تڑپتے دِل کو تسکین دینے ، جلتے سینے کی آگ بجھانے خواب میں تشریف لے ہی آئیں۔  

قسمت مِری چمکائیے چمکائیے آقا !        مجھ کو بھی درِ پاک پہ بُلوائیے آقا !

سینے میں ہو کعبہ تو بسے دل میں مدینہ        آنکھوں میں مری آپ سما جائیے آقا !

بے تاب ہوں بے چَین ہوں دیدار کی خاطر                  لِلّٰہ !  مِرے  خواب  میں  آجائیے   آقا ! ^{( [1] )}

پیارے اسلامی بھائیو ! رسولِ اکرم ، نورِ  مُجَسَّم  صلی اللہ عَلَیْہِ وَ آلِہٖ وَسَلَّم  خواب میں تشریف لائیں یا نہ لائیں ، یہ اُن کی رِضا ہے ، البتہ ہمیں چاہئے کہ آپ کے دیدار کی طَلَب کریں ، آگے اُن کا کرم ہے۔  

آئیے ! دیدارِ مصطفےٰ صلی اللہ عَلَیْہِ وَ آلِہٖ وَسَلَّم  کا ایک وظیفہ سُنتے ہیں؛ شیخِ طریقت ، امیر ِاہلسنت  دَامَتْ بَرَکَاتُہُمُ الْعَالِیَہ مدنی پنج سورہ صفحہ : 167 پر فرماتے ہیں :

اَللّٰہُمَّ صَلِّ عَلٰی رُوْحِ مُحَمَّدٍ فِی الْاَرْوَاحِ وَعَلٰی جَسَدِہٖ فِی الْاَجْسَادِ وَعَلٰی قَبْرِہٖ فِی الْقُبُوْرِ

 نبئ اکرم ، نُورِ مُجَسَّم ، شافِعِ اُمَم صلی اللہ عَلَیْہِ وَ آلِہٖ وَسَلَّم کا فرمانِ شفاعت نشان ہے : جو شخص یہ دُرُود پاک پڑھے اس کو خواب میں میری زِیارت ہوگی ، اورجس نے خواب میں مجھے دیکھا وہ مجھے قیامت کے دن بھی دیکھے گا اورجو مجھے قیامت کے دن دیکھ لے گا مَیں اس کی شفاعت کروں گا اورمَیں جس کی شفاعت کروں گا وہ حوضِ کوثرکے جام پئے گا اوراس کے جسم کو اللہ پاک    دوزخ پر حرام کردے گا۔  ^{( [2] )}  

صَلُّوْا عَلَی الْحَبیب !                                                                                                صَلَّی اللّٰہُ عَلٰی مُحَمَّد