امربالمعروف ونہی عن المنکر - فیضان ریاض الصالحین - حدیث نمبر: 196

گناہگاروں کی صحبت کی نحوست:مذکورہ حدیث پاک کے دو جز ہیں : پہلے جز میں ایک آدمی کا دوسرے کو گناہ سے روکنے کا ذکر ہے جبکہ دوسرے جز میں بنی اسرائیل کے علماء کا کردار بیان کیا گیا ہے۔ عَلَّامَہ مُلَّا عَلِی قَارِی عَلَیْہِ رَحْمَۃُ اللہِ الْبَارِی فرماتے ہیں : ’’جب بنی اسرائیل بدکاری ، ہفتے کے دن شکار کرنے اور ان کے علاوہ دیگر گناہوں میں مبتلا ہوئے تو ان کے علماء نے ابتدا میں انہیں روکا ، مگر جب وہ لوگ باز نہ آئے اور اپنے علماء کی بات نہ مانی اور نہ ہی ممنوع چیزوں کو ترک کیا تو وہ علماء بھی اپنی قوم کی مجلسوں کے ہم نشین ہو گئے اور ان کے ساتھ کھانے پینے میں شریک ہوگئے ، جب ان لوگوں نے ایسا کیا تو اللہ عَزَّوَجَلَّ نے ان کے دل آپس میں خلط ملط کردیے۔ ‘‘ ابن الملک رَحْمَۃُ اللہِ تَعَالٰی عَلَیْہ فرماتے ہیں : ’’یعنی گناہگاروں کی نحوست کے سبب اللہ عَزَّوَجَلَّ نے ان لوگوں کے دل بھی سیاہ کردیے جنہوں نے گناہوں کا ارتکاب نہیں کیا تھا تو ان سب کے دل گناہوں اور دل کی سیاہی کے سبب حق اور خیر قبول کرنے سے یا اللہ عَزَّوَجَلَّ کی رحمت سے دور ہوگئے اور پھر اللہ عَزَّوَجَلَّ نے ان تمام نافرمانوں اور ان کے ہمراہیوں پر حضرتِ سَیِّدُنا داؤد عَلَیْہِ السَّلَام اور حضرتِ سَیِّدُنا عیسیٰ بن مریم عَلَیْہِمَا السَّلَام کی زبان سے لعنت فرمائی اور ان پر یہ لعنت اعلانیہ گناہوں کا ارتکاب کرنے ، گناہوں کو حلال سمجھ کر کفر کی حد سے تجاوز کرنے ، گناہوں پر رضامند ہونے اور گناہ کرنے والوں کو اچھا سمجھنے کی وجہ سے تھی۔ ‘‘( )بنی اسرائیل کے علماء کا کردار:مُفَسِّر شہِیرمُحَدِّثِ کَبِیْرحَکِیْمُ الْاُمَّت مُفتِی احمد یار خان عَلَیْہِ رَحْمَۃُ الْحَنَّان فرماتے ہیں : ’’اس
 
حدیث شریف میں بنی اسرائیل کے علماء کا کردار ذکر کرنے کے بعد اُس راستے پر چلنے سے روکا گیا ، نیز یہ بتایا گیا کہ بنی اسرائیل کے علماء نے اپنی قوم کو بُرائی سے منع کیا ، جب وہ باز نہ آئے تو بجائے اس کے کہ وہ ان کا بائیکاٹ کرکے اُن کو برائی چھوڑنے پر مجبور کرتے ، خود ان کے ہم مجلس اور ہم پیالہ وہم نوالہ ہوگئے اور ان کے دل ایک جیسے ہوگئے جس کی بنیاد پر وہ لعنت کے مستحق ہوئے۔ ‘‘( )گناہ گاروں کی صحبت بھی گناہ ہے:حدیث پاک میں بیان ہوا کہ ’’جو لوگ گناہ نہیں کرتے تھے ان لوگوں کے دل بھی نافرمانوں کی طرح سیاہ کردیے گئے۔ ‘‘ یہاں گناہ نہ کرنے سے مراد ظاہری گناہ یعنی بدکاری اور ہفتے کے دن شکار نہ کرنا ہے۔ ورنہ اصلاً تو یہ لوگ بھی ایک طرح سے خطاکار تھے کہ ان لوگوں کا اللہ عَزَّوَجَلَّ کی نافرمانیوں میں مبتلا لوگوں کے ساتھ بغیر کسی کراہیت اور ناپسندیدگی کے کھانا پینا اور ان کی صحبت اختیار کرنا بالکل واضح گناہ ہے کیونکہ اللہ عَزَّوَجَلَّ کی خاطر بغض رکھنا اس بات کا تقاضہ کرتا ہے کہ نافرمانوں سے دور رہا جائے ، ان سے ہجرت کی جائے ، ان سے تعلق ختم کیا جائے اور ان سے میل جول نہ رکھا جائے جبکہ بنی اسرائیل نے ان تقاضوں پر عمل نہ کیا جس کی وجہ سے ان کے دل سیاہ کردیے گئے۔ ‘‘( )نیکی کی دعوت دینے، برائی سے منع کرنے کی نصیحت:بنی اسرائیل کی خرابیوں اور ان پر عذاب نازل ہونے کا تذکرہ کرنے کے بعد حضورنبی رحمت ، شفیعِ اُمَّت صَلَّی اللّٰہُ تَعَالٰی عَلَیْہِ وَاٰلِہٖ وَسَلَّمنے حدیث پاک کے آخر میں اپنی امت کو تلقین فرمائی کہ تم ہرگز ان جیسے اعمال مت کرنا اور ہمیشہ نیکی کی دعوت دیتے رہنا اور برائی سے منع کرنا ، اگر تم نے یہ فریضہ صحیح طور پر ادا نہ کیا تو پھر تم پر بھی اللہ عَزَّوَجَلَّ کی لعنت ہوگی اور تم برباد ہوجاؤگے لہذا امر بالمعروف و نہی عن المنکر کی ادائیگی میں کوتاہی نہ کرنا۔ مُفَسِّر شہِیرمُحَدِّثِ کَبِیْرحَکِیْمُ الْاُمَّت مُفتِی احمد یار خان عَلَیْہِ رَحْمَۃُ الْحَنَّان فرماتے ہیں :
 
