شرح اربعین نوویہ(اردو) - حدیث نمبر: 39

خطا اور نسیان کا معنیٰ ومفہوم:خطا یعنی غلطی کا مطلب ہے کہ انسان کام کا ارادہ نہیں کرتا مگر اس سے ہو جاتا ہےجیسے روزہ دار کلی کرے اور اسے معلوم ہے کہ میں روزے سے ہوں مگر پانی حلق سے اتر جائے تو یہ خطا ہے۔ نسیان یعنی بھول،اس میں بندہ کام تو ارادے سے کرتا ہے مگر یہ بھول جاتا ہے کہ ابھی یہ کام کرنا جائز نہ تھا جیسے روزہ دار کو اپنا روزہ دار ہونا یاد نہ ہو اور وہ کھا پی لے تو یہ بھول ہے۔اس حدیث کا مقصد یہ ہے کہ الله تعالیٰ نے میری امت پر یہ کرم فرمایا کہ ان کی بھول چوک معاف فرما دی، اس میں ان پر نہ گناہ ہوگا نہ پکڑ، ہاں بعض صورتوں میں شریعت کے احکام ضرور لاگو ہوں گے جیسے نماز میں بھول کر بات کرنے سے نماز ٹوٹ جاتی ہے یا قتل خطاء میں کفارہ یا دیت لازم ہوجاتے ہیں،نماز کا واجب بھول جانے سے سجدہ سہو واجب ہوجاتا ہے۔(مراٰۃ المناجیح، 8/ 596، ملخصاً)مجبوری میں کئے گئے گناہ:یعنی مسلمان جو برا کام مجبورًا کرلے تو وہ گنہگار نہ ہوگا لہذا مجبورًا منہ سے کفریہ بات بول دینے والا کافر نہ ہوگا، مجبورًا شراب پلائے جانے والا گنہگار نہ ہوگا۔یہاں بھی مذکورہ بالا معاملہ ہے کہ مجبوری کی صورت میں وہ گناہ گار نہیں ہو گا البتہ شریعت کے احکام جاری ہوں گے لہذا مجبور کی طلاق واقع ہوجاتی ہے یہی احناف کا مذہب ہے۔خیال رہے کہ ہر جرم کی مجبوری علیحدہ ہے کفر بکنے یا شراب پینے پر جان جانے کا خطرہ ہو تو یہ مجبوری ہے۔ (مراٰۃ المناجیح، 8/ 596، ملخصاً)اکراہِ شرعی کی تعریف:اکراہِ شرعی (یعنی شرعی مجبوری یا جسے مجبور کیا گیاوہ) یہ ہے کہ کوئی شخص کسی کوصحیح دھمکی دے کہ اگر توفلاں کام نہ کرے گا تومیں تجھے مار ڈالوں گا یا ہاتھ پاؤں توڑدوں گایاناک ،کان وغیرہ کوئی عضوکاٹ ڈالوں گایاسخت مارماروں گااوروہ یہ سمجھتاہوکہ یہ کہنے والاجوکچھ کہتاہے کرگزرے گا،تویہ اکراہِ شرعی ہے۔ (ماخوذازبہارشریعت، حصہ15، 3/ 189)امت محمدیہ پر خصوصی کرم:حضرت سیِّدُنا علامہ محمد بن عبد اللہ دمیاطی شافعی رحمۃُ اللہ علیہ فرماتے ہیں: اس حدیث شریف سے یہ ظاہر ہوا کہ خطا اور نسیان (یعنی غلطی اور بھول) کی صورت میں گناہ کی معافی اس امت کے ساتھ خاص ہے، حضور نبی پاک صلّی اللہ علیہ واٰلہٖ وسلّم کے شرف کی وجہ سے (اس امت کو یہ خصوصیت حاصل ہوئی)۔ اسی لئے ہمیں حکم دیا گیا ہے کہ ہم کثرت سے یہ دعا مانگا کریں:رَبَّنَا لَا تُؤَاخِذْنَاۤ اِنْ نَّسِیْنَاۤ اَوْ اَخْطَاْنَاۚ(پ۳، البقرة:۲۸۶)
ترجمہ کنزالایمان: اے رب ہمارے ہمیں نہ پکڑ اگر ہم بھولیں یا چوکیں۔اس طلب کے ساتھ کہ یہ عظیم نعمت ہمیشہ حاصل رہے۔
نیز مروی ہے کہ ’’بنی اسرائیل کو جس چیز کا حکم دیا جاتا اگر وہ اسے بھول جاتے یا غلطی کرتے تو جلد انہیں سزا دے دی جاتی کہ اس گناہ کی وجہ سے کھانے پینے کی بعض حلال چیزیں بھی ان پر حرام کر دی جاتیں۔‘‘
(الجواھر اللؤلؤیة للدمیاطی ، ص۵۴۳، تحت الحدیث:۳۹)بھولی ہوئی چیز یاد آجائے:سیِّدُنا انس رضی اللہ عنہ سے مرفوعاً مروی ہے کہ (نبی کریم صلّی اللہ علیہ وسلّم نے ارشاد فرمایا:) ’’اِذَا نَسِیْتُمْ شَیْئًا فَصَلُّوْا عَلَیَّ تَذْکُرُوْہُ اِنْ شَآءَ اللہ تَعَالٰی یعنی جب تم کسی چیز کو بھول جاؤ تو مجھ پر درودِ پاک پڑھو اللہ پاک نے چاہا تو وہ چیز تمہیں یاد آ جائے گی۔‘‘
(الجواھر اللؤلؤیة للدمیاطی، ص۵۴۴، تحت الحدیث:۳۹)دعا:اللہ پاک کی بارگاہ میں دعا ہے کہ ہمیں حدیث پاک اور اس کی شرح میں موجود مشمولات پر عمل کرنے کی توفیق
عطا فرمائے۔اٰمین بِجاہِ النّبیِّ الْاَمین صلّی اللہ علیہ واٰلہٖ وسلّم