ریاکاری اور دِکھلاوے کے لیے نہ ہو تو یہ بھی باقاعِدَہ ایک نیکی ہے اور ایسی عظیم نیکی ہے  کہ جہنّم سے آزادی دِلا دیتی ہے۔ 

حدیثِ پاک میں ہے:رسولِ ذیشان، مکی مدنی سلطان صَلَّی اللہ عَلَیْہِ وَ آلِہٖ وَ سَلَّم نے فرمایا: خوفِ خُدا سے رونے والا جہنّم میں نہ جائے گا، یہاں تک کہ دُودھ تھن میں واپس پلٹ آئے۔ ^([1])

یعنی جس طرح تھن سے نکلا ہوا دُودھ تھن میں واپس نہیں جا سکتا، یونہی جو خوفِ خُدا سے رونے والا ہے، وہ بھی ہر گز جہنّم میں نہیں جائے گا۔

ایک قطرہ آنسو کی فضیلت

رسولِ ذیشان، مکی مدنی سلطان صَلَّی اللہ عَلَیْہِ وَ آلِہٖ وَ سَلَّم نے فرمایا: جس بندے کی آنکھوں سے خوفِ خُدا کے سبب آنسو نکلے، چاہے مکھی کے پَر کے برابر ہی ہو،   اللہ پاک اس پر جہنّم حرام فرما دیتا ہے۔ ^([2])

رونے والا مُنَوَّر ہے

حضرت خالِد بن مَعْدَان  رَحمۃُ اللہ عَلَیْہ فرماتے ہیں: بیشک ایک آنسو جہنّم کے کئی سمندروں کو بجھا دیتا ہے۔ اگر آنسو بہہ کر رُخسار پر آجائے تو ایسا چہرہ جہنّم نہ دیکھے گا۔ جو بندہ خوفِ خُدا کے سبب روتا ہے، اس کے تمام اعضا  خشوع اِخْتیارکرتے ہیں اور فرشتوں کے ہاں اُس کا اور اُس کے والِد کا نام مُنَوَّر لکھ دیا جاتا ہے۔  ^([3]) ( یعنی وہ بندہ جس کے دِل کو ذِکْرُ اللہ نے روشن کر دیا ہے)۔