خوفِ خدا کا بیان - فیضان ریاض الصالحین - حدیث نمبر: 403

ستر سال تک پسینے میں غوطے :مذکورہ احادیث میں قیامت کی ہولناکیوں کا بیان ہے کہ قیامت کے دن لوگوں پر ایسا خوف اور دہشت طاری ہوگی کہ لوگ اپنے ہی پسینے میں نہارہے ہوں گے ۔ ان کا پسینہ زمین میں ستر گز تک پہنچ جائے گا ۔ حضرتِ سَیِّدُنا مقدادرَضِیَ اللہُ تَعَالٰی عَنْہُسے مروی حدیث کے تحت ” صحیح مسلم“ کی شرح ” اِکمال المعلم“ میں ہے : ’’ممکن ہے کہ قیامت کے ہولناک احوال کا مشاہدہ کر کے خوف اور ڈر کی وجہ سے اپنے ہی پسینے میں
 
شرابور ہو ، یہ بھی احتمال ہے کہ یہ اس کا اور دوسرے لوگوں کا پسینہ ہو اور یہ پسینہ لوگوں کے ہجوم اور ایک دوسرے سے ملے ہوئے ہونے کی وجہ سے آئے گا حتی کہ پسینہ ان کے درمیان سطحِ زمین پر بہہ رہا ہوگااور وہ ستر سال تک اس پسینے میں غوطے لگائیں گے ۔ ‘‘ ( )
¥کافر سب سے زیادہ پسینے میں ہوں گے :حدیثِ مذکورہ میں اور جو روایات اس باب میں گزری ہیں اُن میں اس بات کا بھی بیان ہے کہ قیامت کے دن لوگ اپنے اپنے اعمال کے مطابق پسینے میں ڈوبے ہوئے ہوں گے تو کیا سب لوگ پسینے میں نہارہے ہونگے یا کچھ لوگ اس سے مستثنی بھی ہیں؟ چنانچہعَلَّامَہ حَافِظ اِبنِ حَجَر عَسْقَلَانِی قُدِّسَ سِرُّہُ النُّوْرَانِیفرماتے ہیں : ’’ظاہرِ حدیث سے تو یہی پتہ چلتا ہے کہ سب لوگ پسینے میں ہوں گے لیکن دوسری اَحادیث اس بات پر دلالت کرتی ہیں کہ سب نہیں بلکہ اکثر لوگ پسینے میں ہوں گے ، انبیائے کرامعَلَیْہِمُ السَّلَام، شہداء اور جسےاللہ عَزَّوَجَلَّچاہے وہ اس سے مستثنیٰ ہیں ۔ سب سے زیادہ پسینے میں کافر ہوں گے ، اُن سے کم پسینے میں کبیرہ گناہ کرنے والے ، ان سے کم پسینے میں کم گناہ والے ۔ اس گرمی و پسینے کی مصیبت میں کافروں کے مقابلے میں مسلمان بہت ہی کم ہوں گے ۔ حالتِ مذکورہ پر غور کرنے سے قیامت کی ہولناکیوں کا پتہ چلتا ہے اور یہ کہ جہنم نے زمین کو چاروں طرف سے گھیرا ہوا ہوگا ۔ سورج لوگوں کے سروں سے ایک میل دُور ہوگا ۔ پس اُس وقت زمین کی گرمی کس بلا کی ہوگی ۔ پھرجو حدیث میں بیان کیا گیا کہ لوگوں کا پسینہ زمین میں ستر گز تک چلا جائے گا ( لوگوں کا اتنا ہجوم ہوگا کہ ) ہر شخص کو صرف پاؤں رکھنے کی جگہ ملے گی ۔ یہاں سوال یہ پیدا ہوتا ہے کہ جب اتنی بھیڑ ہوگی اور صرف پاؤں رکھنے کی جگہ ہوگی اور لوگ ایک دوسرے کے اتنے قریب قریب ہوں گے تو پھر لوگ الگ الگ پسینے میں کیسے ہوں گے ؟ یعنی کوئی ٹخنوں تک ، کوئی گھٹنوں تک اور کوئی گردن تک ۔ تو اس کا جواب یہ ہے کہ یہ سب ان چیزوں میں سے ہے جس پر عقل دَنگ رہ جاتی ہے اور یہاللہ عَزَّوَجَلَّکی عظیم قدرت پر دلالت کرتی ہے اور ایمان اس بات کا تقاضا کرتا ہے کہ اُمورِ آخرت میں عقل کو کوئی دخل نہیں ۔ پس قیامت کے دن جو کچھ ہوگا وہ خلافِ عقل ہوگا ، یہ اُن ضروریاتِ دین میں سے ہے جس پر ایمان
 
