باب : مُرَاقَبَہ کا بیان - فیضان ریاض الصالحین - حدیث نمبر: 65

علاّمہ نَوَوِی عَلَیْہِ رَحْمَۃُ اللہ الْقَوِی اسی حدیث کے تحت الفاظِ حدیث کے معانی بیان کرتے ہوئے فرماتے ہیں :
’’اَلنّاقَۃُ العُشَرَآئکا معنی ہے، حاملہ اونٹنی۔ اَنْتَجَجبکہ ایک روایت میں ’’نَتَجَ‘‘ ہے، اس کا معنی ہے’’ اس نے بچہ جنا‘‘ اونٹنی کے لئے لفظ ِ’’نَاتِج‘‘ ایسے ہی ہے جیسے عورت کے لئے لفظ قابِلہ( یعنی دایہ ) ۔ ’’وَلَّدَ ھذا‘‘اس کا معنی ’’ وہ جانور کے بچے کا مالک بنا ‘‘اور یہ ’’اَنْتَجَ فِی الناقۃ‘‘ کا ہم معنی ہے ۔ ’’مُوَلِّدٌ، نَاتِج اورقَابَلَۃ‘‘ یہ تینوں ہم معنی ہیں لیکن یہ( ناتِج) حیوان کے لئے ہے اور’’قابلۃ‘‘ غیر حیوان کے لئے استعمال ہوتا ہے۔ ’’اِنْقَطَعَتْ بِیَ الْحِبَالُ‘‘ یعنی میرے اسباب منقطع ہو گئے ۔’’لَا اَجْھَدُکَ‘‘ اس کا معنی یہ ہے کہ تو جو بھی مال مجھ سے لے گا یا طلب کرے گا اس کی واپسی کی تکلیف تجھے نہ دونگا۔ جبکہ بخاری شریف کی روایت میں ’’لا اَحْمَدُکَ‘‘ہے جس کا معنی یہ ہے کہ جس مال کی تجھے ضرورت ہے اس کے چھوڑنے پر تیری تعریف نہیں کروں گا۔ جیسا کہ کہا جاتاہے : لَیْسَ عَلٰی طُوْلِالْحَیَاۃِ نَدَمٌ ۔یعنی لمبی زندگی کے ختم ہونے پر کوئی پشیمانی نہیں۔
عَلَّامَہحَافِظاِبنِ حَجَرعَسْقَلَانِی قُدِّسَ سِرُّہُ النُّوْرَانِی فَتْحُ البارِی میں فرماتے ہیں : حدیث ِمذکورمیں کفرانِ نعمت (نا شکری کرنے) سے ڈرایا گیا ہے اور نعمت پر شکر کرنے کی ترغیب دی گئی ہے ، اور یہ کہ بندہ اس بات کا اعتراف کرے کہ یہ نعمت اللہ عزَّوَجَلَّ ہی نے دی ہے اور اس نعمت پر اللہ عزَّوَجَلَّ کی حمد و ثنا کرے۔ اس حدیث میں صَدَقہ کرنے کی فضیلت بیان ہوئی اور غریب و مسکین لوگوں کے ساتھ نرمی کرنے ، ان کا اِکرام کرنے اور ان کی حاجت و ضرورت پوری کرنے کی ترغیب دلائی گئی ہے اور بُخل سے منع کیا گیا ہے کیونکہ بخل انسان کو جھوٹ اور اللہ عزَّوَجَلَّ کی نعمتوں کی ناشکری پر اُکساتا ہے ۔ (فتح الباری، کتاب احادیث الانبیائ، باب حدیث ابرص واعمی الخ، ۷/۴۱۹ تحت الحدیث:۳۴۶۴)عقل مند نابیناعلامہ بَدْرُالدِّیْنعَیْنِی عَلَیْہِ رَحْمَۃُ اللہ الْغَنِی عمدۃُ القاری میں فرماتے ہیں :امام کِرْمَانِی قُدِّسَ سِرُّہُ النُّوْرَانِی نے فرمایا :’’ اس بات میں کوئی شک نہیں کہ نابینا کی عقل باقی دونوں کے مقابلہ میں زیادہ درست تھی کیونکہ کوڑھ کا مرض اسی وقت ہوتا ہے جب طبیعت و مزاج میں فساد واقع ہو اور یہی معاملہ گنج پن کا بھی ہے جبکہ نابینائی کے لئے طبیعت و مزاج کا فساد ضروری نہیں یہ مرض کسی امر خارج کی وجہ سے بھی لاحق ہوسکتا ہے ۔ (عمدۃ القاری،کتاب احادیث الانبیاء ، باب حدیث ابرص واعمی… الخ، ۱۱/۲۱۶ تحت الحدیث:۳۴۶۴)
فرشتے نے جو کہاکہ ’’میں ایک مسکین و مسافر ہوں میرے تمام اسباب ضائع ہو گئے ہیں ‘‘
