باب:روزہ اِفطار کرانے کی فضیلت - فیضان ریاض الصالحین - حدیث نمبر: 1266

روزہ دار مہمان کی تواضع کھانے سے کرسکتاہے:مُفَسِّرِشہِیر مُحَدِّثِ کَبِیْر حَکِیْمُ الْاُمَّت مُفتِی احمد یار خانعَلَیْہِ رَحْمَۃُ الْحَنَّانفرماتے ہیں:”اس سے دو مسئلے معلوم ہوئے:ایک یہ کہ روزہ دار مہمان کی خاطر تواضع کھانے سے کرسکتاہے،ہاں رمضان میں روزہ توڑوں اور روزہ چوروں کو نہ کھانا کھلائے نہ ان کے لیے پکائے کہ یہ گناہ پر مدد ہے،ربّ تعالیٰ فرماتاہے: ﴿وَ لَا تَعَاوَنُوْا عَلَى الْاِثْمِ وَ الْعُدْوَانِ﴾(پ۶، المائدۃ:۲)(ترجمۂ کنزالایمان:اورگناہ اور زیادتی پر باہم مدد نہ دو۔) دوسرے یہ کہ اگر مہمان کی ناراضی کا اندیشہ نہ ہو تو میزبان نفلی روزہ نہ توڑے اور مہمان سے عذرکر دے۔ (فرشتے روزہ دار کے لیے دعائے مغفرت کرتے رہتے ہیں )کیونکہ یہ روزہ دار دو عبادتیں کررہا ہے ایک روزہ، دوسرا کھاناکھاتے دیکھ کر صبر، اس لیے اس کا اجروثواب بھی زیادہ ہے اور فرشتوں کی دعائیں نفع میں۔ظاہر یہ ہے کہ فرشتوں سے مراد اعمال لکھنے والے اور حفاظت کرنے والے فرشتے ہیں۔ “فضیلت سن کرعمل میں رغبت بڑھتی ہے:عَلَّامَہ مُلَّا عَلِی قَارِیعَلَیْہِ رَحْمَۃُ اللّٰہِ الْبَارِیفرماتے ہیں:” جب روزہ دار کے سامنے کھانا کھایا جاتا ہے تو اس کا دل کھانے کی خواہش کرتا ہے جس کے سبب اُس کے لیے روزہ بڑا سخت ہوجاتا ہے لہٰذا اس سختی اور مشقت کے عوض فرشتے اُس کے لیے استغفار کرتے ہیں ۔حضرت سَیِّدَتُنا اُمِّ عمارہرَضِیَ اﷲ تَعَالٰی عَنْہَاکے سامنے یہ فضیلت بیان فرمانے میں حکمت یہ تھی کہ وہ اپنا روزہ خوش دِلی سے پورا کریں۔“صَلُّوْا عَلَی الْحَبِیْب! صَلَّی اﷲ تَعَالٰی عَلٰی مُحَمَّد