فضائل سید المرسلین علیہ الصلاۃ والسلام - اَنْوارُ الحَدِیْثْ - حدیث نمبر: 109

انتباہ([1]):
(۱)…حضور سید عالمصَلَّی اللّٰہ تَعَالٰی عَلَیْہِ وَاٰلہٖ وَسَلَّمکا چہرئہ اقدس ایسا روشن و تابناک تھا کہ بقول راویانِ حدیث آپ کے چہرے میں چاند و سورج تیرتے تھے جس نے بحالت ِ ایمان ایک بار چہرہ دیکھ لیا وہ صحابی ہوگیا جو نبوت کے بعد سب سے بڑا درجہ ہے ۔
(۲)…سرِ مُبارک بڑا اور بزرگ تھا جس سے سطوت و عظمت ٹپکتی تھی اور جو خشیت الہٰی سے ہر وقت جھکا رہتا تھا۔
(۳)… قد مُبارک نہ زیادہ لانبا تھا اور نہ زیادہ کوتاہ۔ مگر انسانوں کے مجمع میں کھڑے ہوتے تو سب سے اونچے نظر آتے ۔
(۴)…جسم پاک نورانی تھا اس لیے اس کا سایہ نہ سورج کی روشنی میں پڑ تا تھا اور نہ چاندنی میں ۔ جسم پر مکھی کبھی نہیں بیٹھی۔
(۵)…موئے مبارک کچھ بل کھائے ہوئے تھے جو اکثر کندھے تک لٹکتے رہتے تھے اور جب کبھی چہرہ انور پر بکھر جاتے تو’’وَالضُّحَی وَاللَّیْلِ إِذَا سَجَی‘‘کی تفسیر بن جاتے ۔
(۶)…داڑھی شریف گھنی تھی اور چہرۂ انور اس کے گھیرے میں ایسا معلوم ہوتا تھا جیسے آبنوسی رحل پرقرآن مجید رکھا ہو۔ ناک سڈول اور پتلی قدرے اٹھی ہوئی جو اچانک دیکھنے پر شعلہ نور معلوم ہوتی تھی۔
(۷)…سینہ مبارک کشادہ تھا جس میں ناف تک بالوں کی ایک ہلکی تحریر تھی۔ شکم مبارک کی سطح سینہ کے برابر تھی جسے چار بار فرشتوں نے چاک کرکے علم و حکمت کا نور بھرا تھا۔ اسی کی شان میںاَلَمْ نَشْرَحْکی آیت اتری۔
(۸)… گردن شریف نہایت لطیف و شفاف تھی بقول حضرت ابوہریرہرَضِیَ اللّٰہ تَعَالٰی عَنْہُچاندی کی ڈھلی ہوئی تھی۔
(۹)…پیشانی کشادہ اور صبحِ ازل کی طرح روشن تھی جسے لوگ چاند کا ٹکڑا کہتے تھے جو راتوں کو خدائے تعالیٰ کے حضور میں سجدہ ریز رہا کرتی تھی۔
(۱۰)… گوش مبارک نہایت موزوں اور سبک، دورو نزدیک سے یکساں سنتے تھے ۔ وحوش و طیور کی بول چال اور شجر وحجر کی زبانِ حال سے باخبر۔
(۱۱)…دندانِ مبارک موتیوں سے زیادہ چمک دار جن سے مسکراتے وقت روشنی پھوٹ پڑتی تھی اور درو دیوار چمک اُٹھتے تھے ۔
ٍ (۱۲)…پشت مبارک ہموار اور سفید و شفاف تھی جیسے چاندی کی ڈھلی ہوئی جس پر شانوں( کندھوں) کے بیچ میں کبوتر کے انڈے کے برابر اُبھری ہوئی مہرِ نبوت تھی۔
(۱۳-۱۴)…آنکھیں سیاہ و سرمگیں اور پلکیں بڑی تھیں۔ جو ہر وقت غیب کا مشاہدہ کرتی تھیں اور آگے پیچھے یکساں دیکھتی تھیں۔ ساری کائنات میں صرف اِنہی آنکھوں نے خدائے پاک کو بے حجاب دیکھا تھا۔
