منتخب حدیثیں - حدیث نمبر: 26

فوائد:{۱}علامہ قَسْطَلانی نے فرمایا کہ حضورصَلَّی اللّٰہ تَعَالٰی عَلَیْہِ وَاٰلِہٖ وَسَلَّمکا یہ حکم کہ’’تم لوگ راستو ں پر بیٹھنے سے بچو‘‘یہ حکم وُجوبی نہیں تھابلکہ اِسْتِحْبَابی تھاکیونکہ اگر یہ حکم وُجوبی ہوتا تو صحابہ اس کے جواب میں ہرگز ہرگز کبھی یہ نہ کہتے کہ ہمارے لیے تو راستوں پر بیٹھنے سے چارہ ہی نہیں ہے نہ حضورصَلَّی اللّٰہ تَعَالٰی عَلَیْہِ وَاٰلِہٖ وَسَلَّمیہ فرماتے کہ اچھاتم لوگ بیٹھوتوراستوں کا حق دیتے رہو۔ (1) (حاشیہ بخاری،ص۹۲۰،ج ۲){۲}مذکورہ بالا پانچوں باتوں کو حضورصَلَّی اللّٰہ تَعَالٰی عَلَیْہِ وَاٰلِہٖ وَسَلَّمنے راستہ کا حق قرار دیا ہے اور مومن پر ازروئے شریعت ہر حق والے کا حق ادا کرنا واجب ہے لہٰذا جو لوگ راستوں پر بیٹھیں ان پر واجب ہے کہ ان پانچوں باتوں پر عمل کریں ۔{۳}بلا ضرورت راستوں پر بیٹھنا اگرچہ راستہ کے حقوق ادا کرنے کی صورت میں حرام اور گناہ تو نہیں مگر چونکہ یہ کوئی اچھی خصلت بھی نہیں ہے لہٰذا حتی الوسع مسلمانوں کو اس سے پرہیز ہی کرنا چاہئے۔خصوصاً اس زمانے میں جبکہ بے پردگی بلکہ عریانی و برہنگی فیشن بن چکی ہے سڑکوں اور راستوں پر لوگوں کا بیٹھنا بہت سے مفاسد کا پیش خیمہ ہے لہٰذا اس سے خاص طور پر پرہیز کرنا چاہئے۔{۴}راستوں کے پانچوں حقوق کی قدرے تفصیل یہ ہے :
اوّل: نگاہوں کو نیچی رکھنا، چونکہ راستوں پر عورتیں اور مردبھی گزریں گے اس لیے بیٹھنے والے پر ازروئے حکم شریعت واجب ہے کہ نہ غیر محرم عورتوں پر نظر ڈالیں نہ لوگوں کے ان عیوب کو دیکھیں جن کو راستہ چلنے والے لوگوں سے چُھپانا چاہتے ہیں مثلاً کوڑھی یاسفیدداغ والے یا لنگڑے لولے کو گھور گھور کر بار بار نہ دیکھیں کہ اس سے ان لوگوں کی دل آزاری ہوگی۔
دوم:کسی کو ایذا نہ دینا ،یعنی اس طرح راستوں پر نہ بیٹھا کریں کہ راستہ تنگ ہو جائے اور گزرنے والوں کو ایذا پہنچے ۔یوں ہی راستہ چلنے والوں کا مذاق نہ اڑائیں ، راستہ چلنے والوں کی تحقیر اور عیب جوئی نہ کریں ،سفر کرنے والوں کی جاسوسی نہ کریں کہ کون کون، کہاں کہاں جاتا ہے اور کیوں جاتا ہے، غرض راستوں پر بیٹھنے والے اپنے کسی قول و فعل سے گزرنے والوں کو تکلیف اور ایذا نہ پہنچائیں ۔
سوم:ہر گزرنے والے کے سلام کا جواب دیتے رہیں ۔
چہارم:راستہ چلنے والوں کو اچھی باتیں بتاتے رہیں مثلًا آگے راستہ میں کوئی خطرہ ہو یا راستہ میں کوئی رکاوٹ ہو تو اس سے راستہ چلنے والوں کو آگاہ کرتے رہیں راستہ بھولنے والوں یا ناواقفوں کو راستہ بتاتے رہیں اور راستہ چلنے کے شرعی آداب لوگوں کوبتاتے اور سکھاتے رہیں ۔
پنجم:خلاف ِشریعت اور بُری باتوں سے لوگوں کو منع کرتے رہیں تاکہ راستہ چلنے والے سفر میں کوئی خلافِ شریعت کام نہ کرنے پائیں ۔واللّٰہ تعالیٰ اعلم۔
∞ [1] ارشادالساری،کتاب الاستیذان،باب قولاللّٰہتعالی۔۔۔الخ، تحت الحدیث:۶۲۲۹، ج۱۳،ص۲۷۳