باب: راز داری کا بیان - فیضان ریاض الصالحین - حدیث نمبر: 687

خاتون جنت رازدارِمصطفےٰ:مُفَسِّرشہِیرمُحَدِّثِ کَبِیْرحَکِیْمُ الْاُمَّت مُفتِی احمد یار خانعَلَیْہِ رَحْمَۃُ الْحَنَّانفرماتے ہیں:”حضرت فاطمہ(رَضِیَ اللّٰہ تَعَالٰی عَنْہِا)سر سے پاؤں تک ہم شکل مصطفےٰ تھیں، آپ کی چال ڈھال ہر وضع قطع حضور کے مشابہہ تھی۔اللّٰہنے رسول کی جیتی جاگتی تصویر بنایا تھا۔حضور جب فاطمہ زہرا کو آتے دیکھتے تو خوشی میں کھڑے ہوجاتے تھے پیشانی اور ہاتھ کو بوسہ دیتے تھے،اپنی جگہ بٹھالیتے تھے یہ واقعہ وفات شریف سے بالکل قریب ہی واقعہ ہوا۔تمام اَزواجِ پاک موجود تھیں مگر یہ راز کی بات صرف جناب فاطمہ(رَضِیَ اللّٰہ تَعَالٰی عَنْہِا)سے فرمائی آپ صاحب راز ہیں۔ جناب فاطمہ نے اپنی قوتِ اِجتہادیہ سے معلوم فرمالیا تھا کہ حضور کی حیات شریف میں یہ (راز کی)بات چھپانے کی تھی کیونکہ اس میں حضور کی وفات کی خبر تھی قبل از وقت اس کا اظہار مناسب نہ تھا اب جبکہ وفات شریف ہوچکی وہ راز نہ رہی اس لیے اب بیان فرمادیا۔ظاہر یہ ہے کہ قرآن سے مراد سارا قرآنِ مجید ہے حضرت جبریلعَلَیْہِ السَّلَامہر ماہ رمضان میں پورے قرآن کا حضور کے ساتھ دور کرتے تھے مگر اس دور کا نام نزولِ قرآن نہ تھا نزول تو وہ تھا جو حسب موقع آیات کا ورود ہوتا تھا اس سے معلوم ہوا کہ ماہ رمضان میں قرآنِ مجید کا دور کرنا سنت رسولی بھی ہے اور سنت جبریلی بھی کہ ایک پڑھے دوسرا سنےپھر وہ پڑھے یہ سنے۔یہ واقعہ یعنی دوبار ایک ماہ میں دور فرمانا پندرہ دن میں دورہ ختم کر دینا حضور کے آخری رمضان شریف میں ہوا اور حضرت فاطمہ سے حضور کا یہ فرمان رمضان کے بعد تھا۔اس سے یہ بھی معلوم ہوا کہ حضورصَلّی اللّٰہ عَلَیْہِ وَسَلَّماَوَّل ہی سے سارے قرآن سے واقف تھے،جسے قرآن نہ آتا ہو اس کے ساتھ دور نہیں کیا جاتا بلکہ اسے پڑھایا جاتا ہے،یہ بھی معلوم ہوا حضورِ انورصَلَّی اللّٰہ عَلَیْہِ وَسَلَّمکو اپنی وفات کی خبر تھی کہ اگلے رمضان سے پہلے ہماری وفات ہوجاوے گی۔(تماللّٰہ عَزَّ وَجَلَّسے ڈرتی رہنا اور صبر کرنا،میں تمہارا بہترین پیش رو ہوں) یعنی اے فاطمہ جیسے تم ہماری حیات شریف میں طیبہ طاہرہ متقیہ صابرہ رہی ہو ایسے ہی ہماری وفات کے بعد بھی رہنا تمہارے پائے استقلال میں جنبش نہ آنے پائے آپ نے اس پر عمل کرکے دکھا دیا۔رونا صبر کے خلاف نہیں نوحہ پیٹنا،ماتم کرنا صبر کے خلاف ہے یہ آپ نے کبھی نہیں کیا۔پیش رو وہ جوکسی کے آگے کسی مقام پر جاکر اس کا انتظام وغیرہ کرے یعنی ہم تم سے پہلے جارہے ہیں جب تم آؤ گی تو ہم تمہارے انتظار میں ہوں گے تمہارا گھر بار ساز و سامان ہماری نگرانی میں سب تیار ہوچکا ہوگا۔سُبْحَانَ اللّٰہ! (اے فاطمہ!)مؤمن مردوں کی بیویوں کی تم سردار ہوگی لہٰذا جناب فاطمہ ازواج مطہرات خصوصا جناب عائشہ صدیقہ اور خدیجۃ الکبریٰ (رَضِیَ اللّٰہ تَعَالٰی عَنْہُمَا)کی سردار نہیں کہ وہ بیویاں (عام)مؤمنین کی بیویاں نہیں بلکہ حضور نبی کریمصَلّی اللّٰہ عَلَیْہِ وَسَلَّمکی بیویاں ہیں۔سُبْحَانَ اللّٰہ! کیسی پیاری اور جامع عبارت ارشاد فرمائی۔