اَلْحَمْدُ لِلّٰہِ رَبِّ الْعٰلَمِیْنَ وَ الصَّلٰوۃُ وَالسَّلَامُ عَلٰی سَیِّدِ الْمُرْسَلِیْنَ ^ط

اَمَّا بَعْدُ فَاَعُوْذُ بِاللّٰہِ مِنَ الشَّیْطٰنِ الرَّجِیْمِ ^ط  بِسْمِ اللہ الرَّحْمٰنِ الرَّ حِیْم ^ط

اَلصَّلٰوۃُ وَ السَّلَامُ عَلَیْكَ یَا رَسُولَ اللہ                                                       وَعَلٰی اٰلِكَ وَ اَصْحٰبِكَ یَا حَبِیْبَ اللہ

اَلصَّلٰوۃُ وَ السَّلَامُ عَلَیْكَ یَا نَبِیَّ اللہ                                                                        وَعَلٰی اٰلِكَ وَ اَصْحٰبِكَ یَا نُوْرَ اللہ

نَوَ یْتُ سُنَّتَ الْاِعْتِکَاف                                   (ترجمہ : میں نے سُنَّت اعتکاف کی نِیَّت کی)

درودِ پاک کی فضیلت

اللہ پاک کے آخری نبی ، رسولِ ہاشمی صَلَّی اللہ عَلَیْہِ وَ آلِہٖ وَ سَلَّم نے فرمایا : جو قوم کسی مجلس میں بیٹھے اور اس میں نہ اللہ پاک کا ذِکْر کرے ، نہ اس کے نبی مُحَمَّد  صَلَّی اللہ عَلَیْہِ وَ آلِہٖ وَ سَلَّم پر درود بھیجے تو قیامت کے دِن اس قوم پر ذِلَّت و نُحُوسَت مُسَلَّط کر دی جائے گی۔^([1])

پیارے اسلامی بھائیو ! مَجْلِس کا معنیٰ ہے : بیٹھنے کی جگہ۔ ایک شخص اکیلا بیٹھا ہو ، یہ بھی مَجْلِس ہے ، 2 بیٹھے ہوں ، یہ بھی مَجْلِس ہے ، 4اَفرادبیٹھے ہوں ، یہ بھی مَجْلِس ہے ، 500 کا اجتماع ہو یا 5 ہزار کا ، یہ بھی مَجْلِس ہی ہے۔لہٰذا جب بھی کسی مَجْلِس میں ہوں * یعنی اکیلے بیٹھے ہوں یا گھر والوں کے ساتھ * دُکان پر بیٹھے ہوں  یا آفس میں  * دوستوں کے ساتھ ہوں یا دینی اجتماعات میں ، غرض ہر ہر مَجْلِس میں اللہ پاک کا ذِکْر کرنے اور درودِ پاک پڑھنے کی عادَت بنائیے ! اِنْ شَآءَ اللہ الْکَرِیْم ! اس کی برکتیں ملیں گی اور ساتھ ہی ساتھ اللہ پاک نے چاہا تو قیامت کے دِن ذِلَّت و رُسوائی سے بھی بچ جائیں گے۔

خدا کے بعد مُحَمَّد کا نام لیتے رہو  ہر ایک کام میں برکت درودِ پاک سے ہے