باب:زکوٰۃ کی فرضیت و فضیلت کابیان - فیضان ریاض الصالحین - حدیث نمبر: 1209

زکوٰۃ ایمان کی علامت:میٹھے میٹھے اسلامی بھائیو!حدیثِ مذکور میں جان و مال کی حفاظت کو تین امور پرموقوف رکھا گیا ہےچونکہ اس زمانۂ مبارکہ میں اسلام میں نئےفرقے نہ بنے تھے کلمہ ونماز اورزکوٰۃ ایمان کی علامت تھے جو ان کا پابند ہوتا اسے مسلمان سمجھا جاتا، اس دور میں کفارہی ان اعمال سے دور رہتے تھے ورنہ ہر مسلمان ان کا پابند تھا ۔اس لئےان تین اعمال کی ادائیگی پرجان و مال کی حفاظت کو موقوف رکھا گیا اور فرمایا گیا کہ جو یہ امور بجالائے گااس کا جان و مال محفوظ ہوجائے گا اس سے جہاد نہ کیا جائے گا چونکہ وہ اب مسلمان ہوگیا اس لئے اس کے ساتھ مسلمانوں والا سلوک کیا جائے گا،مگراسلام میں جرائم کی جو سزائیں مقررہیں وہ معاف نہ ہوں گی اگر کوئی اسلام لانے کے بعد کسی جرم کا مرتکب ہوا اور اس کا جرم ثابت ہوگیا تو اسے اس کے جرم کی سزادی جائے گی۔اگر کسی نے منافقانہ رَوِش اختیار کی اوراپنے آپ کو مسلمان ظاہر کرنےکے لئےکلمہ بھی پڑھ لیا، نماز وزکوۃ کا بھی پابند ہوگیا مگر دلی طورپر وہ کافرہی ہے تو اس کا معاملہاﷲ عَزَّ وَجَلَّکے سپرد ہے جو دلوں میں پیدا ہونے والے خیال بھی جانتاہے ،ہمیں یہی حکم ہے کہ ظاہر پر عمل کرتے ہوئے اسے مسلمان ہی سمجھیں اور اس کے ساتھ مسلمانوں والا سلوک کریں ۔