باب:وضو کی فضیلت کا بیان - فیضان ریاض الصالحین - حدیث نمبر: 1032

وضو میں مبالغہ سے کیا مراد ہے؟مرآۃ المناجیح میں ہے:’’مبالغہ سے مراد ہے کہ اس کی خوبیوں کو انتہا پر پہنچادے،پورا کرنے(یعنی کامل طریقے)سے مرادہے کہ پورے اعضاء دھوئے،بال برابر جگہ بھی خشک نہ رہ جائے۔مِنْکُمْفرماکر اشارہ فرمایا کہ سارے نیک اعمال مسلمانوں کو مفید ہیں،گمراہوں،بے دینوں کو نہیں،دوائیں زندہ کو فائدہ پہنچاتی ہیں نہ کہ مُردوں کو۔‘‘وضو کے بعد پڑھنے والے اَذکار:اِمَام اَبُو زَکَرِیَّا یَحْیٰی بِنْ شَرف نَوَوِیعَلَیْہِ رَحْمَۃُ اللّٰہِ الْقَوِیاس حدیث کی شرح میں فرماتے ہیں:اس حدیث سے پتا چلا کہ وضو کرنے والے کے لیے وضو کے بعدکلمۂ شہادت پڑھنا مستحب ہے اور یہ بخاری و مسلم دونوں کی روایت میں ہے۔ وضو کرنے والے کو چاہیے کہ کلمۂ شہادت کے بعد وہ دعا بھی پڑھ لے جو ترمذی میں ہے”اَللّٰهُمَّ اجْعَلْنِيْ مِنَ التَّوَّابِيْنَ وَاجْعَلْنِي مِنَ المُتَطَهِّرِينَ“ نیز یہ بھی مستحب ہے کہ اس کے ساتھ وہ دعا بھی ملا لے جو امام نسائی نے اپنی کتاب ”عَمَلُ الْيَوْمِ وَاللَّيْلَةِ“ میں روایت کی ہے:”سُبْحَانَكَ اللّٰهُمَّ وَبِحَمْدِكَ اَشْهَدُ اَنْ لَّا اِلٰهَ اِلَّا اَنْتَ وَحْدَكَ لَا شَرِيْكَ لَكَ اَسْتَغْفِرُكَ وَاَتُوْبُ اِلَيْكَ“غسل کرنے والے کے لیے بھی یہ اذکار (غسل کے بعد)پڑھنا مستحب ہیں۔حضرت ابو بکر صدیقرَضِیَ اﷲ عَنْہُکے ساتھ حشر:حدیثِ پاک میں ہے :”اس کے لیے جنت کے آٹھوں دروازے کھول دئیے جاتے ہیں۔“مُفَسِّر شہِیر مُحَدِّثِ کَبِیْرحَکِیْمُ الاُمَّت مُفتِی احمد یار خانعَلَیْہِ رَحْمَۃُ الْحَنَّاناس کی شرح میں فرماتے ہیں: یعنی اس عمل کی برکت سےاﷲتعالیٰ اس کا حشر ابوبکرصدیق (رَضِیَ اﷲ تَعَالٰی عَنْہُ)کے غلاموں میں فرمائے گا کہ وہ ان سرکار کے ساتھ جنت میں جائے گا اور جیسے انہیں ہر دروازہ سے پکارا جائے گا کہ ادھر سے آؤ ایسے ہی ان کے صدقے میں اسے بھی، لہٰذا حدیث پر یہ اعتراض نہیں کہ آٹھوں دروازے کھلنا حضرت صدیق اکبر کی خصوصیات میں سے ہےکیونکہ اس کا یہ داخلہ ان کے صدقے سے ہے۔خیال رہے کہ اگرچہ ہرجنتی داخل ایک ہی دروازہ سے ہوگا مگر ہر دروازہ سے پکاراجانا اس کی عزت افزائی کے لئے ہے۔مدنی گلدستہ’’مستحب‘‘کے5حروف کی نسبت سے حدیثِ مذکور اور اس کی وضاحت سے ملنے والے5مدنی پھول
(1) اچھے طریقے سے تمام سنن و مستحبات کو ادا کرتے ہوئے وضو کرنا چاہیے۔
(2) جو کامل طریقے سے وضو کرنے کے بعد کلمۂ شہادت پڑھے اس کے لیے جنت کے آٹھوں دروازے کھول دئیے جاتے ہیں۔
(3) اَحادیث میں وضو کے بعد کی جو دعائیں اور اذکار مذکور ہیں انہیں پڑھنا چاہیے۔
(4) غسل کرنے والے کے لیے بھی ان دعاؤں کا پڑھنا مستحب ہے۔
(5) وضو کے بعد کلمۂ شہادت پڑھنے والے کا حشر حضرت ابو بکر صدیقرَضِیَ اﷲ تَعَالٰی عَنْہُکے ساتھ ہوگا نیز وضو کرنے والے کو چاہیے کہ کلمۂ شہادت کے بعدیہ دعا بھی پڑھ لے:”اَللّٰهُمَّ اجْعَلْنِيْ مِنَ التَّوَّابِيْنَ وَاجْعَلْنِي مِنَ المُتَطَهِّرِينَ“اور اس دعا کا ملانا بھی مستحب ہے:”سُبْحَانَكَ اللّٰهُمَّ وَبِحَمْدِكَ اَشْهَدُ اَنْ لَّا اِلٰهَ اِلَّا اَنْتَ وَحْدَكَ لَا شَرِيْكَ لَكَ اَسْتَغْفِرُكَ وَاَتُوْبُ اِلَيْكَ“۔اﷲ عَزَّ وَجَلَّہمیں بھی وضو کے بعد کی دعائیں اور اَذکار پڑھنے کی توفیق عطا فرمائے اور ہمیں ان لوگوں میں شامل فرمادے جن کو جنت کے آٹھوں دروازوں سے پکارا جائے گا۔آمِیْن بِجَاہِ النَّبِیِّ الْاَمِیْن صَلَّی اﷲ تَعَالٰی عَلَیْہِ وَاٰلِہٖ وَسَلَّمصَلُّوْا عَلَی الْحَبِیْب! صَلَّی اﷲ تَعَالٰی عَلٰی مُحَمَّد