بالغیب یعنی بِن دیکھے ایمان لانا ضروری ہے پس ہمارا اس پر ایمان ہے ۔ ‘‘ ( )
¥پسینہ آنے کی وجہ :یہ پسینہ سورج اور دوزخ کی گرمی ، انتہائی پریشانی وفکر اور ندامت کی وجہ سے ہوگا ۔ اور اپنے اَعمال کے مطابق ہوگا ۔ زیادہ گناہ کیے تو پسینہ زیادہ ، کم کیے تو پسینہ کم ۔ بعض شارحین نے فرمایا کہ ہر ایک کا پسینہ الگ ہوگا دوسروں کے پسینہ سے مل کر دریا نہ بنے گا ۔ جیسے حضرت سیدنا موسیٰعَلَیْہِ السَّلَامکی مچھلی سے پانی میں طاق بن گیا ۔ بعض نے فرمایا کہ تمام پسینوں کا دریا بن جائے گا مگر یہ دریا کسی کے ٹخنوں تک ، کسی کے منہ تک ۔ جیسے ایک ہی قبر میں مؤمن مُردہ جنت میں ہے ، کافر مُردہ دوزخ میں ۔ ایک چار پائی پر دو آدمی سورہے ہیں ایک اچھی خواب سے خوش ہے دوسرا بری خواب سے پریشان ۔ ظاہر یہ ہے کہ مِیل سے مراد راستہ کا مِیل ہے کوس کا تہائی حصہ ، آج کل ہمارے ہاں آٹھ فرلانگ کا میل ہوتا ہے ، عرب میں پانچ فرلانگ کا جسے کیلو کہتے ہیں ۔ بعض شارحین نے فرمایا کہ یہاں میل سے مراد سرمہ کی سلائی ہے ۔ بہرحال ہوگا نہایت ہی قریب ۔ اَعمال سے مراد گناہ ہیں یعنی بداَعمال خواہ کفر ہو یا دوسرے گناہ ۔ ‘‘ ( )
¥چالیس سال تک آسمان کی طرف نہ دیکھا :میٹھے میٹھے اسلامی بھائیو ! جب انسان دنیا میں کوئی غلطی کرتا ہے اور وہ کسی کو معلوم ہوجائے تو اسے کیسی ندامت کا سامنا کرنا پڑتا ہے ، مخلوق کے سامنے ندامت کے خوف سے بسا اوقات وہ کئی کئی دن تک گھر سے باہر نہیں نکلتا ۔ ذرا سوچیے کل بروز قیامت جب محشر میںاللہ عَزَّ وَجَلَّ، اس کے انبیائے کرامعَلَیْہِمُ الصَّلٰوۃُ وَالسَّلَام، اولیائے عظامرَحِمَہُمُ اللہُ السَّلَاماور تمام نیک لوگوں ودیگر خلق خدا کے سامنے اپنے اعمال کو پڑھ کر سنانے کا حکم ہوگا تو بندے کو کیسی ندامت وشرمندگی ہوگی؟ ہمارے بزرگان دینرَحِمَہُمُ اللہُ الْمُبِیْنبھی قیامت کے ہولناک دن سے بہت خوفزدہ رہتے تھے ، ہمیشہاللہ عَزَّ وَجَلَّکے خوف سے ان پر لرزہ طاری رہتا تھا ۔ چنانچہ حضرت سَیِّدُنا عطاء سلمیرَضِیَ اللہُ تَعَالٰی عَنْہُجنہوں نے خوفِ خدا کی وجہ سے چالیس سال تک آسمان کی طرف
 
