مَنْ ذَا الَّذِیْ یُقْرِضُ اللّٰهَ قَرْضًا حَسَنًا

ترجموڪنزالعرفان: آهي ڪو جيڪو الله کي چڱو قرض ڏي.

علماء فرمائن ٿا: هن جاءِ تي خدا جي راهه ۾ اخلاص سان مال خرچ ڪرڻ کي قرض سان تعبير ڪيو ويو آهي، ان مان اها ڳالهه دل ۾ ويهارڻ مقصود آهي ته جيئن قرض ڏيڻ واري کي اطمينان هوندو آهي ته سندس مال ضايع نه ٿيندو ۽ هو ان جي واپسي جو مستحق آهي، تيئن ئي خدا جي راهه ۾ خرچ ڪرڻ واري کي اطمينان رکڻ گهرجي ته هو ان خرچ جو عيوض يقيناً حاصل ڪندو، ۽ اهو به معمولي نه، پر: ^([1])

فَیُضٰعِفَهٗ لَهٗۤ اَضْعَافًا كَثِیْرَةًؕ-

ترجمو ڪنز العرفان: ته الله ان لاءِ ان قرض کي تمام گهڻو وڌائي.

هڪ جي عيوَض ۾ 20 لک

حضرت عثمان نَهۡدي رَحْمَةُ الـلّٰـهِ عَـلَيْه         تابعي بزرگ آهن، انهن کي ڪنهن ٻڌايو ته حضرت ابو هريره رَضِیَ اللهُ عَنْہُ فرمائن ٿا ته مومن ٻانهي کي هڪ نيڪي جي بدلي ۾ 10 لک نيڪيون ملنديون (يعني جيڪڏهن هڪ رپيو خدا جي راهه ۾ صدقو ڪيو وڃي ته ثواب ۾ اهو 10 لک دفعا هوندو.) حضرت عثمان نهدي رَحْمَةُ الـلّٰـهِ عَـلَيْه   مديني منوره ۾ حاضر ٿيا ۽ حضرت ابوهريره رَضِیَ اللهُ عَنْہُ کان پڇيائون: ڇا توهان اهو ارشاد فرمايو آهي؟ حضرت ابوهريره رَضِیَ اللهُ عَنْہُ فرمايو: مون ائين نه چيو هو، مون ته چيو هو: الله پاڪ مومن ٻانهي کي هڪ نيڪي جي بدلي ۾ 20 لک دفعا عطا فرمائيندو آهي. ^([2]) 

سُبْحٰنَ اللہ! الله پاڪ جي ڪيڏي نه ڪرم نوازي آهي، مال به هُن جو، ڏنو به هُن، جيڪڏهن اسان سندس راهه ۾ خرچ ڪريون ته مال به محفوظ ۽ ثواب  به اهڙو جيڪو ڳڻپ ۽ شمار ۾ به نه اچي سگهي.