(۱۵)…دست ِمبارک کشادہ اور پر گوشت تھاجو مصافحہ کرتا اس کا ہاتھ معطر ہوجاتا انہی ہاتھوں کو خدائے تعالیٰ نے اپنا ہاتھ فرمایا تھا۔
(۱۶)…انگلیاں لمبی اور بخشش و عطا کے لیے پھیلی ہوئی رہتی تھیں۔ جن کے بیچ سے ضرورت کے وقت پانی کا چشمہ اُبلنے لگتا تھا۔ اورجن کے اشارہ سے چاند کا سینہ شق ہوا اور ڈوبا ہواسورج پلٹ آیا۔
(۱۷)…پنڈلیاں ہموار اور شیشہ کی طرح لطیف و شفاف تھیں۔
(۱۸)… کلائیاں قدرے لمبی اور گداز ، رنگ نکھرا ہوا صاف وشفاف تھا۔
(۱۹)…ابرو محرابِ حرم کی طرح کماندار تھے جن سے مقام قاب قوسین کا راز آشکار ا تھا۔
(۲۰)…لب مبارک گلِ قدس کی پتیوں کی طرح پتلے پتلے اور گلاب کی پنکھڑیوں سے زیادہ نرم و نازک جن کی جنبش پر کارکنانِ قضا وقدر ہر وقت کان لگائے رہتے تھے ۔
(۲۱)…آواز انتہائی دلکش وشیریں کہ دشمنوں کو بھی پیار آجائے اور اتنی بلند کہ فاران سے گونجے تو ساری دنیا میں پھیل جائے ۔ رحمت وکرم کے موقع پر گل ولالہ کے جگر کی ٹھنڈک اور کبھی غیرت ِحق کو جلال آجائے تو پہاڑوں کے کلیجے دہل جائیں۔
(۲۲)…گریہ مبارک سسکتی ہوئی دبی دبی آواز خشیت الہی کے غلبہ سے سیہ کار اُمت کے غم میں رقت انگیز آیتیں پڑھ کر اور شبینہ دعاؤں میں بھیگی بھیگی پلکوں پر آنسوؤں کے جھلکتے ہوئے موتی۔
(۲۳)…ہنسی انتہائی مسرت و شادمانی کے موقع پر لبوں پر صرف ایک ہلکا سا تبسم پھیل جاتا نور کی ایک کرن پھوٹتی اور درو دیوار وشن ہوجاتے ۔ اسی ر وشنی میں ایک بار حضرت عائشہ صدیقہرَضِیَ اللّٰہ تَعَالٰی عَنْہانے اپنی سوئی تلاش کرلی تھی۔
(۲۴)…پسینہ مبارک انتہائی خوشبودار اور عطر انگیز تھا جدھر سے گزر جاتے فضا معطر ہوجاتی۔ بغل شریف کے پسینہ سے ایک دلہن معطر کی گئی تو پشت در پشت اس کی اولاد میں خوشبو کا اثر تھا۔
(۲۵)…لعابِ دہن زخمیوں اور بیماروں کے لیے مرہم شفا تھا۔ کھاری کنویں اس کی برکت سے شیریں ہوجاتے ، شیر خوار بچے کے منہ میں پڑ جاتا تو دن بھر ماں کے دودھ کے بغیر آسودہ رہتے ۔ ([2]) (ماخوذ از مدارج النبوۃ، شمائل ترمذی، نسیم الریاض، خصائص کبری، جواھر البحار)
الغرض ان کے ہر موپہ دائم درود
ان کی ہر خوو خصلت پہ لاکھوں سلام (اعلی حضرت بریلوی)
------------------
∞[1] از صحیفۂ جمال مرتبہ حضرت علامہ ارشد القادری صاحب مدظلہ العالی فاتح جمشیدپور۔[2] ’’مدارج النبوۃ‘‘مترجم،باب در بیان حسن خلقت جمال إلخ،ج۱،ص۱۵، ’’نسیم الریاض‘‘،القسم الأول فی تعظیم العلی الأعلی إلخ،ص۵۰۹، ’’الخصائص الکبری‘‘،باب جامع فی صفۃ خلقہ صلی اللّٰہ علیہ وسلم،ج۱،ص۱۲۲، ’’جواہر البحار‘‘مترجم،باب فطری محاسن واخلاقی کمالات،ص۶۹.