سیدہ فاطمہرَضِیَ اللّٰہ عَنْہَاکی فضیلت:مذکورہ حدیث پاک کے تحت شیخ عبدالحق محدث دہلویعَلَیْہِ رَحْمَۃُ اللّٰہ الْقَوِیفرماتے ہیں:”سیدہ فاطمہرَضِیَ اللّٰہ تَعَالٰی عَنْہِاعادت،ہیئت اور رفتار میں نبی اکرمصَلَّی اللّٰہ تَعَالٰی عَلَیْہِ وَاٰلِہٖ وَسَلَّمکے مشابہ تھیں۔ایک روایت میں ہے کہ جب سَیِّدَتُنَا فاطمہ زہرارَضِیَ اللّٰہ تَعَالٰی عَنْہِانبی کریمصَلَّی اللّٰہ تَعَالٰی عَلَیْہِ وَاٰلِہٖ وَسَلَّمکی خدمت میں حاضر ہوتیں تو آپ کھڑے ہوجاتے اور انہیں بوسہ دیتے اور جب نبی پاکصَلَّی اللّٰہ تَعَالٰی عَلَیْہِ وَاٰلِہٖ وَسَلَّمان کے پاس تشریف لے جاتے تو وہ بھی اسی طرح کرتیں۔اس حدیث پاک سے بزرگوں اور دوستوں کے راز کو دوسروں سے مخفی رکھنے کا مستحب ہونا معلوم ہوتا ہےمرید جو مشائخ کےراز مخفی رکھتے ہیں تو اس کی سند یہی حدیث پاک ہے۔‘‘حدیث پاک سے ماخوذ دو فوائد:عَلَّامَہ اَبُو الْحَسَن اِبْنِ بَطَّال رَحْمَۃُاللّٰہ تَعَالٰی عَلَیْہمذکورہ حدیث سے ماخوذ دو فوائد ذکر کرتے ہوئے فرماتے ہیں:(1)اس حدیث سے معلوم ہوا کہ جماعت کے سامنےکسی ایک سے راز کی بات کرنا جائز ہے کیونکہ نبی اکرمصَلَّی اللّٰہ تَعَالٰی عَلَیْہِ وَاٰلِہٖ وَسَلَّمنے جو منع فرمایا ہے کہ ”ایک آدمی دوسرے کو چھوڑ کر تیسرے سے سرگوشی نہ کرے۔“تو اس کا معنیٰ یہ ہے کہ اُس دوسرے آدمی کو خطرہ ہوگا کہ شاید میرے خلاف بات کی جارہی ہے اور جب جماعت کے سامنے کسی ایک سے راز کی بات جائے گی تو پھر خطرہ نہیں ہوگا ۔(2)جب کسی کا راز دوسروں کو بیان کرنے میں ضرر کا خطرہ ہو تو پھر اس راز کو ظاہر نہ کیا جائےکیونکہ حضرت فاطمہرَضِیَ اللّٰہ تَعَالٰی عَنْہِااگر نبی پاکصَلَّی اللّٰہ تَعَالٰی عَلَیْہِ وَاٰلِہٖ وَسَلَّمکی ازواج کے سامنے اس وقت بتادیتیں کہ نبیصَلَّی اللّٰہ تَعَالٰی عَلَیْہِ وَاٰلِہٖ وَسَلَّمنے یہ خبر دی ہے کہ عنقریب آپ کی وفات ہوجائے گی تو اَزواجِ مطہرات کو شدید غم لاحق ہوتا۔ اسی طرح اگر وہ یہ بتادیتیں کہ وہ تمام مؤمنین کی عورتوں کی سردار ہیں تو یہ بات اُن پر شاق گزرتی اور اُن کا غم شدید ہوجاتا لیکن نبی پاکصَلَّی اللّٰہ تَعَالٰی عَلَیْہِ وَاٰلِہٖ وَسَلَّمکی وفاتِ ظاہری کے بعد اُن کو یہ خطرہ نہیں تھا تو انہوں نے یہ خبر دے دی۔مدنی گلدستہ’’فاطمہ ‘‘کے5حروف کی نسبت سے حدیثِ مذکور اور اس کی وضاحت سے ملنے والے5مدنی پھول
(1) حضرت فاطمہرَضِیَ اللّٰہ تَعَالٰی عَنْہِاعادت،ہیئت اور رفتارمیں حضورعَلَیْہِ السَّلَامکے مشابہ تھیں۔
(2) حضرت جبریلعَلَیْہِ السَّلَامہر ماہ رمضان میں پورے قرآن کا حضور کے ساتھ دور کرتے تھے۔
(3) ماہِ رمضان المبارک میں قرآنِ مجید کا دور کرنا سنت رسول ہونےکے ساتھ سنت جبریل بھی ہے ۔
(4) رونا صبر کے خلاف نہیں نوحہ پیٹنا،ماتم کرنا صبر کے خلاف ہے۔
(5) بزرگوں اور دوستوں کے راز کو دوسروں سے مخفی رکھنا چاہیے۔اللّٰہ عَزَّ وَجَلَّہمیں بڑوں اور دوستوں کے راز چھپانے کی توفیق عطا فرمائے۔آمِیْن بِجَاہِ النَّبِیِّ الْاَمِیْن صَلَّی اللّٰہ تَعَالٰی عَلَیْہِ وَاٰلِہٖ وَسَلَّمصَلُّوْا عَلَی الْحَبِیْب! صَلَّی اللّٰہ تَعَالٰی عَلٰی مُحَمَّد