کیا اچّھا کیا بُرا؟/پانی پینے کے فوائد

باتوں سے خوشبو آئے

بھلائی کس بات میں ہے؟

(1)ارشادِ حضرت سیّدُنا ابو درداء رضی اللہ عنہ: بھلائی اس میں نہیں کہ تمہیں کثیر مال و اولاد مل جائے بلکہ بھلائی تو اس میں ہے کہ تمہاری قوّتِ برداشت بڑھے، عِلم ترقّی کرے اور تم اللہ پاک کی عبادت میں دوسرے لوگوں سے آگے بڑھ جاؤ۔ (مصنف لابن ابی شیبۃ،ج8،ص167،حدیث:6)

دورکعت نفل نماز کا ثواب

(2)ارشادِ حضرت سیِّدُنا کعبُ الاحبار رحمۃ اللہ علیہ : اگر تم جان لو کہ دو رکعت نفل نماز کا ثواب کتنا ہے تو اسے مضبوط پہاڑوں سے بھی بڑا سمجھو جبکہ اللہ پاک کے یہاں فرض نماز کا ثواب اتنا ہے کہ کوئی اسے بیان نہیں کرسکتا۔

(حلیۃ الاولیاء،ج5،ص421،رقم: 7596)

جھوٹی قسم کا وبال

(3)ارشادِ حضرت سیّدُنا خواجہ غریب نواز رحمۃ اللہ علیہ: جو شخص جھوٹی قسم کھاتا ہے وہ اپنے گھر کو ویران کرتا ہے اور اس کے گھر سے خیر و بَرَکت اُٹھ جاتی ہے۔(ہشت بہشت،ص 84)

بڑے مرتبے والے اعمال

(4)ارشادِ حضرت سیّدُنا خواجہ غریب نواز رحمۃ اللہ علیہ: مصیبت زدہ لوگوں کی فریاد سننا اور ان کا ساتھ دینا، حاجت مندوں کی حاجت روائی کرنا، بھوکوں کو کھانا کھلانا، قیدیوں کو قید سے چھڑانا ،یہ باتیں اللہ کریم کے نزدیک بڑا مرتبہ رکھتی ہیں۔(معین الہند حضرت خواجہ معین الدین اجمیری،ص 124)

احمد رضا کا تازہ گلستاں ہے آج بھی

جُذامی کے ساتھ کھانا کیسا؟

(1)جُذامی (یعنی کوڑھ کے مرض والے ) کے ساتھ کھانا بقصدِ تواضُع و توکُّل و اِتِّباع (یعنی عاجزی، اللہ پر بھروسے اور اتباعِ سنّت کی نیّت سے) ہو تو ثواب پائے گا۔(فتاویٰ رضویہ،ج21،ص102)

وظائف باوضو پڑھنا بہتر ہے

(2)وظائف جو احادیث میں ارشاد ہوئے یا مشائخِ کرام نے بطورِ ذکرِ الٰہی بتائے انہیں بِلاوضو بھی پڑھ سکتے ہیں اور باوضو بہتر۔(فتاویٰ رضویہ،ج23،ص399)

کیا اچّھا کیا بُرا؟

(3)جس چیز کوخدا و رسول اچّھا بتائیں وہ اچّھی ہے، اور جسے بُرا فرمائیں وہ بُری،اور جس سے سُکُوت (یعنی خاموشی اختیار) فرمائیں یعنی شرع سے نہ اس کی خوبی نکلے نہ بُرائی وہ اباحتِ اصلیہ پر رہتی ہے کہ اس کے فعل و ترک (کرنے یا نہ کرنے) میں ثواب نہ عقاب (سزا)۔(فتاویٰ رضویہ،ج 23،ص320)

عطّار کا چمن، کتنا پیارا چمن!

عِلم و روحانیت پانے کا طریقہ

(1)صحیحُ العقیدہ سنّی و باعمل عالمِ دین کی صحبت میں رہنے والے شخص کو علم و روحانیت دونوں حاصل ہوتے ہیں۔

(مَدَنی مذاکرہ،21صفر المظفر1436ھ)

پانی پینے کے فوائد

(2)روزانہDaily))12گلاس، یعنی کم و بیش 3لیٹر پانی پئیں اِنْ شَآءَ اللہ گُردوں کے امراض سے محفوظ رہیں گے اور قبض سے بھی بچیں گے۔(مَدَنی مذاکرہ،9محرم الحرام1436ھ)

آنکھوں کی ٹھنڈک

(3)قراٰنِ مجید ہماری آنکھوں کی ٹھنڈک اور دِلوں کا چین ہے۔ اے کاش! ہم عاشقِ قراٰن بن جائیں۔

اٰمِیْن بِجَاہِ النَّبِیِّ الْاَمِیْن صلَّی اللہ تعالٰی علیہ واٰلہٖ وسلَّم

(مَدَنی مذاکرہ،3محرم الحرام1436ھ)

Share

Articles

Comments


Security Code