امانت کی ادائیگی کے احکام - فیضان ریاض الصالحین - حدیث نمبر: 202

ظالم و مظلوم سے کیا مرادہے؟حدیث پاک میں ہے کہ حضرت سیدنا زبیر بن عوام رَضِیَ اللہُ تَعَالٰی عَنْہُ نے فرمایا : ’’ آج کے دن ظالم یا مظلوم قتل ہوگا ۔ ‘‘اس کی وضاحت کرتے ہوئے عَلَّامَہ اَبُو الْحَسَن اِبْنِ بَطَّال عَلَیْہِ رَحْمَۃُ اللّٰہِ ذیالْجَلَال فرماتے ہیں : ’’اس کا مطلب یہ ہے کہ اپنے مخالف کے نزدیک ظالم ہے اوراپنے نزدیک مظلوم اگر قتل کردیا جائے۔ حضرت سیدنا زبیر بن عوام رَضِیَ اللہُ تَعَالٰی عَنْہُ کی مراد یہ ہےکہ صحابہ کرام عَلَیْہِمُ الرِّضْوَان کا آپس میں قتال کرنا باغیوں اور تعصب پرستوں کے قتال کی طرح نہیں جس میں قاتل و مقتول دونوں ظالم ہوتے ہیں جیسا کہ رسولُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم کا فرمان ہے کہ “ جب دو مسلمان تلوار لے کر لڑیں تو قاتل و مقتول دونوں جہنمی ہیں۔ “ کیونکہ ان میں سے کسی کے پاس کوئی ایسی تاویل نہیں ہوتی جو کہ اللہ عَزَّوَجَلَّ کے ہاں عذر بن سکےلہذا ان میں کوئی بھی مظلوم نہیں دونوں ظالم ہیں۔ حضرت سیدنا زبیر رَضِیَ اللہُ تَعَالٰی عَنْہُ نے اپنے بیٹے سیدنا عبداللہ بن زبیر رَضِیَ اللہُ تَعَالٰی عَنْہُ سے فرمایا : ’’ میں مظلوم قتل کیا جاؤں گا۔ ‘‘ کیونکہ انہوں نے جنگ
 
کرنے کا ارادہ نہیں کیا تھا اسی لئے جب دونوں لشکر آپس میں ملے تو وہ وہاں سے لوٹ گئے ، پس ابن جرموز نے ان کا پیچھا کیا اور راستے میں انہیں بغیر کسی قتال کے شہید کردیا۔ ممکن ہےکہ حضرت زبیر نے نبی کریم صَلَّی اللہُ تَعَالٰی عَلَیْہِ وَاٰلِہٖ وَسَلَّم کا یہ قول سن لیا ہو کہ’’صفیہ کے بیٹے کے قاتل کو جہنم کی خوشخبری دو‘‘اسی لئے انہوں نے کہا تھا کہ آج میں مظلوم قتل کیا جاؤں گا۔ ( )مسلمانوں کی خیر خواہی:میٹھے میٹھے اسلامی بھائیو! صحابہ کرام عَلَیْہِمُ الرِّضْوَان میں مسلمانوں کی خیر خواہی کا کس قدر جذبہ ہوا کرتا تھا وہ دوسرے مسلمان بھائیوں کے فائدے اور نقصان کے بارے میں کس قدر سوچتے تھےاور پھر وہ کام کرتے جس میں دوسرے مسلمان کا فائدہ ہو جیسا کہ مذکورہ حدیث میں حضرت زبیر رَضِیَ اللہُ تَعَالٰی عَنْہُ لوگوں سے امانت لیتے وقت کہہ دیتے کہ یہ مجھ پر قرض ہے ۔ چنانچہ علامہ عینی رَحْمَۃُ اللہِ تَعَالٰی عَلَیْہ فرماتے ہیں : حضرتِ سَیِّدُنا زبیر رَضِیَ اللہُ تَعَالٰی عَنْہُ پر اتنا قرض ہونے کی وجہ یہ تھی کہ جب لوگ آپ کے پاس امانت رکھوانے آتے تو آپ رَضِیَ اللہُ تَعَالٰی عَنْہُ اُن سے کہتے کہ یہ میرے پاس امانت نہیں بلکہ قرض ہے ، وہ ایسا اس لئے کرتے تھے کہ اگر مال ضائع ہوگیا تو لوگ یہ گمان کریں گے کہ انہوں نےاس کی حفاظت میں کوتاہی کی ہے(کیونکہ امانت اگر ضائع ہوجائے تو مالک مطالبہ نہیں کرسکتا)اور اگر مال بطورِ قرض رکھا ہو تو ضائع ہونے کی صورت میں بھی واجب الادا( مالک کو اتنا مال دینا لازم) ہوگا اور یہ صاحبِ مال کے لئے زیادہ محفوظ ہے۔ ‘‘( )قرض کےمعاملے میں احتیاط:صحابہ کرام عَلَیْہِمُ الرِّضْوَان امانت اور قرض کے معاملے میں کس قدر احتیاط فرمایا کرتے تھےکہ جب حضرتِ سَیِّدُنازبیر رَضِیَ اللہُ تَعَالٰی عَنْہُ کو یوم جمل اپنی شہادت کا گمان ہوا تو انہوں نے اپنے بیٹے عبداللہ بن زبیر رَضِیَ اللہُ تَعَالٰی عَنْہُ کو اپنے قرض کے بارے میں وصیت کی کہ تم سب سے پہلے میرے مال سے میرا قرض ادا کردینا۔ چنانچہ مذکورہ حدیث سے ہمیں یہ سبق ملتا ہے کہ ہمیں بھی چاہیے کہ جس کا قرض یا امانت ہو جلد از
 
جلد اسے ادا کر دیں اور اگر ابھی مال نہ ہو تو اس قرض اور امانت کے بارے میں اپنے ورثاء کو بتا دیں کہ مجھ پر اتنا اتنا اور فلاں فلاں کا قرض یا امانت ہے وہ ادا کردینا کیونکہ موت کا کیا معلوم کب کس وقت آجائے اور ہم قرض کا بار اپنے ساتھ لے کر اس دنیا سے چلے جائیں ۔حضرت سیدنا زبیر بن عوام کی مختصر حیاتِ طیبہ:حضرت سیدنا زبیر بن عوام رَضِیَ اللہُ تَعَالٰی عَنْہُ حضور نبی کریم رؤف رحیم صَلَّی اللہُ تَعَالٰی عَلَیْہِ وَاٰلِہٖ وَسَلَّم کی پھوپھی حضرت سیدتنا صفیہ رَضِیَ اللہُ تَعَالٰی عَنْہَا کے فرزند ہیں ، اس لیے یہ رشتے میں سرکار صَلَّی اللہُ تَعَالٰی عَلَیْہِ وَاٰلِہٖ وَسَلَّم کے پھوپھی زاد بھائی ، حضرت سیدنا خدیجہ رَضِیَ اللہُ تَعَالٰی عَنْہَا کے بھتیجے ، حضرت سیدنا صدیق اکبر رَضِیَ اللہُ تَعَالٰی عَنْہُ کے دامادہیں۔ سیدنا زبیر بن عوام رَضِیَ اللہُ تَعَالٰی عَنْہُ عشرہ مبشرہ یعنی ان دس خوش نصیب صحابہ کرام عَلَیْہِمُ الرِّضْوَان میں سے ہیں جن کو حضور نبی رحمت شفیعِ اُمَّت صَلَّی اللہُ تَعَالٰی عَلَیْہِ وَاٰلِہٖ وَسَلَّم نے جنتی ہونے کی خوشخبری عطا فرمائی۔ آپ رَضِیَ اللہُ تَعَالٰی عَنْہُ کی آنکھیں نیلی ، شانے قدرے جھکے ہوئے ، بال خوب گھنے ، رخسار اور ریش مبارک ہلکی اور پتلی ، رنگت گندمی اور قد طویل تھا۔ سب سے پہلے سرکار نامدار ، مدینے کے تاجدار صَلَّی اللہُ تَعَالٰی عَلَیْہِ وَاٰلِہٖ وَسَلَّم کی حفاظت وحمایت میں تلوار اٹھانے کی سعادت سیدنا زبیر بن عوام رَضِیَ اللہُ تَعَالٰی عَنْہُ ہی کو حاصل ہوئی ، حبشہ کی طرف ہجرت کرنے والوں میں آپ رَضِیَ اللہُ تَعَالٰی عَنْہُ سب سے کم سن مہاجر تھے ، نہایت ہی بہادر تھے ، کئی جنگوں میں اپنی بہادری کے جوہر دکھائے ، غزوۂ خیبر کے موقع پر ایک دیوہیکل یہودی پہلوان کو واصل جہنم کیا۔ امیر المؤمنین حضرت سیدنا علی المرتضیٰ شیر خدا کَرَّمَ اللہُ تَعَالٰی وَجْہَہُ الْکَرِیْم فرماتے ہیں کہ میں نے اپنے کانوں سے حضور نبی کریم رؤف رحیم صَلَّی اللہُ تَعَالٰی عَلَیْہِ وَاٰلِہٖ وَسَلَّم کو یہ فرماتے سنا کہ ’’طلحہ اور زبیر جنت میں میرے پڑوسی ہوں گے۔ ‘‘ آپ رَضِیَ اللہُ تَعَالٰی عَنْہُ کو یہ بھی سعادت حاصل ہوئی کہ سرکار صَلَّی اللہُ تَعَالٰی عَلَیْہِ وَاٰلِہٖ وَسَلَّم نے آپ کے لیے ارشاد فرمایا : ’’فِدَاکَ اَبِیْ وَاُمِّیْ یعنی اے زبیر! تم پر میرے ماں باپ قربان۔ ‘‘ امیر المؤمنین حضرت سیدنا عمر فاروق اعظم رَضِیَ اللہُ تَعَالٰی عَنْہُ ارشاد فرماتے ہیں : ’’اگر میں کسی سے کوئی عہد کرتا یا اپنا مال واسباب چھوڑتا تو زبیر بن عوام کو ان کا حق دار بتانا کیونکہ وہ دین کا ایک ستون ہیں۔ ‘‘معاشی حوالے سے انتہائی دیانتدار اور کامیاب تاجر تھے ، مگر سخی ایسے تھے کہ بسااوقات
 
اپنا سارا مال راہِ خدا میں صدقہ کردیا کرتے تھے ، رسولُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم نے آپ کو اپنا حواری ارشاد فرمایا۔ الغرض آپ رَضِیَ اللہُ تَعَالٰی عَنْہُ کی ذاتِ مبارکہ کئی خصوصیات ومبارک اَوصاف کی حامل ہے۔ آپ رَضِیَ اللہُ تَعَالٰی عَنْہُ کی سیرتِ طیبہ کی مزید تفصیل کے لیے دعوتِ اسلامی کے اشاعتی ادارے مکتبۃ المدینہ کا مطبوعہ 72صفحات پر مشتمل رسالہ’’حضرت سیدنا زبیر بن عوام رَضِیَ اللہُ تَعَالٰی عَنْہُ ‘‘ کا مطالعہ بہت مفید ہے۔حضرت سیدنازبیر بن عوام کی شہادت:حضرتِ سَیِّدُنا زبیربن عوام رَضِیَ اللہُ تَعَالٰی عَنْہُ کی شہادت کے بارے میں مختلف اقوال ہیں ۔ مشہور قول یہ ہے کہ حضرت سیدنا زبیر رَضِیَ اللہُ تَعَالٰی عَنْہُ وادی سباع میں سورہے تھے وہاں عَمرو بن جرموز پہنچ گیا اس نے آپ کو سوتے میں شہید کردیا اور آپ کا سر لے کر امیر المؤمنین حضرتِ سَیِّدُنا علی المرتضیٰ شیر خدا کَرَّمَ اللہُ تَعَالٰی وَجْہَہُ الْکَرِیْم کی بارگاہ میں پہنچ گیا ۔ حضرت سیدنا علی کَرَّمَ اللہُ تَعَالٰی وَجْہَہُ الْکَرِیْم کو بتایا گیا کہ ابنِ جرموز حضرت سیدنا زبیر رَضِیَ اللہُ تَعَالٰی عَنْہُ کا سر لے کر آیا ہے تو آپ رَضِیَ اللہُ تَعَالٰی عَنْہُ نے فرمایا : ’’حضرت زبیر رَضِیَ اللہُ تَعَالٰی عَنْہُ کے قاتل کو آگ کے عذاب کی خوشخبری دو۔ ‘‘( )جنگ جمل سن ۳۶ ہجری میں حضرت سیدنا طلحہ بن عُبَیْدُاللہ ، حضرت سیدنا زبیر بن عوام ، اُمُّ المؤمنین حضرت سیدتنا عائشہ صدیقہ رَضِیَ اللہُ تَعَالٰی عَنْہُم اور امیر المؤمنین حضرت سیدنا علی المرتضی شیر خدا کَرَّمَ اللہُ تَعَالٰی وَجْہَہُ الْکَرِیْمکے مابین واقع ہوئی ، اِن کے درمیان جو اختلاف واقع ہوا وہ حضرت عثمانِ غنی رَضِیَ اللہُ تَعَالٰی عَنْہُ کے قصاص کے سبب تھا۔ امیر المؤمنین حضرت سیدنا علی المرتضی شیرخدا کَرَّمَ اللہُ تَعَالٰی وَجْہَہُ الْکَرِیْماس معاملے میں حق پر تھے جبکہ دیگر صحابہ کرام عَلَیْہِمُ الرِّضْوَان اجتہادی خطا پر تھے۔ اور مجتہد سے اجتہاد کرتے ہوئے اگر خطا واقع ہو تو اسے اس پر بھی ثواب دیا جاتا ہے۔ لہذا یہ تمام صحابہ کرام عَلَیْہِمُ الرِّضْوَان ماجور ہوئے۔ اس لیے صحابہ کرام رَضِیَ اللہُ تَعَالٰی عَنْہُم کے درمیان رونما ہونے والے اختلافات کے بارے میں خاموش رہنا واجب ہے کیونکہ اہل سنت کا اس بارے میں اتفاق ہے کہ تمام صحابہ کرا م رَضِیَ اللہُ تَعَالٰی عَنْہُم عادل ہیں اور ان کے درمیان جو اختلاف ہوا اسے اجتہاد پر محمول کیا جائے۔
 
لہذا ان جنگوں کے سبب صحابہ کرام رَضِیَ اللہُ تَعَالٰی عَنْہُم پر طعن کرنا اور انہیں سب و شتم کرنا حرام ہے۔ ( )مدنی گلدستہ
’’مدینہ‘‘کے5حروف کی نسبت سے حدیثِ مذکور
اور اس کی وضاحت سے ملنے والے5مدنی پھول(1) قرض اور امانت کی ادائیگی کی اسلام میں بہت اہمیت ہے ، حتی کہ جلیل القدر صحابہ کرام عَلَیْہِمُ الرِّضْوَان بھی قرض اور امانت کے معاملے میں بہت احتیاط فرمایا کرتےتھے۔
(2) صحابہ کرام عَلَیْہِمُ الرِّضْوَان اپنے دیگر مسلمان بھائیوں کے ساتھ بہت خیر خواہی فرمایا کرتے تھے۔
(3) اپنے مسلمان بھائیوں کو ساتھ ایسا معاملہ کرنا جس میں ان کا فائدہ ہو یہ صحابہ کرام عَلَیْہِمُ الرِّضْوَان کی سنت مبارکہ ہے۔
(4) موت کا کوئی بھروسہ نہیں کسی بھی وقت آسکتی ہے لہذا اگر ہم پر کسی کا قرض ہو یا کسی کی امانت ہو تو اس کی ادائیگی کی وصیت کردینی چاہیے تاکہ وصال کے بعد ورثاء اس کی ادائیگی کردیں۔
(5) حضرت سیدنا زبیر بن عوام رَضِیَ اللہُ تَعَالٰی عَنْہُ قطعی جنتی صحابی تھے کہ خود رسولُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم نے انہیں جنت کی خوشخبری عطا فرمائی تھی مگر اس کے باوجود قرض اور امانت کے معاملے میں بہت محتاط تھے ، ہمیں بھی چاہیے کہ ان کی سیرت طیبہ پر عمل کرتے ہوئے قرض اور امانت وغیرہ حقوق العباد کے معاملے میں احتیاط سے کام لیں۔
اللہ عَزَّوَجَلَّ سے دعا ہے کہ ہمیں بھی صحابہ کرام عَلَیْہِمُ الرِّضْوَان جیسا خیر خواہی کا عظیم جذبہ عطا فرمائے ، قرض اور امانت کے معاملے میں احتیاط کرنے کی توفیق عطافرمائے ، اگر ہم مقروض ہیں یا کسی کی امانت ہمارے پاس ہے تو اس کی جلد از جلد ادائیگی کی توفیق عطا فرمائے۔ آمِیْنْ بِجَاہِ النَّبِیِّ الْاَمِیْنْ صَلَّی اللہُ تَعَالٰی عَلَیْہِ وَاٰلِہٖ وَسَلَّم
صَلُّوْا عَلَی الْحَبِیْب! صَلَّی اللہُ تَعَالٰی عَلٰی مُحَمَّد