سلطانِ جہاں محبوبِ خدا تری شان و شوکت کیا کہنا؟

نعت

سلطانِ جہاں محبوبِ خدا تِری شان و شوکت کیا کہنا

سلطانِ جہاں محبوبِ خدا تِری شان و شوکت کیا کہنا

ہر شے پہ لکھا ہے نام تِرا، تِرے ذکر کی رِفعت کیا کہنا

ہے سر پر تاج نبوت کا جوڑا ہے تن پہ کرامت کا

سہرا ہے جبیں پہ شفاعت کا اُمّت پہ ہے رحمت کیا کہنا

قرآن کلامِ باری ہے اور تیری زباں سے جاری ہے

کیا تِری فصاحت پیاری ہے اور تیری بلاغت کیا کہنا

باتوں سے ٹپکتی لذّت ہے آنکھوں سے برستی رَحمت ہے

خطبے سے چمکتی ہیبت ہے اے شاہِ رسالت کیا کہنا

آنکھوں سے کیا دریا جاری اور لب پہ دُعا پیاری پیاری

رو رو کے گزاری شب ساری اے حامیِ اُمّت کیا کہنا

عالَم کی بھریں ہر دَم جھولی خود کھائیں تو  بس جَو کی روٹی

وہ شان عطا و سخاوت کی یہ زُہد و قَناعت کیا کہنا

شُہرت ہے جمیل اتنی تیری یہ سب ہے کرامت مُرشد کی

کہتے ہیں تجھے مَدّاحِ نبی سب اہلسنّت کیا کہنا

از:مدّاح الحبیب مولانا جمیل الرحمٰن قادری رحمۃ اللہ علیہ

قبالۂ بخشش،ص 47