بیان سننے کی نیتیں

حدیثِ پاک میں ہے :  اَلنِّیَّۃُ الْحَسَنَۃُ تُدْخِلُ صَاحِبَہَا الْجَنّۃَ  اچھی نیت بندے کو جنت میں داخِل کروا دیتی ہے۔^([1])   

اے عاشقانِ رسول ! اچھی اچھی نیتوں سے عمل کا ثواب بڑھ جاتا ہے۔ آئیے !  بیان سننے سے پہلے کچھ اچھی اچھی نیتیں کر لیتے ہیں ، مثلاً نیت کیجئے !    * رضائے الٰہی کے لئے  پورا بیان  سُنوں گا  * بااَدَب بیٹھوں گا * خوب تَوَجُّہ سے بیان سُنوں گا  * جو سنوں گا ،  اسے یاد رکھنے ،  خُود عمل کرنے اور دوسروں تک پہنچانے کی کوشش کروں گا۔

صَلُّوْا عَلَی الْحَبیب !                                                صَلَّی اللّٰہُ عَلٰی مُحَمَّد

سب سے آخری جنّتی

صحابئ رسول حضرت ابو اُمَامہ باہلی رَضِیَ اللہ عنہ سے روایت ہے ،  غیب جاننے والے آخری نبی ،  رسولِ ہاشمی ،  مکی مدنی ،  مُحَمَّدِ عربی صلی اللہ عَلَیْہِ وَ آلِہٖ وَسَلَّم   نے فرمایا :  وہ شخص جو سب سے آخر میں جنّت میں جائے گا ،  وہ پُل صراط پر پیٹ کے بَل گِھسَٹ رہا ہو گا ،  جیسے والِد اپنے بیٹے کو مارے تو بیٹا چھٹکارا پا کر بھاگنے کی کوشش کرتا ،  اُس شخص کی بھی ایسی ہی حالت ہو گی ،  اُس کے اعمال اس لائق نہ ہوں گے کہ وہ اسے پُل صراط پار کروا دیں۔

وہ گنہگار جہنّم کی پُشت پر رکھے ، اندھیرے میں ڈُوبے ہوئے ،  تلوار سے تیز اور بال سے باریک پُل صراط پر گھسٹتے ہوئے اپنے رَبِّ کریم کو پُکارے گا :  یَا رَبِّ !  بَلِّغْ بِیَ الْجَنَّۃَ وَ نَجِّنِی مِنَ النَّارِ یعنی اے رَبِّ کریم !  مجھے جنّت میں پہنچا ،  اے میرے رحمٰن و رحیم اللہ پاک !  مجھے جہنّم سے نجات عطا فرما۔  اللہ پاک فرمائے گا :  اے بندے !  اگر میں تجھے جہنّم سے