نہیں دیکھااور نہ ہی کسی نے انہیں مسکراتے ہوئے دیکھا ، اِن کے بارے میں منقول ہے کہ جب آپ رونا شروع کرتے تو تین دن اور تین رات مسلسل روتے رہتے ۔ اسی طرح جب کبھی آسمان پر بادل ظاہر ہوتے اور بجلی کڑکتی تو آپ کے دل کی دھڑکن تیز ہوجاتی ، بدن کانپنا شروع ہو جاتا ، آپ بے تاب ہوکر کبھی بیٹھ جایا کرتے اور کبھی کھڑے ہوجاتے اور ساتھ ہی روتے ہوئے کہتے : ’’شاید میری لغزشوں اور گناہوں کی وجہ سے اہلِ زمین کو کسی مصیبت میں مبتلا کیا جانے والا ہے ، جب میں مر جاؤں گا تو لوگوں کو بھی سکون حاصل ہو جائے گا ۔ ‘‘ اس کے علاوہ آپ روزانہ اپنے نفس کو مخاطب کر کے فرماتے : ’’اے نفس ! تو اپنی حد میں رہ اور یاد رکھ تجھے قبر میں بھی جانا ہے ، پلِ صراط سے بھی گزرنا ہے ، دشمن ( یعنی آنکڑے ) تیرے ارد گرد موجود ہوں گے جو تجھے دائیں بائیں کھینچیں گے ، اس وقت قاضی ، رب تعالیٰ کی ذات ہو گی اور جیل ، جہنم ہو گی جبکہ اس کا داروغہ سَیِّدُنا مالکعَلَیْہِ السَّلَامہوں گے ۔ اس دن کا قاضی ناانصافی کی طرف مائل نہیں ہوگا اور نہ ہیمَعَاذَ اللہداروغہ کوئی رشوت قبول کرے گا اور نہ ہی جیل توڑنا ممکن ہوگا کہ تو وہاں سے فرار ہو سکے ، قیامت کے دن تیرے لئے ہلاکت ہی ہلاکت ہے ۔ اس کا بھی علم نہیں کہ فرشتے مجھے کہاں لے جائیں گے ؟ عزت وآرام کے مقام جنت میں یا حسرت اور تنگی کی جگہ جہنم میں؟ ‘‘ اس دوران آپ کی چشمانِ مبارک سے آنسو بھی بہتے رہتے ۔ جب آپ کا انتقال ہوگیا تو حضرت سیدنا صالح مریرَضِیَ اللہُ تَعَالٰی عَنْہُنے آپ کو خواب میں دیکھا اور پوچھا : ’’اللہ عَزَّ وَجَلَّنے آپ کے ساتھ کیا سلوک فرمایا؟ ‘‘ تو آپ نے جواباً ارشاد فرمایا کہ’’رب تعالیٰ نے مجھے ابدی عزت عطا کی ہے اور بہت سے نعمتوں سے نوازا ہے ۔ ‘‘ یہ سن کر حضرت سیدنا صالح مریرَضِیَ اللہُ تَعَالٰی عَنْہُنے کہا : ’’آپ دنیا میں تو بڑے غم زدہ اور پریشان رہا کرتے تھے اور ہر وقت روتے رہتے تھے ، بتائيے ! اب کیا حال ہے ؟ ‘‘ تو آپ نے جواب دیا : ’’اب تواللہ عَزَّ وَجَلَّکے فضل سے بہت خوش ہوں اور مسکراتا رہتا ہوں ، میرے ربعَزَّ وَجَلَّنے مجھ سے فرمایا : اے نیک بندے ! تو اس قدر گریہ وزاری کیوں کیا کرتا تھا ؟ ‘‘ میں نے عرض کی : ’’اےاللہ عَزَّ وَجَلَّ! صرف اور صرف تیرے خوف کی وجہ سے ۔ ‘‘ تواللہتعالیٰ نے ارشاد فرمایا : ’’میرے بندے ! کیا تجھے علم نہ تھا کہ میں بڑا غفور اور مہربان ہوں ۔ ‘‘ ( ) ( اور یوں میری بخشش فرما دی ۔ )
 
معاف فضل وکرم سے ہو ہر خطا یارب ……… ہو مغفرت پئے سلطان انبیاء یارباللہ عَزَّ وَجَلَّکی ان پر رحمت ہو اور ان کے صدقے ہماری مغفرت ہو ۔ آمینمدنی گلدستہ
’’چل مدینہ ‘‘ کے 7حروف کی نسبت سے حدیثِ مذکور اور
اس کی وضاحت سے ملنے والے 7مدنی پھول
(1)قیامت کا دن نہایت ہی دشوار گزار اور ہولناکیوں سے بھرپور ہوگا ۔
(2) قیامت کے دن سورج لوگوں سے ایک میل کے فاصلے پر رہ کر آگ برسا رہا ہوگا ۔
(3) لوگ ستر ( 70 ) سال تک اپنے پسینے میں غوطے لگائیں گے ۔
(4) تمام لوگ پسینے میں ڈوبے ہوئے نہیں ہوں گے بلکہ لوگوں کی اکثریت پسینے میں ڈوبی ہوئی ہوگی ۔
(5) انبیائے کرامعَلَیْہِمُ السَّلَام، شہداء اور جسےاللہ عَزَّ وَجَلَّچاہے گا وہ اس آزمائش سے بالکل محفوظ ہوں گے وہ اس حکم سے جدا ہیں ۔
(6) قیامت کے دن ہونے والے معاملات ہماری عقل سے ماوراء ہیں اس لیے انہیں عقل کے ترازو میں نہیں تولنا چاہیے بلکہ اس پر ایمان رکھنا چاہیے ۔
(7) آخرت کی تمام مشکل منازل خصوصاً قیامت کی ہولناکیوں سےاللہ عَزَّ وَجَلَّکی پناہ مانگنی چاہیے ۔اللہ عَزَّ وَجَلَّسے دعا ہے کہ وہ ہمیں آخرت کی تمام مشکلات سے محفوظ فرمائے ، قیامت کی ذلت ورسوائی سے محفوظ فرمائے ، ہمیں بلا حساب جنت میں داخلہ نصیب فرمائے ۔صَلُّوْا عَلَی الْحَبِیْب ! صَلَّی اللہُ تَعَالٰی عَلٰی مُحَمَّد