نماز کا بیان - اَنْوارُ الحَدِیْثْ - حدیث نمبر: 17

ضروری انتباہ :(۱)…آہستہ قرآن پڑھنے میں اِتنا ضروری ہے کہ خُود سُنے اگر حروف کی تصحیح کی مگر اِسقدر آہستہ پڑھا کہ خود نہ سُنا تو نماز نہ ہوئی۔ (1)اور فتاویٰ عالمگیری جلد اول مصری ص:۶۵میں ہے : ’’إِنْ صَحَّحَ الْحُرُوف بِلِسَانِہِ وَلَمْ یُسْمِعْ نَفْسَہُ لَا یَجُوزُ وَبِہِ أَخَذَ عَامَّۃُ الْمَشَایِخِ ہَکَذَا فِی الْمُحِیطِ وَہُوَ الْمُخْتَارُ ہَکَذَا فِی السِّرَاجِیَّۃِ وَہُوَ الصَّحِیحُ ہَکَذَا فِی النُّقَایَۃِ‘‘.(2)
(۲)…سجدہ میں پاؤں کی ایک انگلی کا پیٹ زمین سے لگنا شرط ہے اور ہر پاؤں کی تین تین انگلیوں کا پیٹ لگنا واجب ، تو اگر کسی نے اِس طرح سجدہ کیا کہ دونوں پاؤں زمین سے اُٹھے رہے تو نماز نہ ہوئی۔ (3)
(بہار شریعت، جلد سوم ص۲۷۹، فتاوی رضویہ ، جلد اول ، ص ۵۵۶)
اور اشعۃ اللمعات جلد اول ص:۳۹۴میں ہے کہ ’’اگر ہر دو پائے بردارد نماز فاسد ست واگر یکپائے بردارد مکروہ است‘‘.(4)
اور درمختار مع ردالمحتار جلد اول ص:۳۱۳ میں ہے ’’وَوَضْعُ إصْبَعٍ وَاحِدَۃٍ مِنْہُمَا شَرْطٌ‘‘۔ (5)
اور اِسی کتاب میں ص:۳۵۱ پر ہے ’’فِیہِ یُفْتَرَضُ وَضْعُ أَصَابِعِ الْقَدَمِ وَلَوْ وَاحِدَۃً نَحْوَ الْقِبْلَۃِ وَإِلَّا لَمْ تَجُزْ وَالنَّاسُ عَنْہُ غَافِلُونَ‘‘ (6)
اور کنزالدقائق میں ہے ’’وَوَجُہُ أَصَابِعِ رِجْلَیْہِ نَحْوَ الْقِبْلَۃِ‘‘ اسی کے تحت بحرالرائق جلد اول ص:۳۲۱میں ہے ’’نَصَّ صَاحِبُ الْہِدَایَۃِ فِی التَّجْنِیسِ عَلَی أَنَّہُ إنْ لَمْ یُوَجِّہِ الْأَصَابِعَ نَحْوَہَا فَإِنَّہُ مَکْرُوہٌ‘‘(7)
(۳)…اکثر عورتیں اپنی نادانی سے فرض واجب سب نمازیں بغیر عذر بیٹھ کر پڑھتی ہیں۔ ان کی نماز نہیں ہوتی اِس لیے کہ مردوں کی طرح عورتوں پر بھی کھڑے ہوکر نماز پڑھنا فرض ہے ۔ اگر کسی بیماری یا بڑھاپے کی وجہ سے کمزور ہوگئی ہیں لیکن خادمہ یا لاٹھی یا دیوار پر ٹیک لگا کر کھڑی ہوسکتی ہیں تو فرض ہے کہ کھڑی ہو کر پڑھیں یہاں تک کہ اگر کچھ دیر ہی کے لیے کھڑی ہوسکتی ہیں۔ اگرچہ اتنا ہی کہ کھڑی ہو کراللّٰہاکبر کہہ لیں تو فرض ہے کہ کھڑی ہو کر اتنا کہہ لیں پھر بیٹھ جائیں۔ (8) (بہار شریعت، جلد سوم ، ص ۳۷۷، بحوالہ غنیۃ)
