مغفرت ڈھونڈتی پھرتی ہے گنہگاروں کو

پیارے اسلامی بھائیو! اَلحمدُ للہ! شبِ براءَت (یعنی نجات کی رات) تشریف لانے والی ہے، اللہ پاک ہمیں صحت و عافیت کے ساتھ اس مبارَک رات تک پہنچنا نصیب فرمائے۔ یہ بہت ہی برکتوں والی، عزّتوں اور رفعتوں والی رات ہے۔ ہمارے پیارے آقا،مدینے والے مصطفےٰ  صَلَّی اللہ عَلَیْہِ وَ آلِہٖ وَ سَلَّم  نے فرمایا:جب شعبان کی درمیانی (یعنی 15 وِیں) رات آئے تو اس رات قیام (یعنی عِبَادت) کرو، دِن کو روزہ رکھو، بے شک اس رات سُورج غروب ہوتے ہی اللہ پاک اپنی شایانِ شان آسمانِ دُنیا پر تجلی فرماتا اور ارشاد فرماتا ہے: *اَلَا مِنْ مُسْتَغْفِرٍ لِیْ  فَاَغْفِرَ لَہٗ ہے کوئی مجھ سے مغفرت مانگنے والا کہ میں اُسے مُعَاف کر دوں *اَلَا مُسْتَرْزِقٌ فَاَرْزُقَہٗ ہے کوئی رِزْق مانگنے والا کہ اسے رزق عطا کروں *اَلَا مُبْتَلٰی فَاُعَافِیَہٗ ہے کوئی پریشان حال کہ میں اس کی پریشانی دُور فرماؤں، ہے کوئی ایسا، ہے کوئی ایسا، طُلُوعِ فجر تک یُوں ہی اِعْلان ہوتا رہتا ہے۔^([1]) 

سُبْحٰنَ اللہ!آپ اندازہ لگائیے! اس سے بڑھ کر رحمت و مہربانی اور کیا ہو گی؟ ہم جیسے بدکردار، گنہگار، سَر سے پیروں تک گُنَاہوں میں لتھڑے ہوئے بندوں کو رحمتِ اِلٰہی پُکارتی ہے: آجاؤ...!! بخشش تقسیم ہو رہی ہے، آجاؤ! مغفرت بانٹی جا رہی ہے، جس جس کو بخشش درکار ہے، درِ مولیٰ پر حاضِر ہو جائے۔ بخشش کی خیرات لے لے۔

مغفرت ڈھونڈتی پھرتی ہے گنہ گاروں کو مہرباں کتنا ہے بندوں پہ خُدا آج کی رات

کوئی محروم نہ رہ جائے زمیں پر سائِل     آسمانوں سے یہ آتی ہے صدا آج کی رات