اس کے تحت مُفَسِّر شہِیرحَکِیْمُ الْاُمَّت حضرتِ مُفتِی احمد یار خان عَلَیْہِ رَحْمَۃُ الْحَنَّان فرماتے ہیں ’’علمی لحاظ سے یہ جملہ خبریہ نہیں کہ اسے جھوٹ کہا جائے بلکہ تَخْیِیْل ہے، یہ تَخْیِیْل امتحانات اور سوالات میں کام آتی ہے جیسے مسئلہ پوچھا جاتا ہے کہ زید نے اپنے بیوی کو طلاق دی حالانکہ شہر میں نہ کوئی زید ہوتا ہے نہ اس کی بیوی فقط صورتِ مسئلہ پیش کی جاتی ہے، قراٰنِ کریم فرمارہا ہے کہ داؤد عَلَیْہِ السَّلام کے پاس دو فرشتے شکلِ انسانی میں آئے اُن میں سے ایک بولا،{ إِنَّ ہٰذَا أَخِی لَہُ تِسْعٌ وَتِسْعُوْنَ نَعْجَۃً } ’’یعنی میرے اس بھائی کے پاس ننانوے بکریاں ہیں اور میرے پاس ایک‘‘ حالانکہ وہاں نہ بکریاں تھیں اور نہ ہی کوئی جھگڑا، لہٰذا اس پر یہ اعتراض نہیں کہ فرشتے نے جھوٹ کیوں کہا۔‘‘ (مراٰۃ المناجیح، ۳/۸۳)
حضرتِ سَیِّدُنامُلَّا عَلِی قَارِیعَلَیْہِ رَحْمَۃُ اللہ الْبَارِی مرقاۃ شرحِ مِشْکاۃ میں فرماتے ہیں:’’ان تینوں کا یہ امتحان دنیا والوں کے سامنے انکے احوال ظاہر کرنے اورلوگوں کوان کے حالات بتانے کے لئے تھا (تاکہ لوگ ان کے اس واقعہ سے عبرت حاصل کریں )۔ (مرقاۃ المفاتیح ،کتاب الزکاۃ،باب الانفاق وکراہیۃ الامساک۴/۳۸۰ تحت الحدیث:۱۸۷۸)
بِ اللہ ثُمَّ بِکَ(یعنی اللہ عزَّوَجَلَّ کی مدد اورپھر تیری مدد)اس عبارت میں انتہائی ادب کا پہلو ہے کہ فرشتے نے پہلے اللہ عزَّوَجَلَّ سے مدد کا ذکر کیا پھر حرفِ عطف ’’و‘‘ کے بجائے لفظِ ’’ثُمّ‘‘ استعمال کیا۔ ثُمّ کے بعد جس شے کو ذکر کیا جائے اس کا مقام اپنے پہلے والے سے کم ہوتا ہے۔
اَلْحُقُوْقُ کَثِیْرَۃٌیعنی اہل وعیال اورنوکرچاکر بہت رکھتا ہوں جن کے باعث اخراجات زیادہ ہیں انہیں کا پورا نہیں ہوتا تمہیں اونٹ کہاں سے دوں ؟ وہ برص والا جھوٹ بول رہا تھااور (اپنے زُعمِ فاسد میں ) فرشتے کو ٹالنے کی کوشش کررہاتھا۔ (مرقاۃ المفاتیح، کتاب الزکاۃ، باب الانفاق وکراہیۃ الامساک، ۴/۳۸۳، تحت الحد یث:۱۸۷۸)
تُوْبُوْا اِلَی اللہ اَسْتَغْفِرُ اللہمدنی گلدستہ
’’رَمَضان المبارک‘‘ کے 12 حروف کی نسبت سے حد یثِ مذکور اور اسکی وضاحت سے ملنے والے12مدنی پھول(1)مُفَسِّر شہِیرحَکِیْمُ الْاُمَّت مُفتِی احمد یار خان عَلَیْہِ رَحْمَۃُ الْحَنَّان فرماتے ہیں : اللہ عزَّوَجَلَّ کے مقبول بندے اللہ عزَّوَجَلَّ کی عطاسے دافع البلاء ہوتے ہیں۔ دیکھو گنج کوڑھ، اندھا پن سخت بلائیں ہیں جو فرشتے کے ہاتھ لگتے ہی جاتی رہیں ، یوسف عَلَیْہِ السَّلام کی قمیص یعقوب عَلَیْہِ السَّلام کی سفید آنکھ پر لگی تو آنکھ روشن ہوگئی(سورہ ٔ یوسف ) قرانِ حکیم میں حضرتِ سَیِّدُناعیسیٰ عَلَیْہِ السَّلام نے اعلانِ عام فرمایا تھا:وَ اُبْرِئُ الْاَكْمَهَ وَ الْاَبْرَصَ وَ اُحْیِ الْمَوْتٰى بِاِذْنِ اللّٰهِۚ-(پ:۳، الِ عمران:۴۹)
ترجمۂ کنز الایمان :اور میں شفا دیتا ہوں مادر زاد اندھے اور سپید داغ والے کو،اور میں مردے جِلاتا ہوں اللہ کے حکم سے
