وسائلِ بخشش اور خوف الٰہی

پیارے اسلامی بھائیو! خوفِ خدا کامطلب یہ ہے کہ اللہ پاک کی *بے نیازی *اس کی ناراضگی *اس کی گرفت *اور اس کی طرف سے دی جانے والی سزاؤں کا سوچ کر انسان کا دل گھبراہٹ میں مبتلا  ہوجائے۔^([1])

جب ہم وسائلِ بخشش کا مطالعہ کرتے ہیں  تو ہمیں یہ بات بخوبی معلوم ہوتی ہے کہ امیر ِاہلسنّت مولانا محمد الیاس عطّار قادری  دَامَتْ بَرَکاتُہمُ العالیہ  کتنے خوفِ خدا والے ہیں؛ *آپ خوفِ خدا کے سبب  عاجزی کرتے ہوئے اللہ پاک سے اپنے گناہوں پر پشیمانی کا اظہار کرتے اور ان کی بخشش مانگتے ہوئے لکھتے ہیں:

یاخدا میری مغفرت فرما                  باغِ فِردوس مَرحَمَت فرما

تُو گناہوں کو کر مُعاف اللہ!                میری مقبول معذِرت فرما

ہو نہ عطارؔ حشر میں رُسوا                  بے حساب اس کی مغفِرت فرما^([2])

 *یہ خوفِ الہٰی کا ہی اثر ہے کہ آپ جہنّم سے لرزاں و ترساں نظرآتے ہیں، جہنّم کی ہولناکیوں سے بچنے کے لیے بارگاہِ الٰہی میں یوں التجا کرتے ہیں:

گر تُو ناراض ہوا میری ہلاکت ہوگی        ہائے! میں نارِجَہنَّم میں جلوں گا یا ربّ!

دردِسر ہو یا بُخار آئے تڑپ جاتا ہوں     میں جَہنَّم کی سزا کیسے سَہوں گا یا ربّ! ^([3])