اللہ کرے ہمیں یہ سَعادت نصیب ہو ، مدینے کی حاضری  کا اِذْن ملے اور مدینے پاک میں حاضر ہو کر شفاعت کی بھیک مانگنا نصیب ہو جائے ، یقین کیجئے ! مدینۂ مُنَوَّرَہ کی حاضری بہت عظیم سَعادت ہے۔

مجرم بلائے آئے ہیں... !

مسلمانوں کے چوتھے خلیفہ ، حضرت علی المرتضی شیر خدا رَضِیَ اللہ عنہ  فرماتے ہیں : تاجدارِ مدینہ ، قرارِقلب و سینہ صلی اللہ عَلَیْہِ وَ آلِہٖ وَسَلَّم کو ظاہری دنیا سے پردہ فرمائے ابھی 3دن گزرے تھے ، ایک بَدْوی ( یعنی عرب کا دیہاتی )  مزارِ پُر اَنْوَار پر حاضر ہوا ، اس نے اپنے آپ کو قبرِ مُنَوَّر پر گرا دیا اور   مزار کی پُر نُور خاک کو اپنے سر پر ڈالا اور عَرْض کیا : یَا رسولَ اللہ صلی اللہ عَلَیْہِ وَ آلِہٖ وَسَلَّم ! جو کچھ آپ نے اللہ پاک سے سنا ہے ، وہ ہم نےآپ سے سنا ہے ، یَا رسولَ اللہ صلی اللہ عَلَیْہِ وَ آلِہٖ وَسَلَّم !  اللہ پاک فرماتا ہے :

وَ لَوْ اَنَّهُمْ اِذْ ظَّلَمُوْۤا اَنْفُسَهُمْ جَآءُوْكَ فَاسْتَغْفَرُوا اللّٰهَ وَ اسْتَغْفَرَ لَهُمُ الرَّسُوْلُ لَوَجَدُوا اللّٰهَ تَوَّابًا رَّحِیْمًا(۶۴)   ( پارہ : 5 ، سورۂ نساء : 64 )

ترجَمہ کنزُ الایمان : اور اگر جب وہ اپنی جانوں پر ظلم کریں تو اے محبوب تمہارے حضور حاضر ہوں اور پھر اللہ سے معافی چاہیں ا ور رسول ان کی شِفاعت فرمائے تو ضرور اللہ کو بہت توبہ قبول کرنے والا مہربان پائیں۔

اس اَعْرابی نے عَرْض کیا : یَا رسولَ اللہ صلی اللہ عَلَیْہِ وَ آلِہٖ وَسَلَّم ! میں نے اپنے اوپر ظلم کیا ہے  ( یعنی مجھ سے گناہ ہو گیا ہے )  اور آپ کی بارگاہِ بے کس پناہ میں حاضر ہوا ہوں تاکہ آپ  صلی اللہ عَلَیْہِ وَ آلِہٖ وَسَلَّم میرے لئے اِسْتِغْفار ( یعنی دعائے مَغفِرَت فرمائیں ) ۔