حمد ، دُرُودو سلام ، رباعیات

حمد/مناجات

یا ربِّ محمد مِری تقدیر جگادے

یا ربِّ محمد مِری تقدیر جگادے

صَحرائے مدینہ مجھے آنکھوں سے دکھادے

پیچھا مِرا دنیا کی مَحَبَّت سے چُھڑادے

یا رب مجھے دیوانہ مدینے کا بنادے

روتا ہوا جس وقت میں دربار میں پہنچوں

اُس وقت مجھے جلوۂ محبوب دکھادے

دل عشقِ محمد میں تڑپتا رہے  ہر دم

سینے کو مدینہ مِرے اللہ بنادے

ایمان پہ دے موت مدینے کی گلی میں

مدفن مِرا محبوب کے قدموں میں بنادے

دیتا ہوں تجھے واسِطہ میں پیارے نبی کا

امت کو خدایا رہِ سنت پہ چلادے

عطّاؔر سے محبوب کی سنت کی لے خدمت

ڈنکا یہ تِرے دین کا دنیا میں بجادے

وسائلِ بخشش (مرمم)،ص112

از شیخِ طریقت امیرِ اہلِ سنت  دَامَتْ بَرَکاتُہُمُ الْعَالِیَہ

 

Share

حمد ، دُرُودو سلام ، رباعیات

دُرُودو سلام

ذاتِ والا پہ بار بار درود

ذاتِ والا پہ بار بار درود

بار بار اور بے شمار درود

رُوئے انور پہ نور بار سلام

زلفِ اطہر پہ مشکبار درود

بیٹھتے اٹھتے جاگتے سوتے

ہو الٰہی مِرا شِعار درود

شہریارِ رُسُل کی نذر کروں

سب درودوں کی تاجدار درود

قبر میں خوب کام آتی ہے

بے کسوں کی ہے یارِ غار درود

انہیں کس کے درود کی پروا

بھیجے جب ان کا کردگار درود

اے حسن ؔ خارِ غم کو دل سے نکال

غمزدوں کی ہے غمگسار درود

ذوقِ نعت  ،ص86

از برادرِ  اعلیٰ حضرت مولانا حسن رضا خان عَلَیْہِ رَحمَۃُ الرَّحْمٰن

 

Share

حمد ، دُرُودو سلام ، رباعیات

رُباعیات

ختمِ نبوت

آتے رہے انبیا کَمَا قِیْلَ لَھُمْ

وَالْخَاتَمُ حَقُّکُمْ کہ خاتم ہوئے تم

یعنی جو ہوا دفترِ تَنْزِیْل تَمام

آخِر میں ہوئی مُہر کہ اَکْمَلْتُ لَکُمْ

دُنیا میں ہر آفت سے بچانا مولیٰ

دُنیا میں ہر آفت سے بچانا مولیٰ

عُقبٰے  میں نہ کچھ رَ نج دکھانا مولیٰ

بیٹھوں جو درِ پاکِ پیمبر کے حضور

ایمان پر اس وقت اُٹھانا مولیٰ

اللہ کی سر تا بَقَدم شان ہیں یہ

اللہ کی سر تا بَقَدم شان ہیں یہ

اِن سا نہیں اِنسان وہ اِنسان ہیں یہ

قرآن تو ایمان بتاتا ہے اِنھیں

اِیمان یہ کہتا ہے مِری جان ہیں یہ

حدائقِ بخشش ،ص238 ،445

از امامِ اہلِ سنت امام احمد رضا خان عَلَیْہِ رَحمَۃُ الرَّحْمٰن

Share

Articles

Comments


Security Code