اعلیٰ حضرت رَحْمَۃُ اللّٰہ ِتَعَالٰی عَلَیْہکی تحریرات اور آپ کے ملفوظات کا اگرانصاف کے ساتھ جائزہ لِیا جائے تو یہ حقیقت واضح ہوجاتی ہے کہ بد دینوں کا سختی کے ساتھ ردّ کرنے میں ہرگز ہرگز آپ کا اپناکوئی ذاتی فائدہ نہ تھا بلکہ فقط اللہعَزَّ  وَجَلَّ اور اُس کے حبیب صَلَّی اللّٰہُ تَعَالٰی عَلَیْہِ وَاٰلِہٖ وَسَلَّمَ کی مَحَبَّت نے آپ کو یہ انداز اختیارکرنے پر اُبھارا، ورنہ حقیقت تو یہ ہے کہ آپ نے اپنی ذات کی خاطر کبھی بھی کسی سے بدلہ نہ لِیا اور یہی ایک مومن کے ایمانِ کامل کی علامت ہے۔حدیث پاک میں ہے:مَنْ اَحَبَّ لِلّٰہِ وَاَبْغَضَ لِلّٰہِ وَاَعْطٰی لِلّٰہِ وَمَنَعَ لِلّٰہِ فَقَدِ اسْتَکْمَلَ الْاِیْمَانَ یعنی جس نے اللہ تعالٰی کی خاطر مَحَبَّت کی اور اللہ تعالٰی کی خاطر ہی بغض رکھا اور اللہ عَزَّ  وَجَلَّ کی خاطر ہی کسی کو کچھ دِیا اور اللہ عَزَّ  وَجَلَّ کی خاطر ہی دینے سے رُکا،تو یقیناً اس نے اِیمان مکمل کرلِیا۔^([1])

میٹھے میٹھے اسلامی بھائیو!واقعی اعلیٰ حضرت رَحْمَۃُ اللّٰہ ِتَعَالٰی عَلَیْہ  کی سختیاں اور نرمیاں سب رِضائے الٰہی کے لئے تھیں ،اللہ عَزَّ  وَجَلَّ اور اُس کے پیارے حبیب صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ کے دُشمنوں کے علاوہ دوسرے لوگوں کے حق میں آپ رَحْمَۃُ اللّٰہ ِتَعَالٰی عَلَیْہ نہ صرف خُود نرم مِزاج تھے بلکہ وقتاً فوقتاً دوسروں کو بھی نرمی اِختیار کرنے کی تاکید فرمایا کرتے چُنانچہ آپ رَحْمَۃُ اللّٰہ ِتَعَالٰی عَلَیْہ اپنے متعلِّقین کو نصیحت کے مدنی پھول عطا کرتے ہوئے ارشاد فرماتے ہیں: نرمی کے جو فوائد ہیں، وہ سختی سے ہرگز حاصل نہیں ہوسکتے،لہٰذا جو لوگ عقائد کے مُعاملے میں تَذَبْذُب اور شُکوک و شُبہات کاشِکار ہوں،اُن سے نرمی کی جائے تاکہ وہ راہِ راست پر آجائیں۔^([2])

ڈال دی قلب میں عظمتِ مُصطفیٰ

حکمتِ اعلیٰ حضرت پہ لاکھوں سلام

صَلُّوْا عَلَی الْحَبِیْب!                                         صَلَّی اللّٰہُ تَعَالٰی عَلٰی مُحَمَّد