درود تاج میں جو آتا ہے ’’دافع البلاء والوبائ…الخ ‘‘ اس کاماخذ قراٰن کریم کی یہ آیات اور احادیث ہیں۔ جب اَطِبَّاء کی گولیاں اور جنگل کی جڑی بوٹیاں دافعِ قبض اور دافعِ جِریان ہوسکتی ہیں ، ایک شربت کا نام’’ شربتِ فریاد رَس‘‘ ہو سکتا ہے تو کیا اللہ عزَّوَجَلَّ کے محبوبوں کا درجہ ان چیزوں سے بھی کم ہے؟(مراٰۃ المناجیح ، ۳/۸۳)
حاکم ،حکیم داد و دوا دیں یہ کچھ نہ دیں
مَردُود یہ مراد کس آیت خبر کی ہے
(2) ربّ تعالیٰ کے ساتھ بندوں سے بھی امداد لینا جائز ہے اور بندے کا ذکر اللہ عزَّوَجَلَّ کے ذکر کے ساتھ ملا کر کر سکتے ہیں رب تعالیٰ فرماتا ہےاَغْنٰىهُمُ اللّٰهُ وَ رَسُوْلُهٗ مِنْ فَضْلِهٖۚ-(پ۱۰، التوبہ:۷۴)
ترجمۂ کنز الایمان : اللہ و رسول نے انہیں اپنے فضل سے غنی کردیا۔
فرشتے گناہوں سے معصوم ہوتے ہیں۔اگرغَیرُ اللہ سے مدد مانگنا ناجائز ہوتا تو فرشتہ اللہ عزَّوَجَلَّ کے علاوہ سوا کسی اور سے ہرگز مدد نہ مانگتا ۔ لیکن اس نے کہا :بِ اللہ ثُمَّ بِک‘‘(یعنی اللہ عزَّوَجَلَّ کی مدد پھر تیری مدد) ۔ یہ حدیث پاک حضور صَلَّی اللہ تَعَالٰی عَلَیْہِ وَاٰلِہٖ وَسَلَّم نے خود اپنے صحابۂ کرامعَلَیْہم الرِّضْوَان کو ارشاد فرمائی اگر اس میں کوئی بات شریعت کے خلاف ہوتی تو حضور صَلَّی اللہ تَعَالٰی عَلَیْہِ وَاٰلِہٖ وَسَلَّم ا س سے ضرور منع فرماتے ۔معلوم ہوا کہ اللہ عزَّوَجَلَّ کو ہرشے کامالکِ حقیقی مانتے ہوئے اس کے نیک بندوں سے مدد مانگنا بالکل جائز ہے اس میں کسی قسم کی کوئی قباحت نہیں۔
(3 )ہر شخص کو اپنی اصلی فقیری اور گزشتہ مصیبتیں یادرکھنی چاہئیں کہ یہ شکر کا ذریعہ ہیں۔
(4) بد نصیب ہے وہ شخص جو عیش وطَیش (غصے ) میں اپنے رب کو بھول جائے اور جب کوئی یاد دِلائے تواپنی غلطی تسلیم کرنے کے بجائے جھوٹ سے کام لے۔
(5) فقیروں کے بھیس میں کبھی کبھی مقبول بندے بھی آجاتے ہیں لہٰذا فقیروں کوجھِڑکنا نہیں چاہیے۔
( 6) اس حدیث سے معلوم ہوا کہ جو بندہ واقعی حاجت مند ہو اس کے سامنے اپنا سارا مال رکھ دینا کہ جتنی اسے حاجت ہو لے لے یہ اعلیٰ ترین سخاوت ہے۔
(7) فرشتے ہر شکل میں آسکتے ہیں۔
(8) بخل انسان کو ناشکری اور جھوٹ پر اُبھارتا ہے ۔بخیل دنیا وآخرت میں نقصان اُٹھا تا ہے ۔
(9) سخاوت و غریب پَروَرِی سے اللہ عزَّوَجَلَّ کی رضا نصیب ہوتی ہے ۔
(10) بندے کو چاہیے کہ حسب ِموقع اپنا مُحاسَبہکرتا رہے کہ اس سے اصلاح کی توفیق ملتی رہتی ہے ۔
(11) شکر وسخاوت سے نعمتیں بڑھ جاتی ہیں جو نعمتوں کو محفوظ کرنا چاہے اسے اپنے رب عزَّوَجَلَّ کا شکر ادا کرتے رہنا چاہیے۔
(12)انسان کو یہ یقین رکھنا چاہیے کہ میری تمام نعمتیں اللہ عزَّوَجَلَّ کی طرف سے ہیں وہ جب چاہے ان نعمتوں کو لے سکتا ہے۔ ہر حال میں اپنے رب کا شکر کرنے والا کبھی مایوس نہیں ہوتا ۔
صَلُّوْا عَلَی الْحَبِیْب صَلَّی اللہ تَعَالٰی عَلٰی مُحَمَّد
اللہ عزَّوَجَلَّ ہمیں ہر آن اپنا شکر گزار رکھے ہمیں زوالِ نعمت سے بچائے اپنی دائمی رضا سے مالا مال فرمائے۔ اٰمِیْن بِجَاہِ النَّبِیِّ الْاَمِیْن صَلَّی اللہ تَعَالٰی عَلَیْہِ وَاٰلِہٖ وَسَلَّم