باب:رفیقِ سفر کے ساتھ تَعَاوُن کرنے کا باب - فیضان ریاض الصالحین - حدیث نمبر: 970

میٹھے میٹھے اسلامی بھائیو!مذکورہ حدیث میں اپنے رفیق سفر کا خیال رکھنے کی ترغیب دلائی گئی ہے کہ اگر ہمارے ساتھ کوئی ایسا شخص ہو جس کے پاس سواری نہ ہو یا کوئی ضروری چیز موجود نہ ہو تو ہمیں چاہیے کہ ہم اسے اپنے ساتھ سوار کرلیں اور ضرورت کی چیز اسے مہیا کردیں جیسے ہم کہیں جارہے ہوں اور راستے میں کوئی ہم سے لفٹ مانگ لے تو ہمیں چاہیے کہ اسے لفٹ دے دیں یا کسی کی گاڑی میں کوئی خرابی ہوجائے تو اپنی گاڑی سے اس کی گاڑی باندھ کر اسے کسی ورکشاپ یا مکینک تک چھوڑدیں یا اگر ایندھن ختم ہوگیا ہے اور ہمارے پاس کچھ زیادہ ایندھن ہے تو اسے دے دیں یا پھر کسی پیڑول پمپ تک اسے لے جائیں ، اس طرح بہت سے طریقوں سے ہم سفر میں لوگوں کی مدد کر سکتے ہیں۔مدنی گلدستہ’’خیر‘‘کے3حروف کی نسبت سے حدیثِ مذکور اور اس کی وضاحت سے ملنے والے3مدنی پھول
(1) جس کے پاس سواری ہو وہ اپنے ساتھ ایسے شخص کو سوار کرلے جس کے پاس سواری نہ ہو۔
(2) راستے میں کسی کو ہماری مدد کی ضرورت ہو تو ضرور اس کی مدد کرنی چاہیے۔
(3) جب بہت سے لوگ ایک ساتھ سفر کر رہے ہوں تو انہیں ایک دوسرے کا خیال کرنا چاہیے۔اللّٰہ عَزَّوَجَلَّہمیں اپنے رفیق سفرکا خیال رکھنے کی توفیق عطا فرمائے۔آمِیْن بِجَاہِ النَّبِیِّ الْاَمِیْن صَلَّی اللّٰہ تَعَالٰی عَلَیْہِ وَاٰلِہٖ وَسَلَّمصَلُّوْا عَلَی الْحَبِیْب! صَلَّی اللّٰہ تَعَالٰی عَلٰی مُحَمَّد