’’سرکار دو عالم صَلَّی اللہُ تَعَالٰی عَلَیْہِ وَاٰلِہٖ وَسَلَّم نے اپنی امت کے ارباب اختیار اور علماء کو متنبہ کیا کہ تمہیں اس (بنی اسرائیل کے) طریقہ کار سے بچنا ہوگا اور برائی کا ارتکاب کرنے والوں کا ہاتھ روکنا ہوگا ، منافقت و مداہنت سے کام لینے کے بجائے غیرت ایمانی کا مظاہرہ کرنا اور امربالمعروف و نہی عن المنکر سے متعلق اپنی ذمہ داری کو پورا کرنا ہوگا ۔ ظالم کا ہاتھ روک کر اسے راہِ حق پر لانا ہوگا ، ورنہ تم بھی بنی اسرائیل کی طرح لعنت کے مستحق ہوجاؤگے۔ ‘‘( )مدنی گلدستہ
’’امام اعظم‘‘کے8حروف کی نسبت سے حدیثِ مذکور
اور اُس کی وضاحت سے ملنے والے8مدنی پھول(1)بنی اسرائیل میں بگاڑ پیدا ہونے کی ابتداء امربالمعروف ونہی عن المنکر ترک کرنے کی وجہ سے ہوئی۔
(2)گناہ گاروں کی صحبت اختیار کرنے کی نحوست سے گناہ نہ کرنے والوں کا دل بھی سیاہ ہوجاتا ہے۔
(3)علماء پر لازم ہے کہ استقامت کے ساتھ امربالمعروف و نہی عن المنکر کا فریضہ سر انجام دیتے رہیں تعطل کا شکار نہ ہوں۔
(4)اِس حدیث پاک سے معلوم ہوا کہ گناہگار شخص کو پہلے برائی سے منع کیا جائے اور اگر وہ نہ مانے تو اس کا بائیکاٹ کیا جائے تاکہ اسے گناہوں کا احساس ہواور وہ انہیں چھوڑنے پر مجبور ہوجائے۔
(5)کفار ومشرکین کبھی بھی مسلمانو ں کے خیر خواہ نہیں ہوسکتے ، لہذا کفار سے دوستی کرنا ناجائز وحرام اور اللہ عَزَّوَجَلَّ غضب کا سبب ہے اور مشرکین سے دوستی کرنا علامتِ نفاق ہے۔
(6)اعلانیہ گناہ کرنا گناہوں کو عام کرنے اور دوسروں کوگناہوں پر اُبھار نے کا سبب ہے۔
(7)اللہ عَزَّوَجَلَّ کی خاطر بغض رکھنے کا تقاضہ یہ ہے کہ اس کی نافرمانی کرنے والوں کے ساتھ نہ کلام کیا جائے ، نہ کھایاجائے ، نہ پیاجائے اور نہ ہی ان کی صحبت اختیار کی جائے۔
 
(8)مسلمان جب تک امر بالمعروف و نہی عن المنکر کا فریضہ ادا کرتے رہیں گے ، عذاب الٰہی سے امان میں رہیں گے اور جب اسے ترک کردیں گے تو عذاب الٰہی میں گرفتار ہوجائیں گے۔
اللہ عَزَّوَجَلَّ سے دعا ہے کہ وہ ہمیں امر بالمعروف و نہی عن المنکر کرنے کی توفیق عطا فرمائے ، نیز ہمیں دیگر تمام گناہوں سے خود بھی بچنےا ور دوسروں کو بھی بچانے کی توفیق عطا فرمائے۔ آمِیْنْ بِجَاہِ النَّبِیِّ الْاَمِیْنْ صَلَّی اللہُ تَعَالٰی عَلَیْہِ وَاٰلِہٖ وَسَلَّم
صَلُّوْا عَلَی الْحَبِیْب! صَلَّی اللہُ تَعَالٰی عَلٰی مُحَمَّد