باب: صَفِ اَوّل کی فضیلت کا بیان - فیضان ریاض الصالحین - حدیث نمبر: 1093

اگلی صفوں میں جگہ خالی نہ چھوڑیں:حدیثِ مذکور سے معلوم ہواکہ پہلے اگلی صف مکمل کی جائے پھر بعد والی، اسی طرح ترتیب وار صفیں مکمل کی جائیں، اگلی صف مکمل ہونے کے بعد جو لوگ بچیں وہ پیچھے صف بنالیں،اب اگر نمازیوں کی تعداد کم ہواوریہ دوسری صف مکمل نہ بنے تو کوئی حرج نہیں۔بہارِ شریعت میں ہے:” صف ميں جگہ ہوتے ہوئے صف کے پیچھے کھڑا ہونا ممنوع ہے نیز پہلی صف میں جگہ ہواور پچھلی صف بھر گئی ہو تو صف چیر کر پہلی صف کی خالی جگہ کو پُر کریں کیونکہ حدیثِ پاک میں ہے:”جو صف میں کشادگی دیکھ کر اسے بند کر دے اس کی مغفرت ہو جائے گی۔“ لیکن یہ عمل وہاں کریں جہاں فتنہ و فساد کا احتمال نہ ہو جس جگہ فتنہ کا اندیشہ ہو وہاں صف چیر کر اگلی صف میں جانے سے اجتناب کیجئے۔“