اے عاشقانِ رسول! مریض کی عیادت کرنا سُنّتِ مصطفےٰ بلکہ سُنتِ انبیا ہے * نبیوں کے نبی رسولِ ہاشمی  صَلَّی اللہ عَلَیْہِ وَ آلِہٖ وَ سَلَّم   کی عادتِ کریمہ تھی کہ کسی بھی صحابی( رَضِیَ اللہ عنہ ) کے بیمار ہونے کی اطلاع ملتی تو آپ  صَلَّی اللہ عَلَیْہِ وَ آلِہٖ وَ سَلَّم  اُس کی عیادت کے لیے تشریف لے جاتے * اگر کوئی شخص 3دن مسجد سے غائب رہتا تو آپ اُس کے مُتَعلِّق  لوگوں سے پوچھا کرتے، اگر وہ بیمار ہوتا تو اس کی عیادت فرماتے۔^([1]) * اور عِیَادت کے لیے اگر مدینۂ شریف کے آخری کنارے تک بھی جانا پڑتا تو تشریف لے جاتے اور اپنے صحابہ( رَضِیَ اللہ عنہم ) کی عیادت فرماتے۔^([2]) * مشہور مفسرِ قرآن، مفتی احمد یار خان نعیمی  رحمۃُ اللہ علیہ  فرماتے  ہیں: حضور  صَلَّی اللہ عَلَیْہِ وَ آلِہٖ وَ سَلَّم  کے اخلاقِ کریمہ میں سے ہے کہ آپ  صَلَّی اللہ عَلَیْہِ وَ آلِہٖ وَ سَلَّم  ہر امیر وغریب کے گھر بیمار پرسی کے  لیے تشریف لے جاتے۔^([3])  *حضور  صَلَّی اللہ عَلَیْہِ وَ آلِہٖ وَ سَلَّم  کی عادتِ کریمہ یہ تھی کہ جب کسی مریض کی عِیادت کو تشریف لے جاتے تو یہ فرماتے: لَا بَاْسَ طَہُوْرٌ اِنْ شَاۤءَ اللہ( یعنی: کوئی حرج کی بات نہیں اللہ پاک نے چاہا تو یہ مرض (گناہوں) سے پاک کرنے والا ہے)  ایک اعرابی  کی عِیادت کو تشریف لے گئے تو یہی فرمایا:لَا بَاْسَ طَہُوْرٌ اِنْ شَاۤءَ اللہ۔^([4])

عیادت اور بہت سارے روحانی علاج سے مُتَعلِّق   مزید معلومات  کے لیے امیر اہلسنت  دَامَت بَرَکاتہمُ الْعَالِیہ کا  رسالہ بیمار عابد  پڑھ لیجیے۔