حق نے عِلْمِ اَسْما دیا              جو نہ ملائِک کو بخشا

وہ ملکہ فرمایا عطا               ان پر اُن کو غلبہ دیا

لَا اِلٰہَ اِلَّا اللہ اٰمَنَّا بِرَسُوْلِ اللہ

آدم کو شرف ایسا مِلا             آدمی اشرفِ خلق ہوا

اُن کو خلیفہ حق نے کیا          تاجِ کرامت سَر پہ رکھا

لَا اِلٰہَ اِلَّا اللہ اٰمَنَّا بِرَسُوْلِ اللہ ^{( [1] )}

صَلُّوْا عَلَی الْحَبِیْب !                                     صَلَّی اللہ عَلٰی مُحَمَّد

تاریخِ انسانی کا ایک اَہَم تَرِین اجتماع

پیارے اسلامی بھائیو ! یہ تاریخِ انسانی کا سب سے پہلا اجتماع تھا ، جس میں حضرت آدم عَلَیْہِ السَّلام نے فرشتوں کو خطاب فرمایا اور اپنی فضیلت اور اہمیت کے لحاظ سے تاریخِ انسانی کا ایک اَہَم ترین اجتماع حَجَّۃُ الْوِدَاع کے موقع پر ہوا ، اس میں خطیب ہمارے آقا و مولیٰ ، امام الانبیا ، مُحَمَّدٌ رَّسُوْلُ اللہ صَلَّی اللہ عَلَیْہِ وَ آلِہٖ وَ سَلَّم تھے اور اس خطاب کے سامعِین  ( سننے والے )  صحابۂ کرام علیہمُ الرِّضْوان بھی تھے اور روایات کے مطابِق اس اجتماعِ پاک میں  حضرت موسیٰ عَلَیْہِ السَّلام ، حضرت خضر عَلَیْہِ السَّلام اور حضرت الیاس عَلَیْہِ السَّلام بھی تشریف لائے تھے۔یہ تاریخِ انسانی کا وہ اَہَم ترین اجتماع ہے کہ جس میں رسولِ اکرم ، نُورِ مُجَسَّم صَلَّی اللہ عَلَیْہِ وَ آلِہٖ وَ سَلَّم نے خُطْبَۃُ الْوِدَاع ارشاد فرمایا ، یہ وہ عظیم ُالشّان خطبہ ہے کہ ایسا خطبہ انسانی تاریخ میں نہ اس سے پہلے کبھی دِیا گیا تھا ، نہ اس کے بعد کبھی دِیا جائے گا۔