میٹھے میٹھے اسلامی بھائیو!اَلْحَمْدُ لِلّٰہ عَزَّ  وَجَلَّدعوتِ اسلامی کے  سُنَّتوں  بھرے مدنی ماحول میں بھی رحمتوں اور مغفرتوں بھرے اس مہینے کی آمدپرخوب خوشی کا سَماں ہوتا ہے اوراس کابھرپور استقبال کیا جاتا ہے،جب یہ مہینا رُخصت ہوتا ہےتواشکبار آنکھوں سے اِسے ”اَلْوَدَاع“کیا جاتا ہے ۔

شیخِ طریقت، اَمِیْرِ اہلسنّت، بانیِ دعوتِ اسلامی حضرت علامہ مولانا ابو بلال محمد الیاس عطّار قادری رضوی ضیائی دَامَتْ بَـرَکاتُہُمُ الْعَالِیَہ نے ماہِ رَمَضَانُ الْمُبَارَک کی آمد پر خوشی اور مَسَرَّت کا اظہار کرنے ، ربِّ کریم کی اس عظیم نعمت پر اظہارِ شُکر کرنے  اور اس ماہِ غُفران(بخشش ومغفرت کامہینا) کی عظمت واَہَمِّیَّت اُجاگر کرنےکے لئے یہ خوبصورت اورپیارا کلام لکھا:

مرحبا صد مرحبا!

مرحبا  صد  مرحبا  پھر  آمدِ  رَمَضَان  ہے                                       كِھل اُٹھے مُرجھائے دل تازہ ہوا اِیمان ہے

ہم  گُناہگاروں  پہ  یہ  كتنا بڑا  احسان ہے                                     یا خُدا  تُونے عطا  پھر كردیا  رَمَضَان  ہے

تجھ پہ صَدْقے جاؤں  رَمَضَاں تُوعَظِیْمُ الشان ہے                        كہ خدا نے تجھ  میں ہی  نازِل كیا قرآن ہے

اَبرِ  رَحمت چھاگیا  ہے اور سَماں ہے نُورنُور                                    فَضْلِ ربّ سے مَغْفِرَت  كا ہوگیا  سامان ہے

ہرگھڑی رحمت بھری ہے ہرطرف ہیں بَرَكتیں                       ماہِ رَمَضَاں رَحمتوں اور  بَرَكتوں كی كان ہے

آگیا رَمَضَاں عبادت پر کَمَر اب باندھ لو                                   فیض لے  لو جلد كہ دِن تیس  كا مہمان ہے

عاصیوں كی  مغفرت  كا  لے كر آیا ہے پیام                               جُھوم  جاؤ  مُجْرِمو  رَمَضاں مَہ ِغُفران ہے

بھائیو كرلو  گُناہوں سے سبھی   توبہ كہ  اب                                 پڑگئے  دوزخ پہ تالے  قید  میں شَیطان ہے

خوش دِلی سے سُنّتیں اپنائے جاؤ  بھائیو                                   خُلد كے دَر  كُھل گئے ہیں  داخِلہ آسان ہے

مَسْجِدیں  آباد  ہیں زورِ   گُنہ  كم  ہوگیا                                           ماہِ رَمَضَانُ الْمُبَارَك كا یہ سب فیضان ہے