اور فتاویٰ رضویہ جلدسوم، ص:۵۲ ، میں تنویر الابصار و درمختارسے ہے : ’’إِنْ قَدَرَ عَلَی بَعْضِ الْقِیَامِ وَلَوْ مُتَّکِءًا عَلَی عَصًا أَوْ حَاءِطٍ قَامَ لُزُومًا بِقَدْرِ مَا یَقْدِرُ وَلَوْ قَدْرَ آیَۃٍ أَوْ تَکْبِیرَۃٍ عَلَی الْمَذْہَبِ‘‘ ۔
آج کل عموماً مرد بھی ذرا سی تکلیف پر بیٹھ کرنماز پڑھنا شروع کر دیتے ہیں۔ حالانکہ دیر تک کھڑے ہو کر ادھر ادھر کی باتیں کرلیا کرتے ہیں اِن کی نماز نہیں ہوتی اِس لیے کہ قیام کے بارے میں عورت مرد کا حکم ایک ہے ۔
(۴)… عورت نے اِتنا باریک دوپٹہ اوڑھ کر نماز پڑھی کہ جس سے بال کی سیاہی چمکتی ہے تو نماز نہ ہوگی۔ جب تک کہ اس پر کوئی ایسی چیز نہ اوڑھے کہ جس سے بال کا رنگ چھپ جائے ۔ (9)(بہار شریعت، جلد سوم، ص۲۵۱)
اور فتاویٰ عالمگیری جلد اول مصری ص:۵۴میں ہے : ’’اَلثَّوْبُ الرَّقِیقُ الَّذِی یَصِفُ مَا تَحْتَہُ لَا تَجُوزُ الصَّلَاۃُ فِیہِ کَذَا فِی التَّبْیِینِ‘‘ ۔ (10)
------------------
∞[1] ’’بہارِ شر یعت‘‘، ج۱، ص۵۱۱.’’الفتاوی الھندیۃ‘‘،الباب الرابع فی صفۃ الصلاۃ،ج۱،ص۶۹.[2] ’’الفتاوی الھندیۃ‘‘،کتاب الصلاۃ،الباب الرابع،ج۱،ص۶۹.[3] ’’بہارِ شریعت‘‘، ج۱، ص۵۱۳، ’’الدر المختار‘‘،ج۲،ص۱۶۷۔ ۲۴۹۔ ۲۵۱، ’’الفتاوی الرضویۃ‘‘،ج۷،ص۳۷۶.[4] ’’اشعۃ اللمعات‘‘،کتاب الصلاۃ،باب السجود وفضلہ،الفصل الأول،ج۱،ص۴۲۲.[5] ’’الدر المختار وردالمحتار‘‘،کتاب الصلاۃ،باب صفۃ الصلاۃ،ج۲،ص۱۶۷.[6] ’’الدر المختار وردالمحتار‘‘،باب صفۃ الصلاۃ،مطلب فی إطالۃ الرکوع للجائی،ج۲ص۲۴۹.[7] ’’الدر’’کنز الدقائق‘‘،کتاب الصلاۃ،باب صفۃ الصلاۃ،ص۲۵، ’’البحر الرائق‘‘،کتاب الصلاۃ،باب صفۃ الصلاۃ،ج۱،ص۵۶۰.المختار وردالمحتار‘‘،باب صفۃ الصلاۃ،مطلب فی إطالۃ الرکوع للجائی،ج۲ص۲۴۹.[8] ’’بہارِ شریعت‘‘، ج۱، ص ۵۱۱، ’’غنیۃ المتملی‘‘،فرائض الصلاۃ،ص۲۶۱۔ ۲۶۷.[9] ’’بہارِ شریعت‘‘، ج۱، ص ۴۸۱.’’الفتاوی الھندیۃ‘‘،الباب الثالث فی شروط الصلاۃ،ج۱،ص۵۸،موضحا.[10] ’’الفتاوی الھندیۃ‘‘،کتاب الصلاۃ،الباب الثالث،الفصل الأول فی الطہارۃ وسترالعورۃ،ج۱،ص۵۸.