَسَلَّم نے فرمایا : “ جسے پسند ہوکہ اس کے لیے (جنت میں)محل بنایاجائے اور اس کے درجات بلند کیے جائیں تواسے چاہیے کہ جو اس پر ظلم کرے اسے معاف کردے ، جو اسے محرو م کرے اسے عطا کرے اور جواس سے قطع تعلقی کرے اس کے ساتھ صلہ رحمی کرے۔ “ ( )صلہ رحمی کے مختلف درجات:علامہ غلام رسول رضوی عَلَیْہِ رَحْمَۃُ اللہِ القوی فرماتے ہیں : ’’اس میں اختلاف نہیں کہ صلہ رحمی فی الجملہ واجب ہے اور اس کو قطع کرنا کبیرہ گناہ ہے۔ صلہ رحمی کے کچھ درجات ہیں ، کم ازکم درجہ یہ ہے کہ ناراضگی ترک کردے اور سلام وکلام سے صلہ (یعنی اچھاسلوک) کرے ، قدرت اور حاجت کے اختلاف سے صلہ (یعنی سلوک) کی مختلف حالتیں ہیں ، بعض حال میں صلہ رحمی واجب ہے اور بعض صورت میں مستحب ہے۔ اگر بعض حالت میں صلہ کیا اور پوری طرح نہ کیا تو اس کو قطع رحمی نہیں کہتے۔‘‘( )
 مدنی گلدستہ
’’جبلِ نور‘‘کے6حروف کی نسبت سے حدیثِ مذکور
اور اس کی وضاحت سے ملنے والے6مدنی پھول(1)اچھے سلوک کے جواب میں بُرا سلوک کرنے والے رشتہ دار قابل ملامت ہیں اور انہیں اس کے وبال کا سامنا ہو گا۔
(2)رشتہ داروں کی بُرائی کے بدلے ان سے اچھائی کرنا انہیں خود ان کی نظر میں گرا دیتا ہے۔
(3)رشتہ داروں کے بُرے سلوک کے باوجود ان سے اچھا سلوک کرنے کی صورت میں اللہ عَزَّوَجَلَّ کی مدد نصیب ہوتی ہے یا محافظ فرشتے کا ساتھ ملتا ہے۔
(4)صلہ رحمی یہ نہیں کہ جو اچھا سلوک کرے صرف اسی کے ساتھ بھلائی کی جائے بلکہ صلہ رحمی تو یہ ہے کہ جو قطع تعلق کرے اس کے ساتھ بھی حسن سلوک کیا جائے۔
(5)بُرا سلوک کرنے والے رشتہ داروں سے اچھا سلوک کرنا نہیں چھوڑنا چاہیے، اُن کا جیسا عمل ہو ویسا ان کو صلہ ملے گا اور اِس کا جیسا عمل ہو گا ویسا اِس کو صلہ ملے گا۔
(6)قاطعِ رحم رشتہ داروں سے صلہ رحمی کرنے والے کے لیے جنتی محل کی بشارت ہے۔
اللہ عَزَّوَجَلَّ ہمیں رشتہ داروں کے صلہ رحمی کرنے کی توفیق عطا فرمائے اور ان کی بُرائی کے بدلے بھی ان سے اچھائی کرنے سعادت نصیب فرمائے۔ آمِیْنْ بِجَاہِ النَّبِیِّ الْاَمِیْنْ صَلَّی اللہُ تَعَالٰی عَلَیْہِ وَاٰلِہٖ وَسَلَّم
صَلُّوْا عَلَی الْحَبِیْب! صَلَّی اللہُ تَعَالٰی عَلٰی مُحَمَّد