امام شافعی رَحْمَةُ اللّٰهِ عَلَیْه کے اعلیٰ اَوْصاف

اے عاشقانِ رسول! امام محمد بن ادریس شافعی رَحْمَةُ اللّٰهِ عَلَیْه عِلْم میں تو بلند رُتبہ رکھتے ہی ہیں ، آپ رَحْمَةُ اللّٰهِ عَلَیْه عَمَل میں بھی بہت بُلند شان والے ہیں ، آئیے! امام شافعی رَحْمَةُ اللّٰهِ عَلَیْه کے چند اعلیٰ اَوْصاف سنتے ہیں :

امام شافعی رَحْمَةُ اللّٰهِ عَلَیْه اور شوقِ تلاوت

حُجَّۃُ الاِسْلام امام محمد بن محمد غزالی رَحْمَةُ اللّٰهِ عَلَیْه لکھتے ہیں : امام شافعی رَحْمَةُ اللّٰهِ عَلَیْهنے رات کو 3 حِصَّوں میں تقسیم کر رکھا تھا؛ ایک حِصَّہ عِلْمِ دین کے لئے ، ایک حِصَّہ نماز کے لئے اور ایک حِصَّہ آرام کے لئے۔ ^([1]) حضرت  رَبِیْع رَحْمَةُ اللّٰهِ عَلَیْه کا بیان ہے : امام شافعی رَحْمَةُ اللّٰهِ عَلَیْه روزانہ ایک قرآنِ کریم ختم فرمایا کرتے۔ ^([2]) رمضان المبارک میں آپ رَحْمَةُ اللّٰهِ عَلَیْه کاشوقِ تِلاوت مزید بڑھ جاتا ، آپ رمضان المبارک میں دورانِ نوافِل 60 قرآنِ کریم ختم فرمایا کرتے تھے۔ ^([3])

سُبْحٰنَ اللہ!پیارے اسلامی بھائیو! ذرا اندازہ لگائیے! امام شافعی رَحْمَةُ اللّٰهِ عَلَیْه کوئی معمولی شخصیت نہیں ہیں ، آپ باقاعِدہ مفتی ومجتہد تھے ، لوگ آپ رَحْمَةُ اللّٰهِ عَلَیْه سے فتوے پوچھا کرتے ، آپ لوگوں کو جوابات عِنَایت فرماتے ، بہت بڑے عالِمِ دین تھے ، دُور دراز سے لوگ آپ کی خدْمت میں حاضِر ہو کر عِلْم کی پیاس بجھاتے تھے ، اتنی مصروفیات ہونے کے باوُجُود آپ رَحْمَةُ اللّٰهِ عَلَیْه تِلاوتِ قرآنِ کریم کے لئے وقت نکال لیا کرتے تھے۔