rozon ki ahmiyat o fazilat aur aslaaf e kiraam

بزرگانِ دین کے فرامین

روزوں کی اہمیت و فضیلت اور اسلافِ کرام

*مولانا سیّد عمران اختر عطاری مدنی

ماہنامہ فیضانِ مدینہ مارچ2023

مولائے کائنات کی پسند

مجھے دُنیا میں تین چیزیں پسند ہیں : ( 1 ) اَلضَّرْبُ بِالسَّیْفِ  یعنی تلوار سے جہاد کرنا  ( 2 ) اَلصَّوْمُ بِالصَّیْفِ یعنی گرمی کے روزے رکھنا اور  ( 3 ) اِکْرَامُ الضَّیْفِ یعنی مہمان کی مہمان نوازی کرنا۔

 ( ارشادِ مولا علیُّ المرتضیٰ رضی اللہ عنہ )  ( روح البیان ، پ20 ، النمل ، تحت الآیۃ : 62 ، 6 / 264 )

قوتِ حافظہ بڑھانے کا نسخہ

تین چیزیں قوتِ حافظہ میں اضافہ کرتی اور بلغم کو ختم کرتی ہیں :  ( 1 ) مسواک کرنا  ( 2 ) روزے رکھنا  ( 3 ) قراٰنِ پاک کی تلاوت کرنا۔

 ( ارشادِ مولا علیُّ المرتضیٰ رضی اللہ عنہ )  ( احیاء العلوم ، 1 / 364 )

ٹھنڈی غنیمت

کیا میں تمہیں ٹھنڈی غنیمت کے بارے میں نہ بتاؤں ؟ لوگوں نے پوچھا : وہ کیا ہے ؟ فرمایا : سردیوں میں روزے رکھنا۔

   ( ارشادِ حضرت ابوہریرہ رضی اللہ عنہ )   ( الزھدللامام احمد ، ص197 حدیث : 976)

دوائے دل

دل کی دوا پانچ چیزیں ہیں : غورو فکر کے ساتھ قراٰن پڑھنا ، پیٹ کو  ( روزہ رکھ کر  ) خالی رکھنا ، رات کو عبادت کرنا ، سحر کے وقت آہ و زاری کرنا اور نیکوں کے ساتھ اٹھنا بیٹھنا۔

( ارشادِ حضرت ابراہیم خوّاص رحمۃُ اللہ علیہ )  ( طبقات الاولیاء ، ص  17 )

آلۂ شیطانی کو توڑنے والا عمل

روزہ اس خواہش کو توڑتا ہے جو اللہ پاک کے دشمن شیطان کا آلہ ہے۔

  ( ارشادِ امام محمد غزالی رحمۃُ اللہ علیہ ) ( احیاء العلوم ، 1  /  355 )

بادشاہِ حقیقی کے دربار تک پہنچانے والا عمل

نماز تمہیں نصف راستے تک پہنچاتی ہے ، روزہ بادشاہِ حقیقی  ( یعنی اللہ پاک )  کےدروازےتک پہنچاتا ہے جبکہ صدقہ اس کے دربار میں داخل کردیتا ہے۔

 ( حضرت سیِّدُنا عبدُ العزیز بن عُمیر رحمۃُ اللہ علیہ ) ( المستطرف ، 1  / 19 )

آگ سے ڈھال

روزہ آگ سے  ڈھال اور نیک لوگوں کے درجات تک پہنچنے کا  سبب ہے۔

 ( ارشادِ شیخ ابو طالب مکی رحمۃُ اللہ علیہ ) ( قوت القلوب ، 1 / 161 )

ــــــــــــــــــــــــــــــــــــــــــــــــــــــــــــــــــــــــــــــ

* فارغ التحصیل جامعۃ المدینہ ، ماہنامہ فیضانِ مدینہ کراچی