اللہ اپنے نور کی راہ بتاتا ہے جسے چاہتا ہے۔

                             مفسرینِ  کرام فرماتے ہیں : یہ چہرۂ مصطفےٰ کے نُور کی مثال ہے ، آیتِ کریمہ کا معنیٰ یہ ہے کہ حُسْنِ مصطفےٰ وہ نرالا حُسْن ہے کہ اگر نُورِ قرآن آپ کو مَس نہ بھی کرتا  ( یعنی آپ قرآنی آیات پڑھ کر نہ بھی سُناتے ) ، پھر بھی آپ اپنی پاکیزگی اور کمالِ حُسْن کے ذریعے جگمگا اُٹھتے۔  ^{( [1] )}   

 حضرت عبد اللہ بن رواحہ رَضِیَ اللہ عنہ  صحابئ رسول ہیں ، اور دربارِ نبوت کے نعت گو شاعِر ہیں ، آپ فرماتے ہیں :

لَو لَمْ یَکُنْ فِیْہِ آیَات مبَیِّنَۃ                                                                                           کَانَت بداھتہ  تَنَیَّنَکَ عَنْ خَبْرِہٖ

یعنی اگر حُضُور پُرنور صلی اللہ عَلَیْہِ وَ آلِہٖ وَسَلَّم  کوئی اور معجزہ نہ بھی دکھاتے ، تب بھی آپ کے نبی ہونے پر آپ کا نظارۂ حُسْن ہی بہت بڑی دلیل تھا۔    ^{( [2] )}   

یہ اللہ پاک کے سچّے نبی ہیں

امام اَبُو نُعَیْم رَحمۃُ اللہ عَلَیْہ   نے اپنی  کتاب دلائِلُ النُّبُوّہ میں روایت ذِکْر کی ،  ہمارے آقا و مولا ، مکی مدنی مصطفےٰ صلی اللہ عَلَیْہِ وَ آلِہٖ وَسَلَّم  کے بےمثل و بےمثال بچپن کا زمانہ تھا ، 2 سال کی عمر مبارک تھی ، آپ صلی اللہ عَلَیْہِ وَ آلِہٖ وَسَلَّم  حضرت حلیمہ سعدیہ  رَضِیَ اللہ عنہا  کے ہاں تشریف فرما تھے ، ایک روز حضرت حلیمہ سعدیہ  رَضِیَ اللہ عنہا  آپ صلی اللہ عَلَیْہِ وَ آلِہٖ وَسَلَّم  کو ساتھ لئے مکۂ مکرمہ جا رہی تھیں ، راستے میں ایک مقام پر حبشہ کے کچھ لوگ  ملے ، ان کی نگاہ جب رُخِ مصطفےٰ پر پڑی تو بَس دیکھتے ہی رہ گئے۔